កីឡា

មិនសូវមានអ្នកដឹងតែលោក ប៉ាល់ ជីវ័ន ជាស្ថាបនិកបណ្ដុះធនធានតេក្វាន់ដូ ITF រាប់រយអ្នកមកហើយ

បានផុស

៦ ខែ មុន

នៅ

ថ្ងៃពុធ ២១ មករា ២០២៦

ដោយ

តេក្វាន់ដូ ITF គឺជាកីឡាមួយប្រភេទដែលមានភាពរីកចម្រើនខ្លាំង និងសំបូរធនធាននៅកម្ពុជានាពេលបច្ចុប្បន្ននេះ ខណៈក្នុងមជ្ឈដ្ឋានកីឡាតាំងពីថ្នាក់ដឹកនាំ និងបណ្ដាសហព័ន្ធកីឡាជាតិផ្សេងៗតែងតែសរសើរអំពីគុណភាព វិន័យ។ ការអភិវឌ្ឍន៍ និងភាពរីកចម្រើនរបស់សហព័ន្ធកីឡាមួយនេះក៏ជាការរួមចំណែករបស់លោក ប៉ាល់ ជីវ័ន មួយផ្នែកផងដែរដែលជាស្ថាបនិកបណ្ដុះធនធានកីឡាករបានជាច្រើនជំនាន់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ប៉ាល់ ជីវ័ន (រូបភាពហ្វេសបុកលោក ជីវ័ន)

លោក ប៉ាល់ ជីវ័ន ដែលជាគ្រូជម្រើសជាតិតេក្ដាន់ដូ ITF កម្ពុជា បានឲ្យដឹងថា លោកចាប់ផ្ដើមចេញបង្ហាត់សិស្សតាមសាលាឯកជនតាំងពីឆ្នាំ២០០១ រហូតដល់ពេលបច្ចុប្បន្ននេះ។ ការបង្ហាត់គឺបានច្រើនជំនាន់មកហើយតាំងពីមុនលោកជាប់ជាគ្រូជម្រើសជាតិទៅទៀត។

អតីតម្ចាស់មេដាយមាសពិភពលោកនៅប្រទេសប៊ុលហ្គារីរូបនេះបន្តទៀតថា សិស្សដែលលោកបានបង្ហាត់បង្រៀនតេក្វាន់ដូ ITF នេះពីមួយជំនាន់ទៅមួយចំនួនគឺមានចំនួនច្រើនរហូតអ្នកខ្លះវិវត្តន៍ខ្លួនក្លាយជាគ្រូបង្វឹក និងខ្លះទៀតជាប់ជាកីឡាករ កីឡាការិនីជម្រើសជាតិសាងស្នាដៃជូនប្រទេសជាតិមកជាច្រើន។ ក្រៅពីនេះមួយចំនួនទៀតក៏ក្លាយជាកងកម្លាំងប្រដាប់អាវុធបំពេញការងារតាមស្ថាប័នផ្សេងៗទៀតផង។

លោក ប៉ាល់ ជីវ័ន (រូបភាពហ្វេសបុកលោក ជីវ័ន)

នាពេលបច្ចុប្បន្ននេះគឺលោកនៅតែបណ្ដុះយុវជនថ្នាលក្មេងៗនៅក្លឹបយុវជនរបស់លោកជារៀងរាល់ថ្ងៃសៅរ៍-អាទិត្យដដែលដែលមានចំនួនប្រហែលជិត ១០០នាក់ឯណោះ។ ចំនួននេះមិនរាប់សិស្សធំៗមួយចំនួនត្រូវផ្ទេរទៅហ្វឹកហាត់ជាមួយលោក ស៊ុម គង់ហេង ដែលជាក្លឹបដៃគូសហការផង។

លោក ប៉ាល់ ជីវ័ន (រូបភាពហ្វេសបុកលោក ជីវ័ន)

ដូច្នេះការចំណាយពេលស្ទើរពាក់កណ្ដាល នៃជីវិតរបស់លោក ប៉ាល់ ជីវ័ន កន្លងទៅនេះគឺជាចំណែកធំមួយក្នុងការអភវិឌ្ឍន៍ធនធានដែលមានគុណភាពជាច្រើននាក់របស់សហព័ន្ធតេក្វាន់ដូ ITF កម្ពុជា។ ក្រោមការដឹកនាំដោយប៉ិនប្រសព្វរបស់លោក កែវ រ៉េមី ប្រធានសហព័ន្ធ រួមទាំងគ្រូបង្ហាត់ល្អៗ និងសំបូរក្លឹបតាមបណ្ដារាជធានី-ខេត្ត ផងនោះទើបកីឡាតេក្វាន់ដូ ITF មានភាពរីកចម្រើនខ្លាំង និងនាំមោទកភាពជាខ្លាំងជូនប្រទេសកម្ពុជាលើឆាកអន្តរជាតិនាពេលកន្លងទៅនេះ។

លោក ប៉ាល់ ជីវ័ន (រូបភាពហ្វេសបុកលោក ជីវ័ន)

បញ្ជាក់ដែរថា លោក ប៉ាល់ ជីវ័ន ជាអតីតកីឡាករតេក្វាន់ដូ ITF ចាស់វស្សា និងបានហ្វឹកហាត់កីឡាមួយនេះតាំងពីវ័យជាង ១០ឆ្នាំមកម្ល៉េះ។ បច្ចុប្បន្នលោកមានវ័យជាង ៤០ឆ្នាំទៅហើយ និងកំពុងជាគ្រូជម្រើសជាតិផងដែរ។ លោកជាអតីតជើងខ្លាំងតែមួយរូបគត់របស់តេក្វាន់ដូ ITF កម្ពុជា ដែលធ្លាប់ឈ្នះមេដាយអន្តរជាតិគ្រប់កម្រិតទាំងអស់គឺមេដាយមាសពិភពលោក មេដាយមាស ជើងឯកអាស៊ី និងមេដាយមាស ជើងឯកអាស៊ីអាគ្នេយ៍ និងមេដាយសរុបមេដាយជាច្រើនគ្រឿងទៀតក្នុងអាជីពជិត ៣០ឆ្នាំមកនេះ។ លោក ប៉ាល់ ជីវ័ន គឺខ្លាំងទាំងវិញ្ញាសាមេគុន បច្ចេកទេសពិសេស និងប្រយុទ្ធ៕