ព័ត៌មានអន្ដរជាតិ

អាមេរិក បានបំផ្លាញទីតាំងកោះយោធាអុីរ៉ង់ និងព្រមានថាវិស័យថាមពលអាចជាគោលដៅបន្ទាប់

បានផុស

១ ខែ មុន

នៅ

ថ្ងៃសៅរ៍ ១៤ មីនា ២០២៦

ដោយ

ប្រធានាធិបតីសហរដ្ឋអាមេរិក ដូណាល់ ត្រាំ បាននិយាយថា. អាមេរិកបានបំផ្លាញទីតាំងយោធាប្រទេសអុីរ៉ង់ នៅលើកោះដ៏សំខាន់មួយសម្រាប់បណ្តាញប្រេង ព្រមទាំងព្រមានថា ហេដ្ឋារចនាសម្ព័ន្ធប្រេងប្រទេសនេះអាចជាគោលដៅបន្ទាប់ ប្រសិនបើអុីរ៉ង់បន្តជ្រៀតជ្រែកកប៉ាល់ដឹកប្រេងឆ្លងកាត់ច្រកសមុទ្រ Hormuz។

ប្រធានាធិបតីអាមេរិក លោក ដូណាល់ ត្រាំ។ រូបភាព៖ Reuters

លោក ត្រាំ បានថ្លែងថា៖ «កងកម្លាំងសហរដ្ឋអាមេរិកកាលពីថ្ងៃសុក្រ បានបំផ្លាញគោលដៅលើកោះ Kharg របស់អុីរ៉ង់ហើយ វាជាទីតាំងស្ថានីយប្រេងដ៏សំខាន់ ដើម្បីដោះស្រាយការនាំចេញប្រេងរបស់ប្រទេសនេះ»។ នេះបើយោងតាមភ្នាក់ងារ AP ផ្សាយថ្ងៃសៅរ៍ ទី១៤ ខែមីនា ឆ្នាំ២០២៦ ។

ចំណែកប្រធានសភាអុីរ៉ង់ព្រមានថា ការវាយប្រហារបែបនេះនឹងបង្កឱ្យមានការសងសឹកកម្រិតថ្មីមួយទៀត។

ទន្ទឹមនឹងនេះ មន្ត្រីអាមេរិកម្នាក់និយាយថា កងកម្លាំងជើងចំនួន ២៥០០ និងកងនាវិក ២៥០០នាក់បន្ថែមទៀត ព្រមទាំងនាវាចម្បាំង មួយគ្រឿងកំពុងបញ្ជូនទៅមជ្ឈិមបូព៌ាទៅក្នុងសង្គ្រាមជាមួយសាធារណរដ្ឋអុីរ៉ង់។

គួរបញ្ជាក់ថា អុីរ៉ង់នៅតែបន្តបើកការវាយប្រហារដោយមីស៊ីល និងដ្រូនកាន់តែខ្លាំងលើអុីស្រាអែល និងរដ្ឋឈូងសមុទ្រជិតខាង។

មិនត្រឹមតែប៉ុណ្ណោះ អុីរ៉ង់ បានបិទច្រកសមុទ្រ Hormuz ទៀតផង បើទោះបីជាយន្តហោះចម្បាំងអាមេរិក និងអុីស្រាអែលបានវាយប្រហារគោលដៅយោធា និងគោលដៅផ្សេងទៀតនៅទូទាំងប្រទេសអុីរ៉ង់ក៏ដោយ៕

ប្រែសម្រួល៖ ណឺ មិនា