ព័ត៌មានអន្ដរជាតិ

បារាំងជំរុញឱ្យបណ្តាប្រទេសអឺរ៉ុប ផ្តោតលើអំណាចភូមិសាស្រ្តនយោបាយក្នុងតំបន់

បានផុស

២ ខែ មុន

នៅ

ថ្ងៃសៅរ៍ ១៤ កុម្ភៈ ២០២៦

ដោយ

ប្រធានាធិបតីបារាំងជំរុញឱ្យអឺរ៉ុបបង្វែរការផ្តោតអារម្មណ៍លើអំណាចភូមិសាស្ត្រនយោបាយ គិតយុទ្ធសាស្ត្ររយៈពេលវែង បង្កើតសមត្ថភាពលើការវាយប្រហារស៊ីជម្រៅ និងពីរបៀបទប់ស្កាត់នុយក្លេអ៊ែររបស់បារាំងដែលអាចធានាសន្តិសុខនាពេលអនាគតក្នុងតំបន់។

យោងតាមរ៉យទ័រ នៅថ្ងៃទី១៤ ខែកុម្ភៈ ប្រធានាធិបតី លោក Emmanuel Macron ថ្លែងនៅក្នុងសន្និសីទសារព័ត៌មានមួយ នៅទីក្រុង Munich ច្រានចោលការចោទប្រកាន់ដែលថាអឺរ៉ុបកំពុងបែកបាក់សាមគ្គី ព្រោះតែព័ត៌មានមិនពិត និងបង្កគ្រោះថ្នាក់ដល់លទ្ធិប្រជាធិបតេយ្យនៅលោកខាងលិច។

លោក Macron និយាយថា៖ «នេះគឺជាពេលវេលាដ៏ត្រឹមត្រូវ ដើម្បីបង្ហាញភាពក្លាហាន ហើយជាពេលវេលាដ៏ត្រឹមត្រូវ សម្រាប់អឺរ៉ុបដើម្បីរឹងមាំ។ អឺរ៉ុបត្រូវតែរៀនសូត្រឱ្យក្លាយជាតំបន់មហាអំណាចភូមិសាស្ត្រនយោបាយ»។

លោក Macron បានបន្តថា អឺរ៉ុបនឹងនៅតែប្រឈមមុខនឹងរុស្ស៊ីដែលឈ្លានពាន ទោះបីជាមានកិច្ចព្រមព្រៀងលើសង្រ្គាមអ៊ុយក្រែនក៏ដោយ។

លោកបន្តថា យើងមិនអាចធ្វើតាមការទាមទាររបស់រុស្ស៊ី ឬអនុញ្ញាតឱ្យមានកិច្ចព្រមព្រៀងរយៈពេលខ្លី ដែលនឹងមិនដោះស្រាយបញ្ហាស្នូលនោះទេ។

លោកបន្ថែមថា៖ «អឺរ៉ុបត្រូវតែចាប់ផ្តើមការងារនេះ ដោយការគិតថាវាជារឿងផ្ទាល់ខ្លួន និងផលប្រយោជន៍ផ្ទាល់ខ្លួន។ ដូច្នេះសំណើរបស់ខ្ញុំថ្ងៃនេះ គឺចាប់ផ្តើមពិគ្រោះយោបល់ជាបន្តបន្ទាប់លើរឿងសំខាន់ ដែលយើងចាប់ផ្តើមជាមួយមិត្តចក្រភពអង់គ្លេស និងអាឡឺម៉ង់របស់យើង។ ប៉ុន្តែនៅក្នុងការពិគ្រោះយោបល់របស់អឺរ៉ុប ជាមួយសម្ព័ន្ធមិត្តទាំងអស់ ត្រូវតែផ្តោតលើសមត្ថភាពស៊ីជម្រៅ និងគិតយុទ្ធសាស្ត្រច្រើនឱ្យបានល្អិតល្អន់»។

លោក Macron គ្រោងនឹងថ្លែងសុន្ទរកថានៅចុងខែនេះ លោកមើលឃើញពីតួនាទីនៃការទប់ស្កាត់នុយក្លេអ៊ែររបស់បារាំងនៅក្នុងទ្វីបអឺរ៉ុប។

លោកនិយាយថា៖ «យើងត្រូវស្តារ និងរៀបចំឡើងវិញនូវស្ថាបត្យកម្មសន្តិសុខរបស់យើងនៅក្នុងទ្វីបអឺរ៉ុប។ ព្រោះស្ថាបត្យកម្មសន្តិសុខកាលពីអតីតកាលត្រូវបានធ្វើ និងរចនាឡើងទាំងស្រុងក្នុងសម័យសង្រ្គាមត្រជាក់ប៉ុណ្ណោះ។ ដូច្នេះវាលែងជួយអីបានច្រើនទៀតហើយ»៕

ប្រែសម្រួល៖ ណឺ មិនា