សេដ្ឋកិច្ច

សហគ្រាសសិរិហ្វាម ចាប់ផ្ដើមដំណើរការផលិតឡើងវិញ ខណៈអាក់ខានមួយរយៈដោយសារសង្គ្រាម

បានផុស

៤ ខែ មុន

នៅ

ថ្ងៃសុក្រ ២ មករា ២០២៦

ដោយ

ការឈ្លានពានរបស់ថៃមកលើដែនអធិបតេយ្យភាពកម្ពុជាបានធ្វើឱ្យសហគ្រាសសិរិហ្វាមផ្អាក់ដំណើការផលិតកម្មរបស់ខ្លួនមួយរយៈ ខណៈពេលនេះសហគ្រាសមួយនេះបានសម្រេចចាប់ផ្ដើមដំណើរការផលិតឡើងវិញដើម្បីឆ្លើយតបទៅនឹងកំណើនៃតម្រូវការ។

លោក អ៊ួន ឈាន ម្ចាស់សហគ្រាសសិរិហ្វាម ស្ថិតនៅខេត្តបន្ទាយមានជ័យ ប្រាប់ កម្ពុជាថ្មី ថា សហគ្រាសរបស់លោកបានចាប់ផ្ដើមដំណើរផលិតទឹកមៀន ទឹកស្វាយកែវរមៀត និងប្រភេទដំណាំផ្សេងៗទៀតឡើងវិញ បន្ទាប់បានវិលត្រឡប់ចូលស្រុកកំណើត ខណៈលោកផ្ទាល់ក៏ជាប្រជាជនជនភៀសសឹកដូចនឹងពលរដ្ឋខ្មែរផ្សេងៗដែលស្ថិតនៅឃុំម៉ាឡៃ ស្រុកម៉ាឡៃ ខេត្តបន្ទាយមានជ័យ ផងដែរ។

លោក អ៊ួន ឈាន បន្តថា បន្ទាប់ពីអាជ្ញាធរក្នុងមូលដ្ឋានរបស់លោកបានអនុញ្ញាតឱ្យប្រជាពលរដ្ឋភៀសសឹកចូលទៅក្នុងរស់នៅប្រកបរបររកស៊ីរៀងៗខ្លួនវិញ ពិសេសគឺលោកផ្ទាល់ក៏ចូលមកកាន់សហគ្រាសរបស់ខ្លួនវិញ ហើយជំហានបន្ទាប់គឺលោកចាប់ផ្ដើមផលិតប្រភេទទឹកមៀន ទឹកម្នាស់ និងទឹកស្វាយកែវរមៀតបន្ថែមទៀត ដើម្បីផ្គត់ផ្គង់ទៅកាន់ទីផ្សារក្នុងស្រុកឡើងវិញ។

យ៉ាងណាមិញ ម្ចាស់សហគ្រាសរូបនេះ បានឱ្យដឹងដែរថា ចំពោះផលិតផលរបស់សិរិហ្វាម នាពេលបច្ចុប្បន្នត្បិតតែទទួលបានការគាំទ្រខ្លាំងពីប្រជាជនខ្មែរ ប៉ុន្តែក៏មានបញ្ហាមួយចំនួនទាក់ទងនឹងតម្លៃរៀងខ្ពស់ជាងផលិតផលនាំចូលពីបរទេសបន្ដិច ខណៈការផលិតនៅត្រឹមកម្រិតតិចតួចនៅឡើយ។

ទោះជាយ៉ាងណា លោក អ៊ួន ឈាន នៅតែទទូចស្នើសុំចិត្តប្រជាជនខ្មែរ សូមមេត្តាជួយគាំទ្រផលិតផលខ្មែរបន្តទៅទៀត ដើម្បីធ្វើយ៉ាងណាឱ្យសហគ្រាសក្នុងស្រុកទាំងអស់អាចមានឱកាសក្នុងការអភិវឌ្ឍខ្លួនកាន់តែធំជាងមុន លោក បញ្ជាក់ថា «កាលធ្វើបែបនេះ តម្លៃ ឬការលក់ផលិតផលខ្មែរនៅលើទីផ្សារនឹងមានតម្លៃសមរម្យជាមិនខានឡើយ»។

គួរឱ្យដឹងថា សហគ្រាសសិរិហ្វាម ជាសហគ្រាសកែច្នៃផ្លែឈើមួយដែលបានបើកដំណើរឡើងមកតាំងពីឆ្នាំ ២០២២។ បច្ចុប្បន្នសហគ្រាសមានទីតាំងស្ថិតនៅភូមិវាលហាត់ ឃុំម៉ាឡៃ ស្រុកម៉ាឡៃ ខេត្តបន្ទាយមានជ័យ៕

អត្ថបទ ៖ សួស សិត