កីឡា

ក្រៅពីថវិកាខ្ទង់លានដុល្លារ ម្ចាស់មេដាយមាសអូឡាំពិកដំបូងនឹងមានរូបចម្លាក់ស្ទើរទូទាំងប្រទេស

បានផុស

៣ ខែ មុន

នៅ

ថ្ងៃសុក្រ ១៦ មករា ២០២៦

ដោយ

គណៈកម្មាធិការជាតិអូឡាំពិកកម្ពុជា ស្វែងរកបានដៃគូហើយសម្រាប់ដំណើរឆ្ពោះទៅរកមេដាយលើកដំបូងក្នុងព្រឹត្តិការណ៍កីឡាអូឡាំពិក ដោយបានចុះអនុស្សរណៈនៃការយោគយល់គ្នាជាមួយ សភាពាណិជ្ជកម្មអាមេរិកប្រចាំកម្ពុជា (AMCHAM) ដែលក្រុមហ៊ុនអាមេរិកនឹងជួយទំនុកបម្រុងអត្តពលិកកម្ពុជាដើម្បីត្រៀមខ្លួនទៅប្រកួតកីឡាអូឡាំពិក ឆ្នាំ ២០២៨ នៅសហរដ្ឋអាមេរិក។

នៅក្នុងប្រវត្តិសាស្ត្ររបស់ខ្លួន កម្ពុជាមិនធ្លាប់ទទួលបានមេដាយឡើយទាំង សំរិទ្ធ ប្រាក់ និងមាស ហើយមិនត្រឹមតែប៉ុណ្ណោះកីឡាករ កីឡាការិនីកម្ពុជាកម្របានជាប់ក្នុងវគ្គជម្រុះដើម្បីទទួលបានសិទ្ធិពេញលេញក្នុងការចូលរួមប្រកួតកីឡាអូឡាំពិក។ ភាគច្រើនបំផុត កីឡាហែលទឹក និងអត្តពលកម្ម ទទួលបានការអនុគ្រោះទៅចូលរួមប្រកួតប៉ុណ្ណោះ។ អតីតវិរកីឡាការិនីកម្ពុជា ស៊ន សៀវម៉ី ជាអត្តពលិកកម្ពុជាដំបូងគេបង្អស់ដែលបានជាប់ជម្រុះក្នុងតំបន់ ហើយបានទៅប្រកួតកីឡាអូឡាំពិកដោយពេញសិទ្ធិកាលពីឆ្នាំ ២០១៦ នៅប្រទេសប្រេស៊ីល។

ហេតុដូច្នេះហើយបានជាកម្ពុជាដាក់គោលដៅធំបំផុតគឺស្វែងរកមេដាយឲ្យបានជាលើកដំបូងក្នុងកីឡាអូឡាំពិក។ ការដាក់គោលដៅនេះ កម្ពុជាត្រូវស្វះស្វែងរកដៃគូឧបត្ថម្ភគាំទ្រដើម្បីពង្រឹងសមត្ថភាពកីឡាករ កីឡាការិនីសម្រាប់ការត្រៀមខ្លួនឲ្យបានឈានដល់កម្រិតខ្ពស់។

លោក Casey Barnett ប្រធានសភាពពាណិជ្ជកម្មអាមេរិកប្រចាំកម្ពុជា បានថ្លែងពីការប្តេជ្ញាចិត្តរបស់ក្រុមហ៊ុនអាមេរិកក្នុងការជួយឧបត្ថម្ភគាំទ្រដល់កីឡាករ កីឡាការិនីកម្ពុជាឲ្យមានសមត្ថភាពកម្រិតខ្ពស់ និងសម្រេចឲ្យបាននូវគោលដៅរបស់កម្ពុជាក្នុងការស្វែងរកឲ្យបានមេដាយដំបូងក្នុងព្រឹត្តិការណ៍កីឡាអូឡាំពិក។

បុរសជនជាតិអាមេរិករូបនេះបានបញ្ជាក់ថា ប្រជាជនខ្មែរមួយចំនួនមិនដឹងនៅសហរដ្ឋអាមេរិក ក្រុមហ៊ុនឯកជនជាអ្នកឧបត្ថម្ភដល់ការហ្វឹកហាត់របស់កីឡាករ កីឡាការិនី។ ពួកគេមិនពឹងលើប្រាក់ឧបត្ថម្ភរបស់ជាតិទាំងស្រុងនោះទេ ពីព្រោះមិនគ្រប់គ្រាន់។ លោកសង្ឃឹមថា កម្ពុជាអនុវត្តដូចនៅអាមេរិកដែរគឺ ក្រុមហ៊ុនឯកជនទំនុកបម្រុងដល់កីឡាករ កីឡាការិនីសម្រាប់ការត្រៀមខ្លួនប្រកួតលើឆាកអន្តរជាតិ។

ជាមួយគ្នានេះ លោក វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា និងជាអគ្គលេខាធិការនៃគណៈកម្មាធិការជាតិអូឡាំពិកកម្ពុជា បានលើកឡើងថា គោលដៅធំបំផុតរបស់កម្ពុជាគឺស្វែងរកការបង្កើតប្រវត្តិសាស្ត្រដំបូងក្នុងការទទួលបានមេដាយកីឡាអូឡាំពិក មិនថាមេដាយសំរិទ្ធ ប្រាក់ ឬមាសទេ។ អត្តពលិកណាដែលទទួលបានមេដាយមាសកីឡាអូឡាំពិកលើកដំបូងនឹងមានកិត្តិយសធំធេងណាស់សម្រាប់ជាតិ។

លោកមានប្រសាសន៍ថា ៖«តាមអនុក្រឹត្យ ប្រាក់រង្វាន់សម្រាប់មេដាយ«មាស»កីឡាអូឡាំពិកគឺទទួលបាន ៣ ម៉ឺនដុល្លារ ហើយមេដាយប្រាក់ ឬសំរិទ្ធ ក៏ទទួលបានតាមលំដាប់ តែខ្ញុំជឿថា នឹងមានការឧបត្ថម្ភផ្សេងៗច្រើនណាស់ មិនក្រោមលានដុល្លារអាមេរិកទេ»។

«អ្វីដែលកាន់តែមានតម្លៃជាងថវិកាទៀតនោះគឺ កិត្តិយស។ អ្នកឈ្នះមេដាយ«មាស»លើកដំបូងនឹងមានកិត្តិយសធំធេងណាស់ សម្រាប់ខ្លួនគាត់ផ្ទាល់ សម្រាប់គ្រួសារ។ គាត់នឹងត្រូវបានធ្វើរូបចម្លាក់ដាក់តម្កល់ស្ទើរទូទាំងប្រទេស។ ទីកន្លែងណាដែលមានការហ្វឹកហាត់ត្រឹមត្រូវនឹងធ្វើរូបចម្លាក់គាត់ដាក់ដើម្បីជាគំរូ ជាការទឹកចិត្ត និងជាមហាកិត្តិយសសម្រាប់គាត់ដែលបានសាងស្នាដៃជូនជាតិ»៕

អត្ថបទ៖ វិរបុត្រ

Related Topics:កីឡាអូឡាំពិក