សេដ្ឋកិច្ច

រាជធានីភ្នំពេញ ត្រូវការសាងសង់បង្គោលអង់តែន ១២០០ បង្គោល ដើម្បីបង្កើនល្បឿនសេវាទូរស័ព្ទ និងអ៊ិនធឺណិត

បានផុស

៤ ខែ មុន

នៅ

ថ្ងៃសុក្រ ១៣ មីនា ២០២៦

ដោយ

រាជធានីភ្នំពេញ មានតម្រូវការការបង្គោលអង់តែនចំនួន ១២០០ បង្គោល ដើម្បីបង្កើនល្បឿនសេវាទូរស័ព្ទ និងអ៊ិនធឺណិត ក្នុងការសម្រួលការងារជីវភាពប្រចាំថ្ងៃរបស់ប្រជាពលរដ្ឋ។

លោក ជា វ៉ាន់ដេត រដ្ឋមន្ត្រីក្រសួងប្រៃយ៍ណី និងទូរគមនាគមន៍ បានលើកឡើងនៅក្នុងសិក្ខាសាលារបស់រដ្ឋសភាស្ដីពីភាពធន់ និងកាលនុវត្តភាព នៃយុទ្ធសាស្ត្រវិទ្យាសាស្ត្រ បច្ចេកវិទ្យា ឧស្សាហកម្ម នៅថ្ងៃទី ១២ ខែមីនា ឆ្នាំ ២០២៦។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ជា វ៉ាន់ដេត បានលើកឡើងថា៖ «កម្ពុជាមានបង្គោលសរុបចំនួន ១៤០០ បង្គោល ទូទាំងប្រទេស យើងដឹងទាំងអស់ កន្លែងណា មានសេវា កន្លែងណាអត់សេវា តែយើងក៏មិនទាន់អាចទៅធ្វើកន្លែងអត់សេវាបានដែរ ព្រោះថវិកាមានកំណត់ ព្រោះបង្គោលមួយ អាចវិនិយោគពី ១០ ម៉ឺន ទៅ ៣០ ម៉ឺនដុល្លារ ហើយនៅក្នុងរយៈពេល ៦ ឆ្នាំ នេះ យើងបង្ខំឱ្យប្រតិបត្តិករវិនិយោគប្រមាណ ៥០០ លានដុល្លារ លើការសាងសង់បង្គោលអង់តែន ដើម្បីធ្វើឱ្យប្រសើរ»។

លោក ជា វ៉ាន់ដេត បន្ថែមថា រាជធានីភ្នំពេញ ត្រូវការសាងសង់ ១២០០ បង្គោល ប៉ុន្តែ ៣ ឆ្នាំ សាងសង់បានតែ ជាង ៦០០ បង្គោល ដោយសារប្រជាជនមួយចំនួនព្រួយបារម្ភពីផលប៉ះពាល់សុខភាពដែលបង្កពីបង្គោលអត់តែនទូរស័ព្ទចល ខណៈលោករដ្ឋមន្ត្រីអះអាងថា បង្គោលអង់តែនមិនប៉ះពាល់នោះទេ។

ក្រសួងប្រៃសណីយ៍ និងទូរគមនាគមន៍ បានប្រកាសបន្តអនុវត្តនយន្តការពង្រីកវិសាលភាពប្រព័ន្ធសេវាទូរស័ព្ទ និងអ៊ីនធឺណិតនៅក្នុងក្របខ័ណ្ឌទូទាំងប្រទេស ដើម្បីសម្រួលដល់ការប្រើប្រាស់របស់ប្រជាពលរដ្ឋ ក្នុងការចាប់យកបច្ចេកវិទ្យាឌីជីថល សំដៅរួមចំណែកសម្រេចឱ្យបាននូវយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលកម្ពុជា។

លោក ជា វ៉ាន់ដេត បានអះអាងថា ដើម្បីឱ្យប្រព័ន្ធសេវាទូរស័ព្ទ និងអ៊ីនធឺណិតគ្របដណ្ដប់បានទូទាំងប្រទេស ក្រសួងត្រូវបង្កើនការសាងសង់បង្គោលអង់តែននៅគ្រប់តំបន់។

ក្រសួងប្រៃសណីយ៍បានធ្វើការកែទម្រង់ស៊ីជម្រៅនៅក្នុងវិស័យទូរគមនាគមន៍ តាមរយៈការពង្រឹងនិយ័តកម្ម និងការវិនិយោគលើហេដ្ឋារចនាសម្ព័ន្ធទូរគមនាគមន៍បន្ថែមនៅទូទាំងប្រទេសនៅក្នុងរយៈពេល ៥ ឆ្នាំចុងក្រោយនេះ។

សម្រាប់កម្ពុជា និងប្រទេសកំពុងអភិវឌ្ឍ បច្ចេកវិទ្យាអាចត្រូវបានចាត់ទុកជាយានមួយសម្រាប់ពន្លឿន ការធ្វើទំនើបកម្ម អភិវឌ្ឍ និងបង្កើនតម្លៃបន្ថែមក្នុងសង្គមសេដ្ឋកិច្ចរបស់ខ្លួន ជាពិសេសលើកកម្ពស់ជីវភាពរបស់ប្រជាពលរដ្ឋ៕

អត្ថបទ៖ ឡេង ដេត