វៀតណាមគ្រោងខ្ចីប្រាក់បរទេស ៥,៥ ប៊ីលាន​ដុល្លារ សម្រាប់អភិវឌ្ឍហេដ្ឋារចនាសម្ព័ន្ធឆ្នាំ ២០២៦

វៀតណាមគ្រោង​ខ្ចីប្រាក់ជាង ៥,៥ ប៊ីលានដុល្លារអាមេរិកពី​បរទេសនៅឆ្នាំ ២០២៦ នេះ ​ដើម្បីយកទៅប្រើប្រាស់សម្រាប់គម្រោងអភិវឌ្ឍន៍ហេដ្ឋារចនាសម្ព័ន្ធសំខាន់ៗរបស់ប្រទេស ខណៈការបញ្ចេញថវិកាប្រើប្រាស់កម្ចីពីបរទេសថយចុះយឺតយ៉ាវ។ ​នេះបើតាមការចុះផ្សាយរបស់កាសែត Tuoi Tre កាលពីថ្ងៃអាទិត្យ។

ថ្លែង​ក្នុងកិច្ចប្រជុំគណៈកម្មាធិការដឹកនាំជាតិស្តីពីជំនួយអភិវឌ្ឍន៍ផ្លូវការ (ODA) និងប្រាក់កម្ចីសម្បទាននៅទីក្រុងហាណូយ កាលពីថ្ងៃសុក្រ សប្ដាហ៍មុន អនុរដ្ឋមន្ត្រីក្រសួងហិរញ្ញវត្ថុ លោក Tran Quoc Phuong បាន​ថ្លែងថា ជំនួយអភិវឌ្ឍន៍ផ្លូវការ (ODA) និងប្រាក់កម្ចីសម្បទានពីបរទេស នឹងបន្តដើរតួនាទីយ៉ាងសំខាន់ក្នុងការវិនិយោគអភិវឌ្ឍន៍រួមរបស់​វៀតណាម។

ពាក់ព័ន្ធនឹង​ការបែងចែកមូលធនបរទេស វៀតណាម​នឹង​ឱ្យអាទិភាពលើគម្រោងធំៗ រួមទាំងការអភិវឌ្ឍហេដ្ឋារចនាសម្ព័ន្ធ ដែលនឹង​រួមចំណែកសំខាន់ដល់កំណើនសេដ្ឋកិច្ច។ ​

លោក​ Phuong បាន​គូសបញ្ជាក់ថា កាលពីខែធ្នូ ឆ្នាំមុន វៀតណាម​បាន​បើកការសាងសង់ និងសម្ភោធគម្រោងហេដ្ឋារចនាសម្ព័ន្ធចំនួន ២៣៤ ជាមួយនឹង​ការវិនិយោគសរុប ១២៩,៣ ប៊ីលាន​ដុល្លារ ដោយ ១៨% ក្នុងនោះបាន​មូលនិធិពីរដ្ឋ និងនៅសល់ប៉ុន្មាន បាន​មកពីវិស័យឯកជន និងប្រភព​ផ្សេងៗ។ ​

សម្រាប់ឆ្នាំ ២០២៦ នេះ វៀតណាមមានគម្រោងខ្ចីប្រាក់ប្រមាណ ​៥,៥៦ ​ប៊ីលានដុល្លារអាមេរិក ​ពីប្រភពផ្ដល់ប្រាក់កម្ចីបរទេស ដើម្បីផ្តល់ហិរញ្ញប្បទានដល់គម្រោងហេដ្ឋារចនាសម្ព័ន្ធជាតិសំខាន់ៗ។ យ៉ាងណាមិញ លោក​ Phuong បាននិយាយថា ការបញ្ចេញមូលនិធិបរទេសមានភាពយឺតយ៉ាវ។

នៅឆ្នាំ ២០២៥ ​វៀតណាមទទួលបានជំនួយ​ ODA​ និងប្រាក់កម្ចីសម្បទានចំនួន ៦២៤ លានដុល្លារអាមេរិកសម្រាប់គម្រោងចំនួន ១០ ដែលស្រដៀងគ្នានឹងឆ្នាំមុន។ ប៉ុន្តែមានតែ ៣៥,២៧% នៃប្រាក់នេះប៉ុណ្ណោះ ដែល​បាន​បញ្ចេញប្រើប្រាស់ ពោលគឺទាបជាងឆ្នាំ ២០២៤។

លោក Phuong បាននិយាយថា ការថយចុះនៃការបញ្ចេញមូលនិធិនេះ បណ្តាលមកពីភាពយឺតយ៉ាវនៃការរៀបចំគម្រោង​ ការឈូសឆាយដី និង​ទូទាត់សំណងផលប៉ះពាល់ ការកំណត់តម្លៃដីធ្លី និងដំណើរការអនុម័ត​ផ្សេងៗ។ ក្រៅពីនេះ បញ្ហាផ្សេងៗទៀតក៏រួមចំណែកផងដែរ ដូចជា កង្វះខាតសម្ភារៈសំណង់ ​កំណើន​នៃថ្លៃដើម​ និងផលប៉ះពាល់នៃព្រឹត្តិការណ៍​ធាតុអាកាសអាក្រក់ គ្រោះមហន្តរាយធម្មជាតិ ព្យុះ ទឹកជំនន់ និងការរអិលបាក់ដីនៅតំបន់មួយចំនួនជាដើម៕

​