ព័ត៌មានជាតិ

លោក ឱក សេរីសុភ័ក្រ ថាថៃមានគោលដៅ៣ដើម្បីបំបែកកម្ពុជាតែខុសធ្ងន់ត្រង់យុទ្ធសាស្ត្រ

បានផុស

៤ ខែ មុន

នៅ

ថ្ងៃសៅរ៍ ១៣ ធ្នូ ២០២៥

ដោយ

អ្នកជំនាញផ្នែកអភិបាលកិច្ចលោក ឱក សេរីសុភ័ក្រ បានសរសេរលើហ្វេសបុករបស់លោកដោយបង្ហាញពីយុទ្ធសាស្ត្រ៣ជាគោលដៅរបស់ថៃដើម្បីយកដី និងបំភិតបំភ័យកម្ពុជា តែគោលដៅនេះមិនអាចសម្រេចបានដោយសារខុសលើយុទ្ធសាស្ត្រ មើលងាយទេពកោសល្យយោធាសម្ដេចតេជោ និងសាមគ្គីភាពរបស់ជនជាតិខ្មែរ។

លោក សេរីសុភ័ក្រ បានសរសេរនៅថ្ងៃនេះថាគោលដៅរបស់ថៃគឺការប្រើប្រាស់យោធាវាយដណ្ដើមទឹកដី និងប្រាសាទខ្មែរ ជាមួយគ្នានឹងការប្រើយុទ្ធសាស្ត្រចិត្តសាស្ត្របំភិតបំភ័យពលរដ្ឋខ្មែររត់ភៀសសឹកធ្វើឱ្យរដ្ឋាភិបាលកម្ពុជាគិតរវល់នឹងសុវត្ថិភាពពលរដ្ឋ ខណៈបង្កើតព័ត៌មានក្លែងក្លាយដើម្បីធ្វើឱ្យប៉ះពាល់សតិពលរដ្ឋបន្ថែមទៀត។

លោកសរសេរថា៖ «ក្នុងន័យនេះ សូម MMO ប្រយ័ត្នប្រយ៉ែងឲ្យមែនទែនកុំឲ្យសត្រូវប្រើប្រាស់ដោយមិនដឹងខ្លួន។ ក្រសួងពត៌មានក៏ត្រូវតែមានវិធានការដាច់ណាត់ជាចាំបាច់។ ត្រូវម្នាក់ៗយល់ថា ពេលនេះជាពេលស្លាប់រស់របស់ប្រទេសជាតិទាំងមូល ពុំមែនជាពេលរស់នៅក្នុងជីវិតធម្មតានោះឡើយ អ្វីដែលផ្អាកបានផ្អាកសិនទៅ»។

លោកបន្ថែមថា ដោយថៃមើលឃើញថាទាហានថ្មើរជើងរបស់ខ្លួនស្លាប់ច្រើន ពេលនេះថៃបានងាកបំផ្លាញមូលដ្ឋានសេដ្ឋកិច្ចកម្ពុជា ដោយចាប់ផ្តើមពីហេដ្ឋារចនាសម្ព័ន្ធ មានស្ពានថ្នល់វិញ ក្នុងចេតនាបំបែកកម្លាំងរបស់កម្ពុជា។

លោកបានសរសេរថា៖ «យោធាថៃលែងខ្វល់ពីប្រធានាធិបតីត្រាំ និងសហគមអន្តរជាតិទៀតហើយ ព្រោះនយោបាយភូតកុហករបស់ពួកវាបានបរាជ័យយ៉ាងអាម៉ាស់អស់ហើយ។ ប្រតិបត្តិការសឹករបស់យោធាថៃលែងលាក់បាំងលក្ខណៈ ឈ្លានពានទៀតហើយ ព្រោះហួសឆ្ងាយណាស់ពីបន្ទាត់កាពារខ្កួន។ គោលដៅរបស់យោធាថៃអាចមានបីក្នុងពេលនេះ»។

