ព័ត៌មានអន្ដរជាតិ

គីម ជុងអ៊ុន បញ្ជាឲ្យពន្លឿនផលិតឧបករណ៍បាញ់រ៉ុក្កែតច្រើនគ្រាប់

បានផុស

៤ ខែ មុន

នៅ

ថ្ងៃពុធ ៣១ ធ្នូ ២០២៥

ដោយ

មេដឹកនាំកូរ៉េខាងជើងលោក គីម ជុងអ៊ុន បានទៅទស្សនារោងចក្រផលិតគ្រាប់រំសេវមួយកន្លែងកាលពីចុងសប្តាហ៍ ដោយត្រួតពិនិត្យខ្សែសង្វាក់ផលិតកម្មសម្រាប់ឧបករណ៍បាញ់រ៉ុក្កែតច្រើនគ្រាប់ និងណែនាំមន្ត្រីឲ្យបង្កើនសមត្ថភាពផលិតកាន់តែលឿនជាងមុន។ នេះបើយោងតាមកាសែត Rodong Sinmun របស់គណបក្សពលករដែលកំពុងកាន់អំណាច បានរាយការណ៍កាលពីថ្ងៃអង្គារទី៣០ធ្នូ ឆ្នាំ២០២៥។

លោកគីមបាននិយាយថា ប្រព័ន្ធរ៉ុក្កែតច្រើនគ្រាប់នឹងក្លាយជាមធ្យោបាយវាយប្រហារសំខាន់របស់កងទ័ពប្រជាជនកូរ៉េ ដោយធ្វើការផ្លាស់ប្តូរទាំងស្រុង សមាសភាពនៃកម្លាំងកាំភ្លើងធំ ព្រមទាំងដើរតួនាទីយ៉ាងសំខាន់ នៅក្នុងគោលនយោបាយយុទ្ធសាស្ត្រយោធារបស់ទីក្រុងព្យុងយ៉ាង ស្តីពីការធ្វើទំនើបកម្ម និងពង្រឹងកាំភ្លើងធំរយៈចម្ងាយឆ្ងាយ។

លោកបាននិយាយបន្ថែមថា ប្រព័ន្ធអាវុធដែលនឹងត្រូវដាក់ពង្រាយក្នុងបរិមាណច្រើនសម្រាប់ការវាយប្រហារប្រមូលផ្តុំក្នុងអំឡុងពេលប្រតិបត្តិការយោធា គឺជាប្រព័ន្ធអាវុធដ៏មានអានុភាពខ្លាំង ព្រោះវាអាចបំផ្លាញសត្រូវតាមរយៈការវាយប្រហារភ្លាមៗ និងអំណាចបំផ្លិចបំផ្លាញ ហើយក៏អាចប្រើជាមធ្យោបាយវាយប្រហារជាយុទ្ធសាស្ត្រផងដែរ។

មិនតែប៉ុណ្ណោះ កាសែត Rodong Sinmun បានបញ្ចាក់បន្ថែមថា អាវុធទាំងនេះនឹងត្រូវដាក់ពង្រាយទៅកាន់អង្គភាពយោធាសំខាន់ៗរបស់កូរ៉េខាងជើង។ ចំណែក Yonhap ចេញផ្សាយដែរថា សំណើរបស់លោកគីមក្នុងការពង្រីកសមត្ថភាពផលិតកម្មបង្ហាញថា ពួកគេអាចកំពុងពង្រីកការនាំចេញទៅកាន់ប្រទេសរុស្ស៊ី៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