កម្ពុជា និងអូស្រ្តាលី បញ្ជាក់ជាថ្មីពីការប្ដេជ្ញាចិត្តចំពោះការរឹតចំណងទាក់ទងឱ្យកាន់តែរឹងមាំ

រដ្ឋមន្ត្រីការបរទេស​ លោក ប្រាក់ សុខុន ទទួលជួបពិភាក្សាការងារជាមួយលោក ដេរិក យីប ឯកអគ្គរដ្ឋទូតអូស្ត្រាលីប្រចាំកម្ពុជា ដោយភាគីទាំងពីរ បានបញ្ជាក់ជាថ្មីពីការប្ដេជ្ញាចិត្តធ្វើការឱ្យកាន់តែជិតស្និទ្ធ ដើម្បីពង្រឹងពង្រីកនូវទំនាក់ទំនង និងកិច្ចសហប្រតិបត្តិការជាទ្វេភាគីប្រទេសទាំងពីរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នោក្នុងជំនួបកាលពីថ្ងៃទី៥ ខែកុម្ភៈ ឆ្នាំ២០២៦ នៅទីស្ដីការក្រសួង ក្នុងរាជធានីភ្នំពេញ ឧបនាយករដ្ឋមន្ត្រីកម្ពុជា និងជារដ្ឋមន្ត្រីការបរទេស លោក ប្រាក់ សុខុន បានសម្តែងការពេញចិត្តចំពោះការរីកចម្រើនទំនាក់ទំនងយូរអង្វែងរវាងប្រទេសទាំងពីរ និងបានចាត់ទុកអូស្ត្រាលីជាដៃគូគួរឱ្យទុកចិត្ត ដែលបានឆ្លុះបញ្ចាំងតាមរយៈកិច្ចសហប្រតិបត្តិការប្រកបដោយផ្លែផ្ការវាងកម្ពុជា និងអូស្ត្រាលី លើវិស័យនានាដែលផ្តល់ផលប្រយោជន៍ទៅវិញទៅមក រួមមានពាណិជ្ជកម្ម និងវិនិយោគ ការពារជាតិ និងសន្តិសុខ អប់រំ និងការប្រាស្រ័យទាក់ទងរវាងប្រជាជននិងប្រជាជន។

លោករដ្ឋមន្ត្រីការបរទេស បានគូសបញ្ជាក់ពីសារៈសំខាន់នៃការផ្លាស់ប្តូរទស្សនកិច្ចថ្នាក់ដឹកនាំនៃប្រទេសទាំងពីរ និងការរៀបចំកិច្ចពិគ្រោះយោបល់ថ្នាក់ឧត្តមមន្ត្រីជាទៀងទាត់ ដែលជាយន្តការដ៏មានសារៈសំខាន់ក្នុងការពង្រឹងពង្រីកកិច្ចសហប្រតិបត្តិការបន្ថែមទៀត ក៏ដូចជាលើកកម្ពស់ភាពជាដៃគូឈានឡើងមួយកម្រិតថែមទៀត។

លោក ដេរិក យីប (Derek Yip) ឯកអគ្គរដ្ឋទូតអូស្ត្រាលីប្រចាំកម្ពុជា បានវាយតម្លៃខ្ពស់ចំពោះកិច្ចសហប្រតិបត្តិការល្អរវាងប្រទេសទាំងពីរកន្លងមក ហើយជាពិសេសលោកបានលើកឡើងពីសមិទ្ធផលដែលសម្រេចបានរបស់រាជរដ្ឋាភិបាលកម្ពុជា ក្នុងការប្រយុទ្ធប្រឆាំងបទល្មើសឆបោកតាមប្រព័ន្ធបច្ចេកវិទ្យា។ លោកឯកអគ្គរដ្ឋទូត បានបញ្ជាក់ជាថ្មីពីការប្តេជ្ញាចិត្តបន្តធ្វើការយ៉ាងជិតស្និទ្ធជាមួយស្ថាប័នពាក់ព័ន្ធកម្ពុជា ដើម្បីសម្រេចបាននូវសមិទ្ធផលថ្មីៗបន្ថែមទៀត ក្នុងអាណត្តិបេសកកម្មការទូតរបស់លោកនៅកម្ពុជា៕