វិនិយោគិននូវែលហ្សេឡង់ ចាប់អារម្មណ៍ផលិតកម្មកែច្នៃរបស់ក្រុមហ៊ុនក្នុងស្រុក២

វិនិយោគិន​នូវែលហ្សេឡង់ បាន​បង្ហាញ​ការ​ចាប់​អារម្មណ៍​​ផលិត​កម្ម​កែច្នៃ​ដែលជា​ផលិត​ផល​កសិ-ឧស្សាហកម្ម​ដ៏​មាន​សក្តានុពល​​ក្នុង​ក្រុមហ៊ុនធំៗ​ចំនួន ២ នៅ​កម្ពុជា​ ត្រៀមនាំ​ចេញ​ទៅលក់​នៅលើ​ទីផ្សារ​របស់​ខ្លួន​។

ក្នុងគោលបំណងជំរុញវិស័យពាណិជ្ជកម្ម និងព​ង្រីក​ទីផ្សារ​ផលិតផល​ខ្មែរទៅកាន់ឆាកអន្តរជាតិ លោក កៅ ថាច ប្រតិភូរាជរដ្ឋាភិបាល ទទួលបន្ទុក​ជា​អគ្គនាយក​ធនាគារ​អភិវឌ្ឍន៍ជនបទ និងកសិកម្ម (ARDB) បាន​ដឹកនាំគណៈប្រតិភូវិនិយោគិន​ពីប្រទេសនូវែលហ្សេឡង់ ចុះទស្សន​កិច្ចសិក្សា​ដោយ​ផ្ទាល់នៅ​ក្រុមហ៊ុនឈាន​មុខគេ​ចំនួន ២ នៅ​កម្ពុជា គឺ​ក្រុម​ហ៊ុន​ ហនុមាន (Hanuman Beverages) និង​គីរីរម្យ ហ៊្វូត ប្រដាក់សិន (Kirirom Food Production)។

បើតាមលោក កៅ ថាច បានឱ្យ​ដឹងថា ដំណើរទស្សនកិច្ចដ៏​សំខាន់​របស់​វិនិយោគិន​នូវែលហ្សេឡង់​នេះ ផ្តោត​ជា​សំខាន់​លើ​ការយក​ចិត្តទុកដាក់​ពិនិត្យ​ខ្សែច្រវាក់ផលិតកម្ម និងស្តង់ដារគុណភាពនៅ ក្រុមហ៊ុន ហនុមាន (Hanuman Beverages)​ដោយ​​គណៈប្រតិភូ​បាន​ចូលទស្សនាខ្សែច្រវាក់ផលិតកម្មដ៏ទំនើបរបស់រោងចក្រ ដើម្បីស្វែងយល់ពីបច្ចេកវិទ្យាផលិត គុណភាព និងរសជាតិនៃស្រាបៀរ និងភេសជ្ជៈ ដែលជាមោទកភាពនៃផលិតផលក្នុងស្រុក។

ដោយ​ឡែក​នៅ​ក្រុមហ៊ុន គីរីរម្យ ហ៊្វូត ប្រដាក់សិន (Kirirom Food Production) គណៈប្រតិភូ ក៏​បានពិនិត្យ​យ៉ាង​ហ្មត់ចត់​លើ​ដំណើរ​ការកែច្នៃ និងវេចខ្ចប់ «តំណាប់ស្វាយកែវរមៀតខ្មែរ» ដែលជាផលិតផលកសិ-ឧស្សាហកម្ម​ដ៏មានសក្តានុពល ដោយផ្តោតលើអនាម័យ និងស្តង់ដារសុវត្ថិភាពចំណីអាហារ។

លោក កៅ ថាច បាន​មាន​ប្រសាសន៍បន្ត​ថា ដំណើរ​ទស្សនកិច្ច​របស់​វិនិយោគិន​នូវែលហ្សេឡង់​នេះ​មិនត្រឹម​តែ​ជា​ការ​ស្វែង​យល់​ប៉ុណ្ណោះ​ទេ ប៉ុន្តែជា​ការបើក​ទំព័រថ្មីនៃកិច្ចសហប្រតិបត្តិការធុរកិច្ច។

ជាមួយគ្នានេះ លោក បាន​បញ្ជាក់​ថា គោលបំណងស្នូលរបស់ក្រុមវិនិយោគិននូវែលហ្សេឡង់ នៃការ​ចុះ​ពិនិត្យ​លើ​ក្រុមហ៊ុន​របស់​ខ្មែរ​នេះ គឺ​ធ្វើការ​វាយតម្លៃលើសមត្ថភាពផ្គត់ផ្គង់ និងស្តង់ដារគុណភាព ដើម្បីពិនិត្យលទ្ធភាព និងអាច​ឈាន​ទៅ​រក​ការចុះកិច្ចព្រមព្រៀងនាំយកផលិតផលខ្មែរដ៏មានគុណភាពទាំងនេះ ទៅចែកចាយ និងដាក់​លក់នៅ​លើទីផ្សារ​ប្រទេស​នូវែលហ្សេឡង់ ដែលជាជំហានដ៏វិជ្ជមានមួយក្នុងការលើកកម្ពស់កិត្យានុភាពផលិតផល «Made in Cambodia»៕