កិច្ចប្រជុំពិសេសអាស៊ាន នៅឯម៉ាឡេស៊ី កម្ពុជាបន្តទាមទារនូវការដោះលែងទាហាន១៨នាក់ដែលថៃចាប់ឃុំខ្លួន

កម្ពុជាបន្តទាមទារឱ្យភាគីថៃដោះលែងនូវទាហានទាំង១៨នាក់របស់កម្ពុជាត្រឡប់មកវិញ ដោយឥតលក្ខខណ្ឌ បន្ទាប់ពីអ្នកទាំងនោះត្ រូវបានចាប់ខ្លួនដោយថៃអស់រយៈពេលជាង១៤០ថ្ងៃមកហើយ។ ការទាមទារនេះធ្វើឡើងតាមរយៈសេចក្ដីថ្លែងការណ៍របស់រដ្ឋមន្ត្រីការបរទេសកម្ពុជា លោក ប្រាក់ សុខុន ដែលបានលើកឡើងនៅក្នុងកិច្ចប្រជុំពិសេសរដ្ឋមន្ត្រីការបរទេសអាស៊ានស្ដីពីបញ្ហាជម្លោះកម្ពុជា និងថៃ នៅទីក្រុងគូឡាឡាំពួ កាលពីថ្ងៃទី២២ ខែធ្នូ ឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងសន្និសីទកាសែត នៅអាកាសយានដ្ឋានអន្តរជាតិតេជោ ក្រោយវិលត្រឡប់ពីចូលរួមកិច្ចប្រជុំពិសេសខាងលើលោក ប្រាក់ សុខុន និយាយថា ក្នុងសេចក្ដីថ្លែងការណ៍របស់លោក បានគូសបញ្ជាក់អំពីភាពចាំបាច់ផ្នែកមនុស្សធម៌ ដោយសុំឱ្យអង្គប្រជុំរួមគ្នាអំពាវនាវឱ្យភាគីថៃត្រូវមានការដោះលែងដោយគ្មានបង្អែរបង្អង់ និងឥតលក្ខខណ្ឌនូវទាហានកម្ពុជាចំនួន១៨នាក់ ដែលកំពុងស្ថិតក្រោមការឃុំឃាំងរបស់ថៃ។

គិតមកដល់ថ្ងៃទី២៣ ខែធ្នូនេះ មានរយៈពេល១៤៧ថ្ងៃ ដែលទាហានកម្ពុជាចំនួន១៨រូប ត្រូវបានចាប់ខ្លួន និងដាក់ឱ្យស្ថិតក្រោមការឃុំគ្រងរបស់យោធាថៃ កាលពីព្រឹកថ្ងៃទី២៩ ខែកក្កដា ពោលគឺប៉ុន្មានម៉ោងប៉ុណ្ណោះបន្ទាប់ពីបទឈប់បាញ់បានចូលជាធរមាន ក្នុងពេលការប្រយុទ្ធលើកទី១ រវាងកម្ពុជា និងថៃ។ បើតាមការរាយការណ៍របស់គណៈកម្មាធិការអន្តរជាតិនៃកាកបាទក្រហម (ICRC) ដែលបានជួបផ្ទាល់ជាមួយទាហានកម្ពុជាទាំង១៨នាក់ បានអះអាងថា អ្នកទាំងនោះ គឺមានសុវត្ថិភាព និងសុខភាពល្អ។ 

ជារឿយៗ ក្រសួងការពារជាតិកម្ពុជា បានបញ្ជាក់ថា ខ្លួនបាននិងកំពុងធ្វើការយ៉ាងសស្រាក់សស្រាំឥតឈប់ឈរនូវគ្រប់យន្តការដោះស្រាយទាំងអស់លើករណីនេះ ដើម្បីឱ្យភាគីថៃដោះលែកម្លាំងរបស់កម្ពុជាទាំង១៨នាក់វិលត្រលប់មកវិញឱ្យបានឆាប់រហ័សជាទីបំផុត និងដោយសុខសុវត្ថិភាព៕

អត្ថបទ៖ ធឿន វ៉ាន់សុង