អ្នកកោះ Greenland រាប់ពាន់នាក់ ចេញធ្វើបាតុកម្ម ប្រឆាំងលោក ត្រាំ

អ្នកកោះ Greenland រាប់ពាន់នាក់ បានចេញតវ៉ាប្រឆាំងនឹងប្រធានាធិបតីអាមេរិក ដូណាល់ ត្រាំ ដែលមានផែនការក្រសោបយកកោះនេះទៅគ្រប់គ្រង។

តាមការផ្សាយរបស់ RT, មនុស្សប្រមាណ ៤ ០០០នាក់បាននាំគ្នាធ្វើបាតុកម្មក្នុងទីក្រុង Nuuk កាលពីថ្ងៃសៅរ៍ទី១៧ខែមករាឆ្នាំ២០២៦ ស្របពេលនៅរាជធានី កូប៉ិកហាក របស់ប្រទេសដាណឺម៉ាក ឯណោះ ក៏មានការប្រមូលផ្តុំគ្នាទ្រង់ទ្រាយតូច ដើម្បីតវ៉ាទៅមេដឹកនាំអាមេរិកផងដែរ។

បាតុករខ្លះមានកាន់ទង់កោះ Greenland និងខ្លះលើកបដាដែលសរសេរថា « Greenland មិនមែនសម្រាប់លក់ទេ» និង «យើងមិនចង់ក្លាយជាជនជាតិអាមេរិកឡើយ»។

មិនត្រឹមប៉ុណ្ណឹង គេក៏ឃើញអ្នកចូលរួមមួយចំនួនរាំជាមួយស្គរ Tambourine ផងដែរ។ វាជាប្រពៃណីក្នុងតំបន់នេះ ដែលគេតែងតែប្រើប្រាស់ដើម្បីដោះស្រាយជម្លោះ។

អ្វីដែលគួឲ្យកត់សម្គាល់គឺថា នាយករដ្ឋមន្ត្រី Greenland លោក Jens-Frederik Nielsen ក៏ចូលរួមក្នុងបាតុកម្មនេះដែរ ដោយលោកកាន់បដាសរសេរថា «យើងជាអ្នកកំណត់វាសនាអនាគតរបស់យើង»។

សូមជម្រាបជាថ្មី លោកត្រាំ បានត្រៀមកញ្ចប់ថវិការួចរាល់ហើយដើម្បីទិញយកកោះនេះ ប៉ុន្តែបានគំរាមអាចឈានដល់ការប្រើប្រាស់កម្លាំងយោធាតែម្តង ដើម្បីយក Greenland មកគ្រប់គ្រង បើផែនការមួយបរាជ័យ។

សម្រាប់រដ្ឋបាលលោក ត្រាំ, Greenland មិនមែនត្រឹមតែជាផ្ទាំងទឹកកកទេ ហើយមូលហេតុដែលលោក ត្រាំ ចង់បានកោះនេះខ្លាំងព្រោះវាជាទីតាំងយុទ្ធសាស្ត្រសម្រាប់ប្រព័ន្ធការពារមីស៊ីលការពារអាមេរិកពីការវាយប្រហារឆ្លងកាត់ប៉ូលខាងជើង។

លើសពីនេះ Greenland មានផ្ទុកនូវរ៉ែកម្រ ដែលចាំបាច់សម្រាប់បច្ចេកវិទ្យាទំនើប និងអាវុធ ដែលបច្ចុប្បន្នចិនកំពុងគ្រប់គ្រងទីផ្សារនេះ ហើយនៅពេលទឹកកករលាយ ផ្លូវទឹកកាត់តាម Greenland នឹងក្លាយជាផ្លូវពាណិជ្ជកម្មដ៏មមាញឹកបំផុតរវាងអាស៊ី និងអឺរ៉ុប៕

អត្ថបទ៖ សុខ សុវណ្ណ