ព័ត៌មានជាតិ

សាលាសង្កាត់អូរឫស្សីទី ៣ ចុះជួសជុលផ្លូវបេតុង ១ ខ្សែ ប្រវែងជាង ២០០ ម៉ែត្រ ជូនពលរដ្ឋ

បានផុស

៤ ខែ មុន

នៅ

ថ្ងៃចន្ទ ៥ មករា ២០២៦

ដោយ

ផ្លូវលំ ១ ខ្សែ ដែលខូចខាត កំពុងត្រូវបានអាជ្ញាធរសង្កាត់អូរឫស្សីទី ៣ ជួសជុលឡើងវិញ ដោយចាក់បេតុងថ្មីប្រវែងជាង ២០០ ម៉ែត្រ សម្រាប់ជូនប្រជាពលរដ្ឋ។

កំណាត់ផ្លូវលំ កែងផ្លូវលេខ ១៣៩ អាជ្ញាធរខណ្ឌ ៧ មករា ធ្វើជូនពលរដ្ឋ ដើម្បីបន្ធូរបន្ថយការលំបាក ដោយផ្តល់នូវផ្លូវបេតុង ១ ខ្សែ ប្រវែង ២១៤ ម៉ែត្រ សង្កាត់អូរឫស្សីទី ៣ ខណ្ឌ ៧ មករា រាជធានីភ្នំពេញ។

លោកស្រី ស៊ុម វណ្ណរី មេភូមិអូរឫស្សីទី ៣ បានឲ្យដឹងថា ដោយមានការចង្អុលបង្ហាញ និងតែងមានការណែនាំពីលោក ថេង សុថុល អភិបាលខណ្ឌ ៧ មករា លើបញ្ហាផ្លូវ មិនថាផ្លូវតូច ឬក៏ធំ នោះឡើយ បើមានកន្លែងណាខូច ត្រូវមានការជួសជុលភ្លាមៗ ឲ្យត្រឹមត្រូវតាមស្តង់ដារបច្ចេកទេស និងបន្តអភិវឌ្ឍន៍ជានិច្ចក្នុងមូលដ្ឋាន។

លោកស្រី បន្តថា ជាក់ស្ដែងនៅកំណាត់ផ្លូវលំកំពុងជួសជុលចាក់បេតុងឡើងវិញនេះ គឺមានប្រវែង ២១៤ ម៉ែត្រ ទទឹង ៤ ម៉ែត្រ កម្រាស់ ១ តឹកកន្លះ ដែលផ្លូវមួយខ្សែនេះបានរងការខូចខាតស្ទើរទាំងស្រុង។ ដូច្នេះហើយ រដ្ឋបាលសង្កាត់អូរឫស្សីទី ៣ សម្រេចជួសជុលឡើងវិញ ដើម្បីសម្រួលដល់ប្រជាពលរដ្ឋដែលរស់នៅអមសងខាងផ្លូវ។

អាជ្ញាធរសង្កាត់អូរឫស្សីទី ៣ ក៏បានអំពាវនាវដល់ពលរដ្ឋក្នុងមូលដ្ឋាន សូមមេត្តាជួយថែរក្សានូវអនាម័យ ក៏ដូចជាសោភ័ណភាពដងផ្លូវ ដើម្បីងាយស្រួលដល់ការធ្វើដំណើរ ជាពិសេសពេលមានអគ្គិភ័យណាមួយកើតឡើង ងាយស្រួលរថយន្តពន្លត់អគ្គិភ័យចូលជួយសង្គ្រោះទាន់ពេលវេលាផងដែរ៕

អត្ថបទ ៖ រដ្ឋា