ព័ត៌មានអន្ដរជាតិ

លោក ហ្សេលេនស្គី អាចប្រើបទពិសោធន៍បើកច្រកសមុទ្រខ្មៅទៅជួយបើកច្រក Hormuz

បានផុស

៣ សប្តាហ៍ មុន

នៅ

ថ្ងៃអង្គារ ៣១ មីនា ២០២៦

ដោយ

ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី បាននិយាយនៅថ្ងៃចន្ទទី៣០ថា ភាពជោគជ័យរបស់ទីក្រុងកៀវក្នុងការបំបែកការបិទច្រកសមុទ្រខ្មៅរបស់រុស្ស៊ី បានផ្តល់ឲ្យខ្លួននូវជំនាញដ៏សំខាន់មួយដើម្បីជួយដោះសោដោយបើកច្រកសមុទ្រ Hormuz ដ៏ចម្រូងចម្រាសនោះ ឡើងវិញបាន។ នេះបើតាមរបាយការណ៍ ចុះផ្សាយពីទីភ្នាក់ងារ politico ។

ប្រធានាធិបតីដែលកំពុងជាប់ដៃក្នុងសង្គ្រាមជាមួយរុស្ស៊ីអស់រយៈពេលជាង៤ឆ្នាំ បានប្រាប់អ្នកសារព័ត៌មានក្នុងការជជែកតាមបណ្តាញសង្គម ថា «យើងបានលើកឡើងពីបញ្ហានេះ ពីព្រោះវាជាបញ្ហាដ៏ឈឺចាប់ និងបន្ទាន់មួយ ដូចដែលយើងទាំងអស់គ្នាអាចមើលឃើញ សម្រាប់ពិភពលោកទាំងមូលនៅក្នុងបរិបទនៃវិបត្តិថាមពលបច្ចុប្បន្ន។ ពួកគេដឹងថា ពួកគេអាចពឹងផ្អែកលើជំនាញរបស់យើង ក្នុងវិស័យនេះ ហើយយើងនឹងត្រូវពិភាក្សាវាយ៉ាងលម្អិតបំផុត»។

មេដឹកនាំអ៊ុយក្រែន បានបញ្ចាក់បន្ថែមទៀតថា ទីក្រុងកៀវបានត្រៀមខ្លួនរួចជាស្រេចហើយ ដើម្បីគាំទ្រកិច្ចខិតខំប្រឹងប្រែងដឹកនាំដោយសហរដ្ឋអាមេរិក ដើម្បីដោះសោច្រកសមុទ្រ Hormuz ដែលគ្រប់គ្រងដោយអ៊ីរ៉ង់ ដោយការប្រើប្រាស់បទពិសោធន៍របស់ខ្លួនដែលធ្លាប់ប្រើប្រាស់ក្នុងការបើកច្រកសមុទ្រខ្មៅឡើងវិញ។

ការលើកឡើងរបស់ប្រធានាធិបតីចិត្តសឿងរួបនេះ បានកើតឡើងក្នុងអំឡុងពេលទស្សនកិច្ចទៅកាន់ប្រទេសអារ៉ាប៊ីសាអូឌីត អារ៉ាប់រួម និងកាតា ដោយបានពិភាក្សាអំពីការចែករំលែកចំណេះដឹងប្រតិបត្តិការ រួមទាំងការប្រើប្រាស់យន្តហោះដ្រូនដើម្បីធានាផ្លូវពាណិជ្ជកម្មតាមសមុទ្រ ដោយលោកផ្ទាល់បានសង្កត់ធ្ងន់លើឆន្ទៈរបស់អ៊ុយក្រែនក្នុងការជួយដៃគូដោះស្រាយអ្វីដែលលោកហៅថាវិបត្តិថាមពលសកល។

យ៉ាងណាមិញ ប្រសិនបើអ៊ុយក្រែនចូលរួមជាមួយប្រតិបត្តិការសន្តិសុខ Hormuz វាអាចពង្រឹងសម្ព័ន្ធភាពជាមួយរដ្ឋឈូងសមុទ្រ និងអាមេរិក ដែលអាចធានាបាននូវជំនួយថាមពល និងការកសាងឡើងវិញ។ ប៉ុន្តែ ការធ្វើឲ្យមានតុល្យភាពនៃគោលបំណង ការការពារផ្លូវពាណិជ្ជកម្ម ការប្រឆាំងនឹងអ៊ីរ៉ង់ និងការពង្រឹងចំណងមិត្តភាពឈូងសមុទ្រ – អាចបង្ខំឲ្យទីក្រុងកៀវផ្តល់អាទិភាពដល់គោលដៅមួយចំនួនជាងគោលដៅផ្សេងទៀត។ ម្យ៉ាងវិញទៀត ការផ្តល់ជូនរបស់អ៊ុយក្រែនអាចនៅតែជានិមិត្តរូប ដែលបម្រើជាសញ្ញារារាំង ខណៈពេលដែលចៀសវាងការជាប់គាំងកាន់តែជ្រៅនៅក្នុងជម្លោះមជ្ឈិមបូព៌ា៕

អត្ថបទ៖ សាង ស្រីល័ក្ខ