ព័ត៌មានអន្ដរជាតិ

ធនាគារកណ្ដាលវៀតណាមព្រមានពីកង្វះខាតសាច់ប្រាក់ងាយស្រួល និងសម្ពាធពន្ធ

បានផុស

៤ ខែ មុន

នៅ

ថ្ងៃអង្គារ ៣០ ធ្នូ ២០២៥

ដោយ

ធនាគារកណ្តាលវៀតណាមបានព្រមានថា ស្ថាប័នអ្នកផ្តល់ប្រាក់កម្ចីមួយចំនួនកំពុងប្រឈមមុខនឹងកង្វះខាតសាច់ប្រាក់ងាយស្រួល ដោយសារតែកំណើនប្រាក់កម្ចីពីធនាគារនៅឆ្នាំនេះ ដោយបន្ថែមពីលើសម្ពាធពន្ធខ្ពស់របស់អាមេរិក។ នេះបើតាមការចុះផ្សាយរបស់សារព័ត៌មាន Bloomberg កាលពីថ្ងៃចន្ទ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានគោលនយោបាយរូបិយវត្ថុរបស់ធនាគារកណ្តាល លោក Pham Chi Quang បានថ្លែងថា ធនាគាររដ្ឋវៀតណាម (ធនាគារកណ្ដាល) នឹងបន្តអនុវត្តគោលនយោបាយរូបិយវត្ថុដែលអាចបត់បែនបាន ដើម្បីជំរុញការផ្តល់ប្រាក់កម្ចី និងគាំទ្រដល់អាជីវកម្ម ប៉ុន្តែក្នុងលក្ខណៈប្រុងប្រយ័ត្នព្រោះ «កំណើនឥណទាននៅឆ្នាំនេះគឺខ្ពស់ណាស់រួចទៅហើយ ដោយប្រាក់កម្ចីភាគច្រើនពឹងផ្អែកលើការផ្តល់រយៈពេលខ្លី»។

លោក Quang បាននិយាយថា កំណើន ១៩,៤% នៃប្រាក់កម្ចី គិតត្រឹមថ្ងៃទី ២៤ ខែធ្នូ ធៀបនឹងរយៈពេលដូចគ្នាឆ្នាំមុន គឺលើសគោលដៅពេញមួយឆ្នាំត្រឹម ១៦% ហើយខ្ពស់ជាងកំណើនប្រាក់បញ្ញើ ដែលបង្កើតសម្ពាធលើអត្រាការប្រាក់ និងសាច់ប្រាក់ងាយស្រួលរបស់ធនាគារ។

អាជ្ញាធររូបិយវត្ថុវៀតណាមនៅឆ្នាំនេះ បានជំរុញឱ្យធនាគារទាំងឡាយផ្តល់ប្រាក់កម្ចីបន្ថែមទៀត ដើម្បីគាំទ្រដល់សេដ្ឋកិច្ច និងគោលដៅកំណើនសេដ្ឋកិច្ច ១០% របស់រដ្ឋាភិបាលនៅឆ្នាំក្រោយ។

អនុប្រធានធនាគារកណ្តាលវៀតណាម លោក Pham Thanh Ha បានថ្លែងថា៖ «សេដ្ឋកិច្ចប្រឈមមុខនឹងបញ្ហាប្រឈមផ្សេងៗនាពេលខាងមុខ ខណៈស្ថានភាពភូមិសាស្ត្រនយោបាយសកល នឹងបន្តវិវត្តតាមរបៀបស្មុគស្មាញ និងមិនអាចទាយទុកជាមុនបាន ជាមួយនឹងការលំបាក ហានិភ័យ និងភាពមិនប្រាកដប្រជាកាន់តែកើនឡើង»។ លោក Ha បានលើកឡើងពីបញ្ហាប្រឈមជាច្រើនចាប់ពីពន្ធគយរបស់ប្រធានាធិបតីអាមេរិក ដូណាល់ ត្រាំ រហូតដល់ការកាត់បន្ថយអត្រាការប្រាក់របស់ធនាគារកណ្ដាលសហព័ន្ធអាមេរិក (Fed)។

គួរគូសបញ្ជាក់ថា សេដ្ឋកិច្ចរបស់ប្រទេសវៀតណាមបានកើនឡើង ៨,២% កាលពីត្រីមាសទី៣ ដែលជាកំណើនធំបំផុតក្នុងរយៈពេល ៣ ឆ្នាំ ខណៈរោងចក្រនានាបានជញ្ជូនទំនិញទៅកាន់សហរដ្ឋអាមេរិកលើសលុប មុនពេលពន្ធ ត្រាំ ចូលជាធរមាននៅដើមខែសីហា៕