ថៃ​សុំ​អូម៉ង់ ឆាប់​ជួយ​​រកនាវិក​៣​នាក់ដែលបាត់ខ្លួន ក្រោយការវាយប្រហារពីអ៊ីរ៉ង់

មេបញ្ជាការកងទ័ពជើងទឹកភូមិន្ទថៃ បានទាក់ទងផ្ទាល់ទៅកាន់សមភាគីអូម៉ង់ ដើម្បីស្នើសុំជំនួយជាបន្ទាន់ ក្នុងការស្វែងរកនាវិកចំនួន​៣នាក់ដែលបានបាត់ខ្លួន បន្ទាប់ពីមានការវាយប្រហារពីសំណាក់ប្រទេសអ៊ីរ៉ង់ នៅក្បែរច្រកសមុទ្រ Hormuz។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាម​ការ​ផ្សាយ​របស់់​ Khaosod នា​ថ្ងៃទី​១២​ខែ​មីនា​ឆ្នាំ​២០២៦ ហេតុការណ៍នេះបានកើតឡើងលើនាវាដឹកទំនិញថៃឈ្មោះ MV Mayuree Naree ដែលបានរងការខូចខាតយ៉ាងធ្ងន់ធ្ងរ អំឡុងពេលធ្វើដំណើរចេញពីកំពង់ផែ ខាលីហ្វា នៃប្រទេសអារ៉ាប់រួម ឆ្ពោះទៅកាន់ប្រទេសឥណ្ឌា ​ឆ្លង​​កាត់​តាមច្រកសមុទ្រ Hormuz។ នាវិកថៃចំនួន២០​នាក់ត្រូវបានជួយសង្គ្រោះ និងនាំយកទៅ​កាន់ដីគោកដោយសុវត្ថិភាពដោយកងទ័ពជើងទឹកអូម៉ង់ ប៉ុន្តែនាវិក៣នាក់ទៀតនៅមិនទាន់រកឃើញនៅឡើយទេ ហើយគេជឿថានៅជាប់លើនាវានៅឡើយ។

មេទ័ពជើងទឹកថៃ Pairote Fuangchan បានសម្តែងការដឹងគុណយ៉ាងជ្រាលជ្រៅចំពោះលោកមេទ័ពជើងទឹកអូម៉ង់ Saif bin Nasser Al Rahbi សម្រាប់ការជួយសង្គ្រោះអ្នករស់រានមានជីវិតទាំង២០នាក់បានទាន់ពេលវេលា ដោយលោកបានបញ្ជាក់ថា កិច្ចសហប្រតិបត្តិការនេះឆ្លុះបញ្ចាំងពីចំណងមិត្តភាពដ៏រឹងមាំរវាងកងទ័ពជើងទឹកនៃប្រទេសទាំងពីរ។ ទោះជាយ៉ាងណាក៏ដោយ មេបញ្ជាការកងទ័ពជើងទឹកថៃ បានជំរុញ​ឲ្យ​កងកម្លាំងអូម៉ង់បន្តប្រតិបត្តិការស្វែងរក​ឲ្យ​បានឆាប់បំផុតតាមដែលអាចធ្វើទៅបាន ដើម្បីបង្កើនឱកាសក្នុងការស្វែងរកនាវិកដែលនៅសេសសល់។

បច្ចុប្បន្ននេះ កងទ័ពជើងទឹកភូមិន្ទថៃ កំពុងតាមដានស្ថានភាពនេះយ៉ាងដិតដល់ និងកំពុងសម្របសម្រួលជាមួយស្ថានទូតថៃ ប្រចាំទីក្រុង Muscat ដើម្បីធានាថា គ្រប់មធ្យោបាយដែលមានទាំងអស់ ត្រូវបានប្រើប្រាស់ដើម្បីជួយសង្គ្រោះនាវិកដែលបាត់ខ្លួនទាំងនោះ។

សូម​ជម្រាប​ថា ពាក់ព័ន្ធការ​វាយ​ប្រហារ​លើក​នេះ សារព័ត៌មានអ៊ីរ៉ង់ Fararu ផ្សាយថា នាវា​នោះប្រាប់ហើយមិនស្តាប់ ហើយផ្គើននឹងការព្រមាន ទើបកងឆ្មាំបដិវត្តន៍​អ៊ីរ៉ង់​សម្រេចចិត្តបើកការបាញ់ប្រហារតែម្តងទៅ។ កងឆ្មាំបដិវត្តន៍​អ៊ីរ៉ង់អះអាងទៀតថា នាវា​នោះ គឺធ្វើដំណើរឆ្លងកាត់តាមច្រកសមុទ្រ Hormuz ដោយខុសច្បាប់៕

ប្រែសម្រួល៖ ឈាង