សេដ្ឋកិច្ច

តម្លៃមាសធ្លាក់ចុះក្រោម ៦ ពាន់ដុល្លារ មួយតម្លឹង

បានផុស

២ ខែ មុន

នៅ

ថ្ងៃព្រហស្បតិ៍ ១៩ មីនា ២០២៦

ដោយ

តម្លៃហាងឆេងមាសបានធ្លាក់ចុះក្រោម ៦ ពាន់ដុល្លារ ក្នុងមួយតម្លឹង នៅព្រឹកថ្ងៃព្រហស្បតិ៍នេះ ដោយសារវិនិយោគិនធំៗ មួយចំនួនបានដកប្រាក់ទៅវិនិយោគលើប្រេង បន្ទាប់ពីសហរដ្ឋអាមេរិក និងអ៊ីស្រាអែល បើកការវាយប្រហារទៅលើអ៊ីរ៉ង់ ដែលនាំឱ្យអ៊ីរ៉ង់រឹតត្បិតការដឹកជញ្ជូនប្រេងតាមច្រកសមុទ្រហូមូស្ស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុក្រុមហ៊ុន PP Link securities បានឱ្យដឹងថា តម្លៃមាសធ្លាក់ចុះ ពាក់ព័ន្ធនឹងសង្គ្រាមនៅតំបន់មជ្ឈិមបូព៌ា ជុំវិញការរឹតត្បិតច្រកសមុទ្រហូមូស្ស ហើយមានការលកភាគហ៊ុនជាច្រើន ដើម្បីយកប្រាក់ដុល្លារ ហើយយកទៅវិនិយោគលើប្រេង។

លោក ឡុង សំណាង យល់ឃើញថា៖ «ប្រសិនបើប្រេងនៅតែជាកត្តាចម្បង តម្លៃហាងឆេងមាស នឹងបន្តធ្លាក់ចុះទៀត ដោយសារអ្នកវិនិយោគចាប់យកឱកាសលើហាងឆេងប្រេង ប៉ុន្តែក្នុងដំណាក់កាលមួយទៀត មាសនឹងត្រឡប់ហក់ឡើងទៅវិញដោយសារតែវិបត្តិសេដ្ឋកិច្ចអត់ល្អ»។

គិតត្រឹមម៉ោង ១១ ព្រឹកថ្ងៃទី ១៩ ខែមីនា ឆ្នាំ ២០២៦ តម្លៃហាងឆេងមាសអន្តរជាតិបានធ្លាក់ចុះដល់ ៤៨៤៨ ក្នុងមួយអោន ស្មើនឹង ៥៨៤០ ដុល្លារ ក្នុងមួយតម្លឹងនៅកម្ពុជា។ សម្រាប់ហាងឆេងមាស នៅតាមបណ្ដាហាងនានា ក្នុងរាជធានីភ្នំពេញ លក់ចេញក្នុងតម្លៃ ៥៩៦ ដុល្លារ ក្នុងមួយជី៕