នាយក្រិន រំភើបចិត្តខ្លាំង ក្រោយទទួលការយកចិត្តទុកដាក់ពីសម្តេចតេជោ សួរសុខទុក្ខដល់មន្ទីរពេទ្យ

តារាកំប្លែងមាឌល្អិត នាយក្រិន បានបង្ហាញអារម្មណ៍រំភើប និងសោមនស្សក្នុងចិត្តយ៉ាងខ្លាំង បន្ទាប់ពីទទួលបានការយកចិត្តទុកដាក់ផ្ទាល់ពីសម្តេចតេជោ ហ៊ុន សែន ប្រធានព្រឹទ្ធសភាកម្ពុជា ដែលបានឆ្លៀតពេលទៅសួរសុខទុក្ខដល់មន្ទីរពេទ្យ។

នៅព្រឹកថ្ងៃទី ២២មីនា សម្តេចតេជោ ហ៊ុន សែន ប្រធានព្រឹទ្ធសភាកម្ពុជា បានឆ្លៀតពេលចុះទៅសួរសុខទុក្ខតារាកំប្លែងមាឌល្អិត នាយក្រិន ដែលកំពុងសម្រាកព្យាបាលជំងឺនៅមន្ទីរពេទ្យកាល់ម៉ែត រាជធានីភ្នំពេញ។

តាមការបញ្ជាក់របស់សម្តេចតេជោ ការចុះសួរសុខទុក្ខនេះ គឺដើម្បីលើកទឹកចិត្ត និងបង្ហាញការយកចិត្តទុកដាក់ចំពោះសិល្បករដែលកំពុងជួបប្រទះស្ថានភាពលំបាកទាំងផ្លូវកាយ និងផ្លូវចិត្ត។ ក្នុងនោះឱកាសឆ្លៀតសួរសុខទុក្ខនេះផងដែរ សម្តេចបានបង្ហាញការយល់ចិត្តចំពោះស្ថានភាពរបស់ នាយក្រិន ជាពិសេសពាក់ព័ន្ធនឹងវិបត្តិជីវិត និងបញ្ហាសុខភាព ដែលកំពុងប៉ះពាល់យ៉ាងខ្លាំងដល់ជីវភាពប្រចាំថ្ងៃ។

ដោយទទួលបានការយកចិត្តទុកដាក់ និងគិតគូរពីប្រធានព្រឹទ្ធសភាផ្ទាល់ នាយក្រិន តាមរយៈសារលើទំព័រហ្វេសប៊ុកផ្ទាល់ខ្លួន បានបង្ហាញក្តីសោមន្យដូច្នេះថា “កូនសូមអរគុណសម្តេចពុក ដែលបានមកមើល និងសួរសុខទុក្ខកូនផ្ទាល់នៅមន្ទីរពេទ្យកាល់ម៉ែតព្រឹកនេះ។ កូនសូមគោរពជូនពរសម្តេចពុក និងអ្នកម៉ែ សូមមានសុខភាពល្អបរិបូរណ៍ ជាម្លប់ដល់កូនចៅគ្រប់ៗគ្នា”។

សកម្មភាពនេះ ត្រូវបានមហាជនសរសើរថា ជាគំរូនៃភាពមេត្តាករុណា និងការយកចិត្តទុកដាក់ចំពោះវិស័យសិល្បៈខ្មែរ ដែលតែងតែមានតួនាទីសំខាន់ក្នុងការផ្តល់ភាពរីករាយដល់សង្គម៕