អាជីវកម្ម​ថៃ​ព្រួយបារម្ភកាន់តែខ្លាំងពីបញ្ហាប្រឈមសម្រាប់ការនាំចេញនៅឆ្នាំក្រោយ

អ្នកជំនាញ និងវិស័យឯកជនថៃ បាន​សម្ដែងក្ដីបារម្ភកាន់តែខ្លាំង ចំពោះបញ្ហាប្រឈមនានាសម្រាប់ការនាំចេញរបស់ថៃ ដែលរំពឹងនឹង​ចុះខ្សោយនៅឆ្នាំក្រោយ​ ដោយសារតែហានិភ័យទាំងក្នុង និងក្រៅស្រុក។

តាមការចុះផ្សាយរបស់់កាសែត The Nation កាលពីថ្ងៃពុធ (២៤​​ ធ្នូ) ក្រុមប្រឹក្សាអ្នកដឹកជញ្ជូនជាតិថៃ (TNSC) បានព្រមានថា ការនាំចេញរបស់​ថៃក្នុងឆ្នាំ ២០២៦ ប្រឈមនឹងហានិភ័យនៃកំណើនយឺតយ៉ាវជាងមុន ដោយសារប្រាក់បាតឡើងថ្លៃ និង​កំណើននៃការនាំចេញនៅឆ្នាំ ២០២៥ ខ្លាំងក្លា​។

ប្រធាន TNSC លោក Thanakorn Kasetsuwan បាន​លើកឡើងថា ការនាំចេញនៅឆ្នាំ ២០២៥ កើនឡើងខ្ពស់ខុសពីធម្មតា លើស ១០% ដែលអាចធ្វើឱ្យ​ថៃពិបាកពង្រីកការនាំចេញនៅឆ្នាំ ២០២៦ នៅពេលការបញ្ជាទិញចុះខ្សោយ។ ក្រុមប្រឹក្សារបស់លោកបាន​ព្យាករកំណើននាំចេញឆ្នាំ ២០២៦ ​ត្រឹមតែចន្លោះពី ២-៤%។

លោក Thanakorn បាន​សម្ដែងក្ដីបារម្ភថា ការនាំចេញរបស់ថៃនៅឆ្នាំក្រោយ​ ប្រឈមមុខនឹងបញ្ហាប្រឈមជាច្រើនលើវិស័យ​ផ្សេងៗ ដូចជាការហក់ឡើងនៃប្រាក់បាត ​​ការបញ្ជាទិញ​ថយចុះ និងភាពមិនប្រាកដប្រជាលើពន្ធគយអាមេរិក​ ​និងស្ថានភាព​ពាណិជ្ជកម្មសកលជាដើម​។

លោក​គូសបញ្ជាក់ថា ​ការហក់ឡើងនៃប្រាក់បាត គឺជាហានិភ័យចម្បង។ គិតត្រឹមថ្ងៃចន្ទ ប្រាក់បាត​ត្រូវបានជួញដូរក្នុងតម្លៃប្រហែល ៣១ បាត/ដុល្លារ​ ដែលជាអត្រាថ្លៃបំផុតធៀបនឹងប្រាក់ដុល្លារក្នុងរយៈពេល ៤ ឆ្នាំ ហើយគេរំពឹងថានឹងបន្តកើនឡើងបន្ថែមទៀត។

ការឡើងថ្លៃនៃប្រាក់បាត ជាទូទៅធ្វើឱ្យ​ទំនិញថៃឡើងថ្លៃសម្រាប់អ្នកទិញបរទេស ដែលប៉ះពាល់ដល់ការប្រកួតប្រជែង​ និងការបញ្ជាទិញ។ លើសពីនេះ វាក៏អាចធ្វើឱ្យ​ប្រាក់ចំណេញរបស់អ្នកនាំចេញ​ធ្លាក់ចុះផងដែរ ប្រសិនបើគេប្ដូរប្រាក់ទាំងនោះទៅជាបាត។

លោក Thanakorn បាន​និយាយថា ក្នុងកម្រិតអត្រាតម្លៃប្រាក់បាតនាពេលបច្ចុប្បន្ន ការនាំចេញថៃនៅតែកើនឡើងចន្លោះពី ២-៤% នៅឆ្នាំក្រោយ ប៉ុន្តែទាបជាងឆ្នាំមុនៗ និងមិនស្មើនឹង​កម្រិតអ្វីដែលវិស័យឯកជនថៃចង់បាន ដើម្បីឱ្យ​កំណើន​សេដ្ឋកិច្ចដើរអូសជើងរបស់ថៃស្ទុះឡើង។

ពាក់ព័ន្ធនឹង​ការបញ្ជាទិញខ្សោយ លោកបាន​រំពឹងថា នឹងប៉ះពាល់កាន់តែខ្លាំងសម្រាប់ទំនិញកសិកម្មដែលមិនកែច្នៃដូចជា ស្រូវអង្ករ និងជ័រកៅស៊ូធម្មជាតិ ដែលមាននិន្នាការខ្សោយរួចស្រាប់ហើយ។

មែនទែនទៅ មិនមែនតែលោក Thanakorn ទេ ដែលបង្ហាញពីក្ដីបារម្ភចំពោះការនាំចេញថៃនៅឆ្នាំក្រោយ។ ក្រៅពីបញ្ហាដែលបានលើកឡើងពីខាងដើម ជម្លោះព្រំដែនថៃ-កម្ពុជា កាត់ផ្ដាច់ស្ទើរតែទាំងស្រុងសម្រាប់ការនាំចេញទំនិញថៃមកកម្ពុជាតាមព្រំដែនគោករាប់តាំងពីចុងខែមិថុនាមក។

អ្នកជំនាញថៃបាន​ព្រួយបារម្ភថា ​ស្ថានភាពនេះ អាចរំពឹងបន្តរហូតដល់ឆមាសទី១ ឆ្នាំ ២០២៦ ដែលធ្វើឱ្យអាជីវកម្ម​រងការខាតបង់រាប់ពាន់លានដុល្លារ៕