អូទ្រីស​ចោទប្រកាន់​ជនសង្ស័យម្នាក់ ​ពី​បទ រៀបគម្រោងបំផ្ទុះប្រគំតន្ត្រី Taylor កាលឆ្នាំ២០២៤

យោងតាមការចុះផ្សាយពីភ្នាក់ងារ CNN ព្រះរាជអាជ្ញាអូទ្រីសកាលពីថ្ងៃចន្ទទី ១៦ ខែកុម្ភៈ បានសម្រេចដាក់ពាក្យបណ្តឹងទាក់ទងនឹងអំពើភេរវកម្ម ប្រឆាំងនឹងជនជាប់ចោទអាយុ ២១ ឆ្នាំម្នាក់ ដែលពួកគេនិយាយថា មានគម្រោងវាយប្រហារលើការប្រគំតន្ត្រីរបស់តារាចម្រៀងល្បីឈ្មោះ Taylor Swift នៅទីក្រុងវីយែនកាលពីខែសីហា ឆ្នាំ ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការិយាល័យព្រះរាជអាជ្ញាទីក្រុងវីយែនបាននិយាយនៅក្នុងសេចក្តីថ្លែងការណ៍មួយថា ជនជាប់ចោទដែលមិនបញ្ចេញឈ្មោះបានប្រកាសភក្ដីភាពចំពោះក្រុមរដ្ឋអ៊ីស្លាម ដោយចែករំលែកសម្ភារៈឃោសនា និងវីដេអូតាមរយៈសេវាកម្មផ្ញើសារផ្សេងៗ។

ព្រះរាជអាជ្ញាក៏បានចោទប្រកាន់ជនជាប់ចោទថា រូបគេទទួលបានការណែនាំនៅលើអ៊ីនធឺណិតដើម្បីរៀបចំបំណែកគ្រាប់បែកដោយផ្អែកលើសារធាតុផ្ទុះ triacetone triperoxide ជាធម្មតាត្រូវបានប្រើប្រាស់ដោយ IS និងបានផលិតសារធាតុផ្ទុះមួយចំនួនតូច។ ជាងនេះទៀតនោះ ជនជាប់ចោទបានប៉ុនប៉ងជាច្រើនដង ដើម្បីទិញអាវុធដោយខុសច្បាប់នៅខាងក្រៅប្រទេស និងនាំយកវាទៅកាន់ប្រទេសអូទ្រីស។

អ្នកនាំពាក្យការិយាល័យរដ្ឋអាជ្ញាសាធារណៈទីក្រុងវីយែនបានបញ្ជាក់ប្រាប់សារព័ត៌មាន The Associated Press ថា បច្ចប្បន្នជនជាប់ចោទកំពុងជាប់ឃុំឃាំងនូវឡើយ។ ប្រព័ន្ធផ្សព្វផ្សាយអូទ្រីសបានកំណត់អត្តសញ្ញាណជនសង្ស័យថាជា Beran A. ហើយបាននិយាយថា គាត់ត្រូវបានចាប់ខ្លួននៅក្នុងខែសីហា ឆ្នាំ២០២៤។

យ៉ាងណាមិញ អាជ្ញាធរអូទ្រីសបានលុបចោលកម្មវិធីសម្តែងចំនួនបីដែលបានគ្រោងទុករបស់ Taylor Swift នៅទីក្រុងវីយែន ក្នុងខែសីហា ឆ្នាំ២០២៤ បន្ទាប់ពីជណសង្ស័យប្រកាសថា ពួកគេបានរារាំងផែនការជាក់ស្តែងមួយដើម្បីកំណត់គោលដៅការសម្តែង។ មិនតែប៉ុណ្ណោះ សហរដ្ឋអាមេរិក ក៏បានផ្តល់ព័ត៌មានស៊ើបការណ៍សម្ងាត់ ដោយបានជំរុញឲ្យមានការសម្រេចចិត្តលុបចោលការប្រគំតន្ត្រីចោលភ្លាមៗដែរ។

លោក John Kirby អ្នកនាំពាក្យសន្តិសុខជាតិសេតវិមាននៅពេលនោះបាននិយាយនៅក្នុងខែសីហា ឆ្នាំ២០២៤ ថា «សហរដ្ឋអាមេរិកមានការផ្តោតអារម្មណ៍ជាប់លាប់លើបេសកកម្មប្រឆាំងភេរវកម្មរបស់យើង។ យើងធ្វើការយ៉ាងជិតស្និទ្ធជាមួយដៃគូនៅទូទាំងពិភពលោកដើម្បីតាមដាន និងរំខានដល់ការគំរាមកំហែង។ ដូច្នេះជាផ្នែកមួយនៃការងារនោះ អាមេរិកបានចែករំលែកព័ត៌មានជាមួយដៃគូអូទ្រីស ដើម្បីឲ្យអាចមានការរំខានដល់ការគំរាមកំហែងចំពោះការប្រគំតន្ត្រីរបស់ Taylor Swift នៅទីនោះក្នុងទីក្រុងវីយែន»៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

ប្រឡូកអាជីពសម្ដែងក្រៅប្រទេសជាយូរ Song Joong Ki នៅតែមិនអាចដណ្ដើមតំណែងតួឯក