ព័ត៌មានអន្ដរជាតិ

ក្រុមហ៊ុនអាកាសចរណ៍វៀតណាម គ្រោងកាត់ជើងហោះហើរក្នុងស្រុក ព្រោះខ្វះប្រេងយន្តហោះ

បានផុស

១ ខែ មុន

នៅ

ថ្ងៃពុធ ២៥ មីនា ២០២៦

ដោយ

អាជ្ញាធរអាកាសចរណ៍ស៊ីវិលវៀតណាម (CAAV) បាននិយាយថា ក្រុមហ៊ុនអាកាសចរណ៍ជាតិវៀតណាមមានគម្រោងកាត់បន្ថយជើងហោះហើរក្នុងស្រុកចំនួន ២៣ ជើង/សប្តាហ៍ចាប់ពីខែមេសាតទៅ ដោយសារតែកង្វះខាតប្រេងឥន្ធនៈយន្តហោះដែលបណ្ដាលមកពីជម្លោះនៅមជ្ឈិមបូព៌ា។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

ក្រុមហ៊ុនអាកាសចរណ៍វៀតណាម (Vietnam Airlines) ដែលគ្រប់គ្រងដោយរដ្ឋ នឹងផ្តល់អាទិភាពដល់ផ្លូវហោះហើរសំខាន់ៗចំពោះការតភ្ជាប់ជាតិ ពាណិជ្ជកម្ម ទេសចរណ៍ ការទូត និងការធ្វើដំណើរក្នុងស្រុក។ នេះបើយោងតាមសេចក្តីថ្លែងការណ៍របស់ CAAV ចេញផ្សាយនៅយប់ថ្ងៃចន្ទ។

សេចក្តីថ្លែងការណ៍បានគូសបញ្ជាក់ថា ចាប់ពីថ្ងៃទី ១ ខែមេសា Vietnam Airlines នឹងផ្អាកប្រតិបត្តិការផ្លូវហោះហើរក្នុងស្រុកចំនួន ៧ និងកាត់ជើងហោះហើរចំនួន ២៣/សប្ដាហ៍ ដើម្បីសន្សំសំចៃប្រេងឥន្ធនៈ។

ក្រៅពី Vietnam Airlines ក្រុមហ៊ុនអាកាសចរណ៍ VietJet Aviation JSC ក៏កាត់បន្ថយជើងហោះហើរក្នុងស្រុកមួយចំនួនផងដែរ។ នេះបើតាមការចុះផ្សាយរបស់បណ្ដាញព័ត៌មាន Bloomberg។

ដោយឡែកក្រុមហ៊ុនអាកាសចរណ៍ Bamboo Airways ឯណោះវិញ បាននិយាយថា ខ្លួននឹងខិតខំរក្សាជើងហោះហើរក្នុងអំឡុងពេលធ្វើដំណើរកំពូល ទោះបីជាប្រេកង់ជើងហោះហើរអាចទាបជាងឆ្នាំមុន ប្រសិនបើតម្លៃប្រេងបន្តខ្ពស់ក៏័ដោយ។ ក្រុមហ៊ុនបានអំពាវនាវឱ្យរដ្ឋាភិបាលផ្តល់ការគាំទ្របន្ថែមទៀតដល់ក្រុមហ៊ុនអាកាសចរណ៍ រួមទាំងការកាត់បន្ថយពន្ធការពារបរិស្ថាន និងពន្ធប្រេងឥន្ធនៈអាកាសចរណ៍។

គួររំឭកថា កាលពីពាក់កណ្ដាលខែមីនា CAAV បានព្រមានឱ្យបណ្ដាក្រុមហ៊ុនអាកាសចរណ៍ក្នុងស្រុកត្រៀមខ្លួនកាត់បន្ថយជើងហោះហើរចាប់ពីខែមេសា បន្ទាប់ពីចិន និងថៃបានបញ្ឈប់ការនាំចេញប្រេងឥន្ធនៈយន្តហោះជុំវិញសង្គ្រាមនៅអ៊ីរ៉ង់ ដែលបង្កើនហានិភ័យនៃកង្វះខាត។

វៀតណាមមានរោងចក្រចម្រាញ់ប្រេងក្នុងស្រុកចំនួន២ ដែលផ្គត់ផ្គង់ប្រហែល ៧០% នៃតម្រូវការក្នុងស្រុក ប៉ុន្តែប្រទេសនេះនាំចូលប្រេងឆៅជាង ៨០% ពីមជ្ឈិមបូព៌ា ដែលធ្វើឱ្យវៀតណាមនៅតែរងហានិភ័យខ្លាំងពីវិបត្តិមជ្ឈិមបូព៌ា។ លើសពីនេះ ប្រហែល ៧០% នៃប្រេងយន្តហោះរបស់វៀតណាម ត្រូវបាននាំចូល ដែលភាគច្រើនមកពីចិន និងថៃ។

ក្រៅពីការកាត់បន្ថយជើងហោះហើរ CAAV បាននិយាយថា ក្រុមហ៊ុនអាកាសចរណ៍វៀតណាមក៏កំពុងរៀបចំអនុវត្តការគិតថ្លៃសំបុត្រយន្តហោះបន្ថែមសម្រាប់ផ្លូវហោះហើរអន្តរជាតិ ចាប់ពីដើមខែមេសាផងដែរ៕