ព័ត៌មានអន្ដរជាតិ

គុយបាកំពុងលិចលង់ក្នុងគំនរសំរាម ដោយសារការបិទខ្ទប់ប្រេងឥន្ធនៈពីអាមេរិក

បានផុស

២ ខែ មុន

នៅ

ថ្ងៃអង្គារ ១៧ កុម្ភៈ ២០២៦

ដោយ

Chheang

បច្ចុប្បន្ន រដ្ឋធានីឡាហាវ៉ានកំពុងជួបវិបត្តិសំរាមយ៉ាងធ្ងន់ធ្ងរ ដោយសារកង្វះខាតប្រេងឥន្ធនៈ ដែលបង្កឡើងដោយការបិទខ្ទប់ការដឹកជញ្ជូនប្រេងពីសំណាក់សហរដ្ឋអាមេរិក។ នេះបើយោងតាមការផ្សាយរបស់ Strait Times នាថ្ងៃទី១៧ខែកុម្ភៈឆ្នាំ២០២៦។

ព្រោះឡានដឹកសំរាមជាង៦០%មិនអាចដំណើរការបាន ទីក្រុងនេះបានពោរពេញដោយក្លិនស្អុយរលួយ និងសម្បូរសុទ្ធតែហ្វូងរុយ ដែលកំពុងគំរាមកំហែងដល់សុខភាពសាធារណៈយ៉ាងខ្លាំង។ ប្រជាពលរដ្ឋក្នុងតំបន់បានរាយការណ៍ថា ក្នុងសង្កាត់ខ្លះ មិនមានឡានដឹកសំរាមមកយកជាង១០ថ្ងៃមកហើយ ដែលបណ្ដាលឲ្យមានគំនរសំរាមយ៉ាងច្រើនស្ទះពេញផ្លូវថ្នល់។

វិបត្តិនេះគឺជាលទ្ធផលផ្ទាល់នៃការរឹតបន្តឹងរបស់អាមេរិក ដើម្បីរារាំងមិនឲ្យប្រេងទៅដល់ប្រទេសគុយបា។ ប្រទេសវ៉េណេស៊ុយអេឡា និងម៉ិកស៊ិក ដែលធ្លាប់ជាអ្នកផ្គត់ផ្គង់ចម្បង បានបញ្ឈប់ការបញ្ជូនប្រេង បន្ទាប់ពីមានការគំរាមកំហែងពីទីក្រុងវ៉ាស៊ីនតោន។ បញ្ហានេះបានបង្ខំឲ្យរដ្ឋាភិបាលគុយបាចែករំលែកប្រេងប្រើប្រាស់ក្នុងកម្រិតតិចតួចបំផុតហើយសម្រាប់តែសេវាចាំបាច់ប៉ុណ្ណោះ។ ទោះបីជារុស្ស៊ីបានសន្យាថានឹងបញ្ជូនប្រេងក្នុងទម្រង់ជាជំនួយមនុស្សធម៌ក៏ដោយ ក៏គេនៅមិនទាន់ដឹងថ្ងៃច្បាស់ថានឹងទៅដល់នៅពេលណានៅឡើយទេ។

ក្រៅពីបញ្ហាសំរាម កង្វះប្រេងក៏កំពុងធ្វើឲ្យប្រទេសទាំងមូលជួបការលំបាកយ៉ាងខ្លាំង។ ប្រព័ន្ធដឹកជញ្ជូនសាធារណៈត្រូវបានបញ្ឈប់ ហើយមន្ទីរពេទ្យកំពុងតស៊ូដើម្បីរក្សាអគ្គិសនីសម្រាប់បន្ទប់សង្គ្រោះបន្ទាន់ និងការរក្សាវ៉ាក់សាំង។ ខណៈដែលអង្គការសហប្រជាជាតិព្រមានពីការដួលរលំផ្នែកមនុស្សធម៌ ប្រជាជនគុយបាត្រូវបានបង្ខំឲ្យដើរកកាយសំរាមតាមចិញ្ចើមថ្នល់ដើម្បីរករបស់ប្រើប្រាស់ឡើងវិញសម្រាប់ការរស់រានមានជីវិត ក្នុងស្ថានភាពដែលទីក្រុងរបស់ពួកគេប្រែជាកន្លែងផ្ទុកកាកសំណល់ដែលគ្មានអ្នកប្រមូល៕