ទោះជាយ៉ាងណាលោក ឱក សេរីសុភ័ក្រ យល់ថាគោលដៅ និងសកម្មភាពថៃទាំងបីនេះគឺខុសខ្លាំងណាស់ដែលនឹងធ្វើឱ្យបាត់បង់ការគាំទ្រពីពលរដ្ឋរបស់ខ្លួនដោយពុំអាចទទួលយកការបាត់បង់ពេលវេលាយូរ ទាហាន អ្នកនយោបាយ បញ្ញាវ័ន្ត អ្នកកាសែត កាន់តែច្រើននឿយណាយនឹងសង្គ្រាមនិងចាប់ផ្ដើមចេញមកនិយាយជាសាធារណៈ អ្នកវិនិយោគបរទេសចាប់ផ្តើមប្តូរទិសដៅទៅប្រទេសផ្សេង។ បន្ថែមលើនេះសកម្មភាពយោធារបស់ថៃដែលបំពានកិច្ចព្រមព្រៀងសន្ដិភាពគឺជាការមើលងាយដល់សហគមន៍អន្តរជាតិ ច្បាប់អន្តរជាតិដែលបានសម្លាប់នយោបាយរបស់ខ្លួនឯង។

លោកសរសេរបន្ថែមថា៖ «ត្រូវចាំទុក នៅថ្ងៃទី ១២ និង១៣ធ្នូ ២០២៥ យោធាថៃបានធ្វើអត្តឃាតនយោបាយខ្លួនឯង ដោយមើលស្រាលលោកប្រធានាធិបតីត្រាំ និងដោយបាញ់ប្រហារទៅលើខេត្តកោះកុង និងទម្លាក់គ្រាប់បែកទៅលើស្ពានថ្មីដែលជាជំនួយ របស់ចិន នៅខេត្តពោធិសាត់»។

ការមើលងាយទេពកោសល្យយោធារបស់សម្ដេចតេជោពីកងទ័ពថៃក៏ជាកំហុសផ្នែកយុទ្ធសាស្ត្រដ៏ធំរបស់ថៃផងដែរ។ លោកថាថៃអាងលើសព្វាវុធទំនើបៗ តែភ្លេចគិតពីសាមគ្គីភាពរបស់កម្ពុជាដែលកំពុងតែរឹងមាំឡើងក្នុងពេលដែលថៃឈ្លានពាននេះ។

លោកសរសេរថា៖ «យោធាថៃស្អប់សម្តេចតេជោដល់ឆ្អឹង តែបែរជាមើលស្រាលទេពកោសល្យយោធារបស់សម្តេច ព្រមទាំងមើលងាយសមត្ថភាព យោធារបស់កម្ពុជា។ នេះជាកំហុសធ្ងន់ធ្ងរដែលមានតែមេទ័ពល្ងីល្ងើទេ ទើបធ្វើបាន»។

បើតាមលោក សេរីសុភ័ក្រ សង្គ្រាមនេះនឹងត្រូវបញ្ចប់ដោយ «ការចរចា» ហើយប្រហែលជាថៃលែងមានឱកាសបំពានកម្ពុជាទៀតហើយដោយសារ កម្ពុជានឹងបំប្លែងការឈឺចាប់លើកនេះពង្រឹងសង្គមជាតិឲ្យខ្លាំងរហូតទាល់តែគ្មានសត្រូវណាហ៊ានមាក់ងាយបានទៀត។

លោកបន្ថែមថា៖ «ដំណោះស្រាយមួយក្នុងចំណោមដំណោះស្រាយផ្សេងទៀត គឺកម្ពុជាអាចប្រើប្រាស់សមានចិត្តអន្តរជាតិដែលកំពុងឡើងខ្លាំងចំពោះយើង ពិចារណាអំពីសំណើរជាឯកតោភាគី ក្នុងការដាក់ពង្រាយអ្នកសង្កេតការយោធា–ដែលមានសមត្ថភាពការពារខ្លួន – របស់អាស៊ានបូកនឹងប្រទេសស្ម័គ្រចិត្តដ៏ទៃទៀតនៅលើទឹកដីព្រំដែនកម្ពុជា ក្នុងគោលបំណងការពារប្រជាពលរដ្ឋស៊ីវិលស្លូតត្រង់ ពីការឈ្លានរបស់យោធាថៃ។ នេះមិនពាក់ព័ន្ធដល់អធិបតេយ្យភាព និងឯករាជ្យភាពរបស់កម្ពុជាឡើយ៕