ព័ត៌មានអន្ដរជាតិ

ចិន បង្ហាញកង្វល់ ក្រោយជប៉ុនដាក់ពង្រាយមីស៊ីលរយៈចម្ងាយឆ្ងាយ

បានផុស

៤ សប្តាហ៍ មុន

នៅ

ថ្ងៃព្រហស្បតិ៍ ២ មេសា ២០២៦

ដោយ

ក្រសួងការបរទេសចិន បានសម្តែងការព្រួយបារម្ភខ្លាំង ក្រោយជប៉ុនដាក់ពង្រាយមីស៊ីលរយៈចម្ងាយឆ្ងាយដែលមានសមត្ថភាពវាយប្រហារក្នុងគោលដៅឆ្ងាយ តាមអ្វីដែលទីក្រុងតូក្យូ ហៅថា ជា«មូលដ្ឋានសត្រូវ»។

យោងតាម Chinadaily ផ្សាយថ្ងៃទី០២ ខែមេសា ប្រទេសជប៉ុនប្រកាសនៅថ្ងៃអង្គារពីការដាក់ពង្រាយមីស៊ីលរយៈចម្ងាយឆ្ងាយក្នុងខេត្ត Kumamoto និង Shizuoka ក្រោមហេតុផលសន្តិសុខជាតិ និងពង្រឹងសមត្ថភាពនៅតាមតំបន់ដែលងាយរងគ្រោះ ជាពិសេសក្នុងពេលដែលស្ថានការណ៍ពិភពលោកពិបាកស្មាន។

ជាការឆ្លើយតប អ្នកនាំពាក្យក្រសួងការបរទេស លោកស្រី Mao Ning បានលើកឡើងនៅថ្ងៃពុធថា៖ « ការដាក់ពង្រាយអាវុធវាយលុករបស់ជប៉ុនក្រោមលេសនៃការការពារខ្លួននិងការវាយប្រហារតបត គឺលើសពីវិសាលភាពនៃការការពារខ្លួននិងការពារផ្តាច់មុខឆ្ងាយណាស់»។

លោកស្រីអ្នកនាំពាក្យ បន្តថា៖ « រឿងនេះរំលោភលើបទប្បញ្ញត្តិយ៉ាងធ្ងន់ធ្ងរដែលមានកម្លាំងចងភ្ជាប់នៃច្បាប់អន្តរជាតិ ដូចជាសេចក្តីប្រកាសទីក្រុង Cairo ទីក្រុង Potsdam និងឧបករណ៍ដែលមិនយកមកប្រើប្រាស់របស់ជប៉ុន។ វាជាការរំលោភលើរដ្ឋធម្មនុញ្ញជប៉ុនយ៉ាងធ្ងន់ធ្ងរ និងបទដ្ឋានក្នុងស្រុកដែលមានស្រាប់របស់ខ្លួន»។

អ្នកនាំពាក្យក្រសួងការបរទេស លោកស្រី Mao Ning ។ រូបភាព៖ ក្រសួងការបរទេសចិន!

លោកស្រី Mao បន្ថែមថា៖ « បញ្ហានេះបង្ហាញម្តងទៀតថា កងកម្លាំងស្តាំនិយមរបស់ជប៉ុនកំពុងជំរុញគោលនយោបាយសន្តិសុខឆ្ពោះទៅរកការវាយលុក និងការពង្រីកខ្លួន»។

យោងតាមភ្នាក់ងារ AP, មីស៊ីលប្រភេទ Type-១២ អាចបាញ់បានរយៈចម្ងាយជាង ១ ០០០ គីឡូម៉ែត្រដែលជាការពង្រីកពីចម្ងាយ ២០០គីឡូម៉ែត្រនៃមីស៊ីលដើម អនុញ្ញាតឱ្យមីស៊ីលនេះមានសមត្ថភាពហោះទៅដល់ដីគោករបស់ប្រទេសចិន។

យ៉ាងណាលោកស្រី Mao លើកឡើងទៀតថា៖ « យោធានិយមថ្មីរបស់ជប៉ុនកំពុងគំរាមកំហែងដល់សន្តិភាព និងស្ថិរភាពនៅក្នុងតំបន់។ សហគមន៍អន្តរជាតិគួរតែប្រុងប្រយ័ត្នខ្ពស់។ ខ្ញុំក៏បានកត់សម្គាល់ឃើញថា អង្គការ និងពលរដ្ឋជប៉ុនជាច្រើនបង្ហាញយ៉ាងច្បាស់ពីការជំទាស់របស់ពួកគេលើការដាក់ពង្រាយមីស៊ីលនេះ»។

អ្នកនាំពាក្យប្រទេសចិនរូបនេះបន្តថា៖ « យើងសូមអំពាវនាវ ដល់ភាគីជប៉ុនឱ្យឆ្លុះបញ្ចាំងយ៉ាងស៊ីជម្រៅពីប្រវត្តិសាស្ត្រនៃការឈ្លានពានយោធានិយម ដែលបំពេញតាមការប្តេជ្ញាចិត្តរបស់ខ្លួនក្នុងវិស័យសន្តិសុខយោធានិងធ្វើសកម្មភាពដោយប្រយ័ត្នប្រយែងបំផុត»៕

ប្រែសម្រួល៖ ណឺ មិនា