សេដ្ឋកិច្ច

ផលិតផលទឹកត្រចៀកកាំផលិតក្នុងស្រុកកំពុងមានវត្តមានលើផ្សារទំនើប

បានផុស

៣ ខែ មុន

នៅ

ថ្ងៃព្រហស្បតិ៍ ២៩ មករា ២០២៦

ដោយ

ផលិតផលទឹកត្រចៀកដែលផលិតក្នុងស្រុកកំពុងទទួលបានការគាំទ្រពីសំណាក់ប្រជាជនខ្មែរ ខណៈបច្ចុប្បន្នក៏មានដាក់លក់នៅតាមបណ្ដាផ្សារទំនើបក្នុងប្រទេសកម្ពុជា។

លោក ញ៉ែម ប៊ុនថា ជាម្ចាស់អាជីវកម្មផ្ទះអភិរក្សសត្វត្រចៀកកាំ ប្រាប់ កម្ពុជាថ្មី ថា ផលិតផលទឹកត្រចៀករបស់លោកបច្ចុប្បន្នកំពុងទទួលបានការគាំទ្រខ្លាំង ខណៈលោកក៏មានផ្ទះអភិរក្សសត្វត្រចៀកកាំ និងមានកន្លែងកែច្នៃសំបុកត្រចៀកកាំឱ្យទៅជាផលិតផលសម្រេចសម្រាប់ដាក់លក់លើទីផ្សារ។

លោក ប៊ុនថា បានឱ្យដឹងថា មួយរយៈដែលប្រជាជនកម្ពុជាពហិការទំនិញរបស់ថៃ លោកមើលឃើញថា នៅតាមបណ្ដាផ្សារទំនើប និងផ្សារផ្សេងៗទៀត ភាគច្រើនក៏មានទំនិញ ឬផលិតផលខ្មែរ ក៏កំពុងតែបានដាក់លក់ជាហូរហែ ជាពិសេសកំពុងទទួលបានការគាំទ្រពីសំណាក់ប្រជាជនខ្មែរជាច្រើន ផងដែរ។

ដោយមើលឃើញពីឱកាសល្អក្នុងការចាប់យកទីផ្សារ លោក ញ៉ែម ប៊ុនថា ក៏បានចាប់យករបរបន្ថែមមួយទៀតដោយចាប់ផ្ដើមផលិតទឹកត្រចៀកកាំសម្រាប់ផ្គត់ផ្គង់ទៅកាន់ផ្សារទំនើបដើម្បីធ្វើយ៉ាងណាអាចឱ្យខ្មែរអាចមានផលិតផលដែលផលិតបានក្នុងស្រុក និងកាត់បន្ថយការនាំចូលពីប្រទេសជិតខាង។

យ៉ាងណាមិញ លោក ស៊ុយ កុកធាន ប្រធានសមាគមត្រចៀកកាំកម្ពុជា ប្រាប់ កម្ពុជាថ្មី កាលពីថ្ងៃទី ២៧ ខែមករានេះដែរថា ក្រសួងកសិកម្ម បានចុះបញ្ជីផ្ទះត្រចៀកកាំប្រមាណ ១០០០ ខ្នង និងបានរៀបចំក្រុមហ៊ុននាំចេញចំនួន ៦ ដើម្បីសម្របសម្រួលជាមួយគយចិន ក្នុងការពិនិត្យ និងសម្រេច លើការនាំចេញសំបុកត្រចៀកកាំដោយផ្ទាល់ទៅចិន។

លោក ស៊ុយ កុកធាន យល់ឃើញថា៖ «ដំណើរការនេះ ជាសញ្ញាល្អក្នុងការចាប់ផ្ដើម គ្រាន់តែថា ធ្វើយ៉ាងណា សំណូមពរក្រសួងជំរុញឱ្យបានលឿន ពីព្រោះអ្នកចិញ្ចឹមកំពុងទន្ទឹងរង់ចាំ»។

ចិនបានសម្រេចអនុញ្ញាតឱ្យកម្ពុជានាំចូលសំបុកត្រចៀកកាំដោយផ្ទាល់ ក្នុងដំណើរទស្សនកិច្ចរបស់លោកប្រធានាធិបតី ស៊ី ជិនពីង កាលពីខែមេសា ឆ្នាំ ២០២៥។

គួរឱ្យដឹងថា តម្លៃទីផ្សារសំបុកត្រចៀកកាំកម្ពុជាបច្ចុប្បន្ន កើនឡើងបន្តិចប្រមាណ ៣០០ ដុល្លារ ក្នុងមួយគីឡូក្រាម ហើយសំបុកល្អលេខ ១ ប្រមាណ ៥០០ ដុល្លារ ក្នុងមួយគីឡូក្រាម។ តាមការប៉ាន់ស្មាន កម្ពុជាមានសមត្ថភាពផលិតសំបុកត្រចៀកកាំប្រមាណ ១០០ តោន ក្នុងមួយឆ្នាំ៕

អត្ថបទ ៖ សួស សិត