រដ្ឋបាលខេត្តតាកែវ នឹងរៀបចំព្រឹត្តិការណ៍ប្រណាំង រទេះសាឡី នៅមុនថ្ងៃបុណ្យចូលឆ្នាំខ្មែរ

រដ្ឋបាលខេត្តតាកែវ បានប្រកាសគ្រោងរៀបចំព្រឹត្តិការណ៍ប្រណាំង «រទេះគោសាឡី» ដ៏ពិសេសមួយក្នុងឱកាសអបអរសាទរ «តាកែវសង្រ្កាន្ត ឆ្នាំ២០២៦» ដែលជាព្រឹត្តិការណ៍វប្បធម៌ប្រចាំឆ្នាំ មានគោលបំណងលើកកម្ពស់អត្តសញ្ញាណប្រពៃណីខ្មែរ និងជំរុញវិស័យទេសចរក្នុងតំបន់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមរដ្ឋបាលខេត្ត ព្រឹត្តិការណ៍នេះ នឹងប្រព្រឹត្តទៅនៅថ្ងៃទី០៧ ខែមេសា ឆ្នាំ២០២៦ នៅភូមិ៣ សង្កាត់រកាក្នុង ក្រុងដូនកែវ ខេត្តតាកែវ នៅទីតាំងអតីតសាលានយោបាយ ដែលស្ថិតនៅត្រើយម្ខាងនៃមាត់បឹងតាកែវ។ ទីតាំងនេះត្រូវបានជ្រើសរើសដោយសារតែមានផ្ទៃធំទូលាយ និងអាចទាក់ទាញភ្ញៀវទេសចរជាច្រើនឲ្យចូលរួមទស្សនា និងគាំទ្រកម្មវិធី។

ការប្រណាំង «រទះគោសាឡី» គឺជាប្រពៃណីបុរាណមួយ ដែលបង្ហាញពីជីវភាពរស់នៅ និងទំនៀមទម្លាប់របស់ប្រជាពលរដ្ឋខ្មែរ ជាពិសេសនៅតំបន់ជនបទ។ អាជ្ញាធរខេត្តបានអំពាវនាវដល់ប្រជាពលរដ្ឋ និងភ្ញៀវទេសចរជាតិ-អន្តរជាតិ អញ្ជើញចូលរួមទស្សនាព្រឹត្តិការណ៍នេះយ៉ាងច្រើនកុះករ ដើម្បីគាំទ្រការអភិរក្សវប្បធម៌ប្រពៃណី និងរួមចំណែកលើកស្ទួយវិស័យទេសចរណ៍ខេត្តតាកែវឲ្យកាន់តែរីកចម្រើន។

ព្រឹត្តិការណ៍ «តាកែវសង្រ្កាន្ត ឆ្នាំ២០២៦» ត្រូវបានរំពឹងថា នឹងក្លាយជាកន្លែងប្រមូលផ្តុំសកម្មភាពវប្បធម៌ដ៏សម្បូរបែប និងទាក់ទាញមហាជនយ៉ាងខ្លាំង ក្នុងឱកាសបុណ្យចូលឆ្នាំថ្មីប្រពៃណី៕

អត្ថបទ៖ វីរៈ