អង់គ្លេសអនុម័តគម្រោងសង់ស្ថានទូតចិន​ដ៏ធំ​បំផុត​នៅ​អឺរ៉ុប ទោះមានក្តីបារម្ភផ្នែកសន្តិសុខជាតិ

រដ្ឋាភិបាលចក្រភពអង់គ្លេស បានសម្រេចផ្តល់ការអនុញ្ញាតជាផ្លូវការដល់ប្រទេសចិន ក្នុងការសាងសង់ស្ថានទូតដ៏ធំបំផុតរបស់ខ្លួនប្រចាំតំបន់អឺរ៉ុប នៅលើទីតាំងប្រវត្តិសាស្ត្រ Royal Mint Court ក្បែរតំបន់ Tower of London។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោង​តាម Al Jazeera លោក Steve Reed រដ្ឋមន្ត្រីក្រសួងលំនៅដ្ឋាន បានសម្រេចផ្តល់ការអនុញ្ញាត​ឲ្យ​សាងសង់កាលពីថ្ងៃអង្គារ​ទី​២០​ខែ​មករា​ឆ្នាំ​២០២៦ បន្ទាប់​ពី​គម្រោង​នេះ​​ត្រូវបានបដិសេធដោយក្រុមប្រឹក្សាមូលដ្ឋានក្នុងឆ្នាំ​២០២២ ដោយសារកង្វល់អំពីសុវត្ថិភាព និងសន្តិសុខ ទោះ​ទីក្រុងប៉េកាំងបានទិញដីនោះតាំង​ឆ្នាំ២០១៨​ក៏ដោយ។ ការបើក​ភ្លើង​បៃតង​លើក​នេះ ធ្វើ​ឡើងស្របពេលដែលលោកនាយករដ្ឋមន្ត្រី Keir Starmer កំពុងត្រៀមលក្ខណៈសម្រាប់ដំណើរទស្សនកិច្ចទៅកាន់ទីក្រុងប៉េកាំងនាចុងខែមករា​នេះ ដែលជាដំណើរទស្សនកិច្ចលើកដំបូងបង្អស់របស់មេដឹកនាំអង់គ្លេសទៅកាន់ប្រទេសចិន គិតចាប់តាំងពីឆ្នាំ២០១៨មក។

រដ្ឋាភិបាល​អង់គ្លេស បានអះអាងថា សេចក្តីសម្រេចនេះត្រូវបានធ្វើឡើងបន្ទាប់ពីមានការត្រួតពិនិត្យយ៉ាងហ្មត់ចត់លើពិធីសារសន្តិសុខជាតិ ដើម្បីកាត់បន្ថយហានិភ័យដែលអាចកើតមាន។

ទោះបីជាមានការយល់ព្រមពីថ្នាក់ជាតិក៏ដោយ គម្រោងស្ថានទូត​យក្ស​របស់​ចិន​នៅតែប្រឈមមុខនឹងការទាស់ទែងផ្ទៃក្នុងយ៉ាងខ្លាំងពីសំណាក់សមាជិកសភានីតិកាល​អង់គ្លេស អ្នកស្រុកក្នុងតំបន់ និងសកម្មជនប្រជាធិបតេយ្យហុងកុង ដែលបានលើកឡើងពីកង្វល់អំពីបញ្ហាចារកម្ម និងការធ្វើទុក្ខបុកម្នេញលើក្រុមអ្នកប្រឆាំងនយោបាយ។ ក្រុមអ្នករិះគន់បានលើកឡើងថា មជ្ឈមណ្ឌលដ៏ធំស្កឹមស្កៃនេះអាចនឹងក្លាយជាមូលដ្ឋានសម្រាប់ប្រតិបត្តិការចារកម្ម ជាពិសេសបន្ទាប់ពីមានការព្រមាននាពេលថ្មីៗនេះពីទីភ្នាក់ងារសន្តិសុខ MI5 អំពីការប៉ុនប៉ងរបស់ភ្នាក់ងាររដ្ឋចិនក្នុងការជ្រៀតជ្រែកនយោបាយ៕

ប្រែសម្រួល៖ ឈាង