ឆេះទីតាំងស្តុកទុយោសម្រាប់រំដោះទឹកកខ្វក់ នៅក្រុងបាត់ដំបង ខូចខាតគិតជាទឹកប្រាក់ប្រហែល ២ លានដុល្លារ

ទីតាំងស្តុកទុយោសម្រាប់រំដោះទឹកកង្វក់មួយកន្លែង ត្រូវបានអគ្គិភ័យលេបត្របាក់បំផ្លាញគ្មានសល់ គិតជាទឹកប្រាក់ខាតបង់រាប់លានដុល្លារផងដែរ ទុយោទាំងនេះជារបស់ក្រុមហ៊ុនម៉ៅ គិរីដងរែក សម្រាប់តភ្ជាប់រំដោះទឹកកខ្វក់ចេញពីក្រុងបាត់ដំបងទាំងមូល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍ដ៏រន្ធត់និងមានអណ្ដាតភ្លើងពេញផ្ទៃមេឃនោះបានកើតឡើងនៅវេលាម៉ោង ៥ ល្ងាច កាលពីថ្ងៃទី ៦ ខែកុម្ភៈ ឆ្នាំ ២០២៦  នៅត្រង់ចំណុចភូមិចំការសំរោង១ សង្កាត់ចំការសំរោង ក្រុងបាត់ដំបង។

បើតាមសាក្សីនៅកន្លែងកើតហេតុបានបញ្ជាក់ថា ការឆាបឆេះនេះ គេមិនទាន់ដឹងអំពីមូលហេតុនៅឡើយទេ ដោយគ្រាន់តែដឹងថា ពេលដែលចាប់ផ្ដើមឆាបឆេះដំបូងគឺមានរថយន្តរបស់ក្រុមហ៊ុនចំនួន ២ គ្រឿង បានចូលទៅបាញ់ពន្លត់ប៉ុន្តែមិនអាចទប់ទល់និងសភាពការណ៍បាន ដោយសារតែអណ្ដាតភ្លើងកាន់តែឆាប់ឆេះខ្លាំងឡើង ទើបហៅរថយន្តពន្លត់អគ្គីភ័យរបស់ស្នងការដ្ឋាននគរបាលខេត្ត មកជួយអន្តរាគមន៍ ប៉ុន្តែអ្វីៗបានហួសពេលទៅហើយព្រោះរថយន្តពន្លត់អគ្គីភ័យមិនអាចចូលទៅក្បែរបាន ដោយសារតែផ្សែងនិងអណ្ដាតភ្លើងខ្មួលខ្មាញ់ខ្លាំងពេក ដោយនៅក្នុងពេលប្រតិបត្តិការនោះមន្ត្រីអគ្គីភ័យដែលចូលបានពន្លត់ ក៏បានរងរបួសមួយចំនួនដោយសារពុលនិងផ្សែង។ តាមការប៉ាន់ស្មានជាបឋមរបស់សមត្ថកិច្ចគឺ សម្ភារខូចខាត មានតែទុយោប៉ុណ្ណោះ ដោយអស់ប្រហែល២.០០០.០០០ ( ពីរលានដុល្លាអាមេរិក)

នៅក្នុងហេតុការណ៍គ្រោះថ្នាក់អគ្គិភ័យនេះ ត្រូវបានកម្លាំងការិយាល័យនគរបាល បង្ការពន្លត់អគ្គិភ័យ និង សង្រ្គោះ នៃស្នងការដ្ឋាននគរបាលខេត្តបាត់ដំបង ចេញរថយន្តចំនួន ០៧ គ្រឿងរថយន្តរបស់ក្រុមហ៊ុនចំនួន០២គ្រឿង ដោយប្រើប្រាស់ទឹក អស់ចំនួន១៦រថយន្ត ទើបគ្រប់គ្រងមិនឲ្យឆេះរាលដាលទៅដល់ផ្ទះប្រជាពលរដ្ឋ ចំពោះមូលហេតុនៃការឆាបឆេះសមត្ថកិច្ចកំពុងធើ្វការស្រាវជ្រាវ៕ អត្ថបទ ៖ សោ និយមរ័ត្ន