ហ្វីលីពីនបង្កើនការជួបប្រចាំខែ ដើម្បីឆាប់បញ្ចប់ក្រមប្រតិបត្តិសមុទ្រចិនខាងត្បូងមុន​ដាច់​ឆ្នាំនេះ​

ក្នុងនាមជាម្ចាស់ផ្ទះអាស៊ានឆ្នាំ​២០២៦ ហ្វីលីពីនបានដាក់ចេញនូវ «យុទ្ធសាស្ត្របង្កើនល្បឿន» ដើម្បីបញ្ចប់ការចរចាក្រមប្រតិបត្តិសមុទ្រចិនខាងត្បូង (COC) ដែលបានអូសបន្លាយពេលជិត ២ទសវត្សរ៍មកហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោង​តាម​សារព័ត៌មាន CNA លោកស្រី Theresa Lazaro រដ្ឋមន្ត្រី​ក្រសួងការបរទេសហ្វីលីពីន បានប្រកាសនៅឯវេទិកាមួយក្នុងប្រទេសសិង្ហបុរី​នា​ថ្ងៃ​សុក្រ​ទី​៦​ខែ​កុម្ភៈ​ឆ្នាំ​២០២៦​នេះ​ថា អាស៊ាន និងចិនបានព្រមព្រៀងគ្នាប្តូរពីការជួបគ្នា ៣ខែម្តង មកជាការជួបគ្នា​រៀងរាល់ខែ​វិញ ដើម្បីដោះស្រាយចំណុចរសើបដែលនៅសេសសល់​ឲ្យ​បានមុនដំណាច់ឆ្នាំនេះ។ ការផ្លាស់ប្តូរនេះធ្វើឡើងដើម្បីឆ្លើយតបទៅនឹងការប៉ះទង្គិចគ្នាកាន់តែខ្លាំងនៅតំបន់សមុទ្រ ដែលទាមទារឲ្យមានក្រមប្រតិបត្តិមួយមានប្រសិទ្ធភាព និងស្របតាមច្បាប់អន្តរជាតិ (UNCLOS)។

ទោះជាយ៉ាងណា ផ្លូវឆ្ពោះទៅរកកិច្ចព្រមព្រៀងចុងក្រោយនៅតែមានឧបសគ្គធំៗចំនួន៤ ដែលហៅថា «ចំណុចរបត់សំខាន់» រួមមាន៖ ឋានៈគតិយុត្តនៃក្រមប្រតិបត្តិ (ថាតើត្រូវចងកាតព្វកិច្ចច្បាប់ដែរឬទេ) វិសាលភាពភូមិសាស្ត្រដែលត្រូវគ្របដណ្តប់ និយមន័យនៃ«ការអត់ធ្មត់ខ្ពស់» និងទំនាក់ទំនងរវាងក្រមថ្មីនេះជាមួយនឹងសេចក្តីថ្លែងការណ៍ចាស់ (DOC)។ ហ្វីលីពីនសង្ឃឹមថា ភាពញឹកញាប់នៃកិច្ចប្រជុំនឹងជួយ​ឲ្យ​ភាគីទាំងអស់ រួមទាំងចិន វៀតណាម ម៉ាឡេស៊ី និងព្រុយណេ អាចឈានទៅរកការឯកភាពគ្នាជាធ្លុងមួយ ដើម្បីធានាបាននូវសន្តិភាព និងស្ថិរភាពនៅក្នុងផ្លូវទឹកដ៏សំខាន់បំផុតមួយរបស់ពិភពលោកនេះ៕

ប្រែសម្រួល៖ ឈាង