ការវាយប្រហាររបស់អ៊ីស្រាអែល/អាមេរិក អាចរំខានលំហូរប្រេងអ៊ីរ៉ង់ និងធ្វើឱ្យតម្លៃប្រេងហក់ឡើង

ក្នុងជំហានធ្វើឱ្យភាពតានតឹងមជ្ឈិមបូព៌ាផ្ទុះឡើងជាថ្មី យោធាអ៊ីស្រាអែល និងសហរដ្ឋអាមេរិក​ នាថ្ងៃសៅរ៍ (២៨ កុម្ភៈ) នេះ បាន​បើកការវាយប្រហារ«ទុកមុខ»ទ្រង់ទ្រាយធំប្រឆាំងនឹង​អ៊ីរ៉ង់ ដែលជាប្រទេសផ្គត់ផ្គង់ប្រេងដ៏សំខាន់មួយ​នៅមជ្ឈិមបូព៌ា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រវាយប្រហារនេះ បា​នទាក់ទាញចំណាត់ការសងសឹងដ៏ចាស់ដៃពីអ៊ីរ៉ង់ និងបង្កការព្រួយបារម្ភជុំវិញពិភព​លោក​ពាក់ព័ន្ធនឹង​លទ្ធភាពផ្ទុះជម្លោះនៅ​ទូទាំងតំបន់មជ្ឈិមបូព៌ា ដែលអាចបង្កតម្លៃប្រេងអន្តរជាតិហក់ឡើងកាន់តែខ្ពស់។

អ៊ីរ៉ង់គឺជាប្រទេសផលិតប្រេងកាតដ៏ធំបំផុត​ទី៣​នៅក្នុងអង្គការនៃប្រទេសនាំចេញប្រេងកាត (OPEC) ដោយ​រួមចំណែកប្រហែល ៤,៥% នៃការផ្គត់ផ្គង់សកល។ ក្នុងឆ្នាំ ២០២៥ អ៊ីរ៉ង់នាំចេញឥន្ធនៈប្រមាណ ៨២០ ០០០ ប៉ារ៉ែល/ថ្ងៃ រួមទាំងឧស្ម័ន ដោយ​តិចជាងអត្រាឆ្នាំ ២០២៤ តែប៉ុណ្ណោះ។

ផលិតកម្មប្រេង និងឧស្ម័នអ៊ីរ៉ង់ភាគច្រើនផ្ដុំគ្នានៅខេត្តភាគនិរតីនៃប្រទេស ហើយការនាំចេញប្រេងឆៅ ៩០% របស់ប្រទេសនេះ ត្រូវបានដឹកឆ្លងកាត់ច្រកសមុទ្រ Hormuz ដែលជាច្រកដឹកប្រេងសំខាន់ដោយ​រួមចំណែករហូតដល់ទៅ ២០% នៃការផ្គត់ផ្គង់ប្រេងសកល។

ក្នុងជម្លោះចុងក្រោយ ដែលផ្ទុះឡើងនៅថ្ងៃសៅរ៍នេះ មិនទាន់មាន​សេចក្ដីរាយការណ៍ថា អ៊ីស្រាអែល ឬអាមេរិក​បាន​កំណត់គោលដៅលើទីតាំងថាមពលណាខ្លះទេ ប៉ុន្តែអ៊ីស្រាអែលធ្លាប់វាយប្រហារទីតាំងប្រេងអ៊ីរ៉ង់ក្នុងឈូងសមុទ្រពែរ្សអំឡុងជម្លោះ ១២ ថ្ងៃ កាលពីខែមិថុនា ឆ្នាំមុន។

ត​ម្លៃប្រេងបាន​កើនឡើងជាបន្តបន្ទាប់រួចមកហើយ ក្នុងរយៈពេលប៉ុន្មានថ្ងៃមកនេះ ដោយសារតែភាពតានតឹងនៃអាមេរិក និងអ៊ីរ៉ង់ ដែលកំពុងចរចាគ្នាលើកម្មវិធីនុយក្លេអ៊ែរអ៊ីរ៉ង់។

ពេលបិទការជួញដូរ​កាលពីថ្ងៃសុក្រ (២៧ កុម្ភៈ) ដែលជាថ្ងៃបិទការជួញដូរប្រចាំសប្ដាហ៍ តម្លៃប្រេងអន្តរជាតិ​ម៉ាក Brent បាន​កើន ១,៧៣ ដុល្លារ​ឬ ២,៤៥% ដល់ ៧២,៤៨ ដុល្លារ/បារ៉ែល ដែលជាកម្រិតខ្ពស់បំផុតរាប់តាំងពីចុងខែកក្កដា ឆ្នាំមុន។ តម្លៃប្រេងអាមេរិកវិញ បាន​កើនឡើង ១,៨១ ដុល្លារ ឬ ២,៧៨% ដល់ ៦៧,០២ ដុល្លារ/បារ៉ែល។

មុនការវាយប្រហាររបស់អ៊ីស្រាអែល/អាមេរិកនៅថ្ងៃសៅរ៍នេះ អ្នកជំនាញទីផ្សារបាន​លើកឡើងរួចហើយ​ថា តម្លៃប្រេងអន្តរជាតិ​អាចនឹង​បន្តហក់ឡើង ប្រសិន​បើភាពតានតឹងនៅមជ្ឈិមបូព៌ានៅតែបន្ត។ ពួកគេលើកឡើងថា ភាពតានតឹងអាចរំខានការផ្គត់ផ្គង់ប្រេងចេញពីច្រក Hormuz និងបង្កើនភាពស្រពេចស្រពិលផ្នែកផ្គត់ផ្គង់សកល៕