១១ថ្ងៃ មានអ្នកប្រកាសទ្រព្យសម្បត្តិ និងបំណុល ជាង១ម៉ឺននាក់

រយៈពេល១១ថ្ងៃ ការទទួលឯកសារប្រកាសទ្រព្យសម្បត្តិ និងបំណុល តាមរបប២ឆ្នាំ សម្រាប់ឆ្នាំ២០២៦ មានចំនួនជាង ១ម៉ឺនច្បាប់។ នេះបើតាមសេចក្ដីប្រកាសរបស់អង្គភាពប្រឆាំងអំពើពុករលួយ។

អង្គភាពប្រឆាំងអំពើពុករលួយ បានឱ្យដឹងថា គិតត្រឹមថ្ងៃទី១១ ខែមករា នាយកដ្ឋានប្រកាសទ្រព្យសម្បត្តិ និងបំណុល បានទទួលឯកសារប្រកាសទ្រព្យសម្បត្តិ និងបំណុល សរុបចំនួន ១១ ៩៨០ច្បាប់ ដោយក្នុងនោះក្រសួងស្ថាប័ន ដែលបានបញ្ចប់ការប្រកាសរបស់ខ្លួនទាំងស្រុង មានគណៈកម្មាធិការជាតិរៀបចំការបោះឆ្នោត ក្រុមប្រឹក្សាធម្មនុញ្ញ ក្រសួងការងារ និងបណ្តុះបណ្តាលវិជ្ជាជីវៈ រួមទាំងខេត្តចំនួន៤ គឺខេត្តមណ្ឌលគិរី កែប កំពង់ស្ពឺ និងខេត្តព្រះសីហនុ។

‎

ការប្រកាសទ្រព្យសម្បត្តិ និងបំណុល តាមរបប២ឆ្នាំ ចាប់ពីថ្ងៃទី១ ដល់ទី៣១ ខែមករា ឆ្នាំ២០២៦ ពោលគឺពេញមួយខែមករា ដោយ‎ក្រុមការងារនាយកដ្ឋានប្រកាសទ្រព្យសម្បត្តិ និងបំណុល បានអំពាវនាវដល់អ្នកជាប់កាតព្វកិច្ចប្រកាសទ្រព្យសម្បត្តិ និងបំណុល មកប្រកាសស្របតាមច្បាប់កំណត់ឱ្យបានរួសរាន់នៅថ្ងៃណាក៏បាន ពីម៉ោង៨ព្រឹក ដល់ម៉ោង៥ល្ងាច ដោយមិនឈប់សម្រាកថ្ងៃសៅរិ៍-អាទិត្យ និងថ្ងៃបុណ្យឡើយ។

គួរឱ្យដឹងថា អ្នកជាប់កាតព្វកិច្ចត្រូវប្រកាសទ្រព្យសម្បត្តិ និងបំណុល តាមរបប២ឆ្នាំ ក្នុងឆ្នាំ២០២៦នេះ មានចំនួនសរុប ១៩ ៨៨៧រូប៕

ដោយ៖ ធឿន វ៉ាន់សុង