កីឡា

ការប្រកួតបាល់ទះថ្នាក់ជាតិ ពានរង្វាន់សម្តេចក្រឡាហោម ស ខេង ចាប់ផ្តើមខែមករានេះ

បានផុស

៤ ខែ មុន

នៅ

ថ្ងៃសៅរ៍ ៣ មករា ២០២៦

ដោយ

ការប្រកួតកីឡាបាល់ទះជើងឯកជាតិ ពានរង្វាន់សម្តេចក្រឡាហោម ស ខេង រដូវកាលទី៤ នឹងចាប់ផ្តើមនៅសប្តាហ៍ទី២ នៃខែមករា ឆ្នាំ ២០២៦ ដោយមានក្រុមទូទាំងមកពីទូទាំងប្រទេសចូលរួមប្រកួត។

កាលពីរដូវកាលមុនៗ ការប្រកួតពានរង្វាន់ ពានរង្វាន់សម្តេចក្រឡាហោម ស ខេង តែងតែងធ្វើនៅខែធ្នូ នៃឆ្នាំនីមួយៗ ប៉ុន្តែរដូវកាលទី៤ ឆ្នាំ ២០២៥ ត្រូវបានលើកពេលមក ដើមឆ្នាំ ២០២៦។ តាមការគ្រោងទុក កាលបរិច្ឆេទប្រកួត ចាប់ផ្តើមនៅថ្ងៃទី១១ ដល់ ទី ២៥ ខែមករា ឆ្នាំ ២០២៦ ហើយការប្រកួតលីគបាល់ទះកំពូលកម្ពុជាដែលហៅកាត់«តេជោលីគ»នឹងប្តូរទៅរៀបចំការប្រកួតនៅពាក់កណ្តាលឆ្នាំវិញ។

រដូវកាលទី៣ កាលពីខែធ្នូ ឆ្នាំ ២០២៤ លក្ខន្តិកៈនៃការប្រកួតអនុញ្ញាតឲ្យកីឡាករជម្រើសជាតិ ឬកីឡាករដែលមានសមត្ថភាពកម្រិត A តែ ២ នាក់ និងកីឡាករបរទេស ១ នាក់បង្ហាញខ្លួននៅលើទីលាន ខណៈកីឡាករ ៣ នាក់ទៀតគឺជាកីឡាករកម្រិត B ឬ យុវជន។ ការធ្វើបែបនេះដើម្បីពង្រឹងសមត្ថភាពកីឡាករវ័យក្មេងឲ្យមានបទពិសោធ សមត្ថភាព និងស្មារតីលើសម្រាប់បន្តវេនក្រុមជម្រើសជាតិលើឆាកអន្តរជាតិ។ ទោះជាយ៉ាងណា រដូវកាលទី៤ ឆ្នាំ ២០២៦ មិនទាន់ត្រូវបានប្រកាសលក្ខន្តិកៈនៃការប្រកួតលំអិតឡើយ។

ការប្រកួត ពានរង្វាន់សម្តេចក្រឡាហោម ស ខេង ពីមួយរដូវកាលទៅមួយរដូវកាល ត្រូវបានកែប្រែលក្ខន្តិកៈជាបន្តបន្ទាប់ដើម្បីអភិវឌ្ឍធនធានកីឡាករវ័យក្មេងកម្ពុជា ពីព្រោះកីឡាករអាជីពកម្រិត A គឺប្រកួតពានរង្វាន់តេជោលីគ។

សូមបញ្ជាក់ថា ការប្រកួតកីឡាបាល់ទះពានរង្វាន់សម្តេចក្រឡាហោម ស ខេង បានធ្វើ ៣ លើកមកហើយគឺលើកទី១ ក្រុម វិសាខា B ជាជើងឯក ហើយលើកទី២ ក្រុមក្រសួងមហាផ្ទៃ B ជាជើងឯក និងលើកទី៣ ក្រុមខេត្តស្វាយរៀង ជាជើងឯក។