កីឡា

សហព័ន្ធកីឡាបាល់ទាត់លើតុ ការឧបត្ថម្ភពី CHN Sports រយៈពេល ២ឆ្នាំនឹងសម្រាលបន្ទុកចំណាយបានច្រើន

បានផុស

៣ ខែ មុន

នៅ

ថ្ងៃចន្ទ ៦ មេសា ២០២៦

ដោយ

អគ្គលេខាធិការសហព័ន្ធកីឡាបាល់ទាត់លើតុកម្ពុជា ថាការជួយឧបត្ថម្ភគាំទ្រពីក្រុមហ៊ុន CHN Sports នឹងជួយសម្រាលបន្ទុកការចំណាយលើសម្ភារ សំលៀកបំពាក់ ស្បែកជើង និងកាបូបបានច្រើនក្នុងរយៈពេល ២ឆ្នាំខាងមុខនេះពិសេសអំឡុងការចេញទៅប្រកួតកម្រិតអន្តរជាតិផ្សេងៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទិដ្ឋភាពចុះ MOU

លោក ម៉ក់ ចាន់ភិរុណ អគ្គលេខាធិការសហព័ន្ធបាល់ទាត់លើតុកម្ពុជា បានឲ្យដឹងថា រយៈពេល ២ឆ្នាំដែលក្រុមហ៊ុនសម្ភារកីឡា CHN Sports នឹងជួយដល់សហព័ន្ធនេះគឺសម្រាលបន្ទុកច្រើនពិសេសថវិកាដែលនឹងត្រូវចំណាយលើសម្ភារ ឬសំលៀកបំពាក់ផ្សេងៗនោះ។ ដោយសារតែសហព័ន្ធបាល់ទាត់លើតុកម្ពុជាពុំទាន់ទទួលបានកញ្ចប់ថវិកាអភិវឌ្ឍន៍ពីក្រសួងអប់រំនៅឡើយទេ ដូច្នេះការហ្វឹកហាត់ជួបការលំបាកច្រើននាពេលកន្លងទៅ។ យ៉ាងណាទាំងគ្រូបង្វឹក កីឡាករ កីឡាការិនីនៅតែបន្តខំប្រឹងប្រែងដើម្បីដណ្ដើមស្នាដៃជូនជាតិ។

តំណាងសហព័ន្ធខាងលើនេះ បង្ហាញនូវភាពសប្បាយរីករាយជាខ្លាំងចំពោះការបើកសករាជថ្មីដែលមានក្រុមហ៊ុនឯកជនបានចូលរួមជំរុញអភិឌ្ឍន៍កីឡាមួយនេះឲ្យកាន់តែមានការទទួលស្គាល់ និងរីកចម្រើននៅកម្ពុជា។ លើសពីនេះទៅទៀតក្រុមហ៊ុននឹងផ្ដល់ទីតាំងប្រកួតជ្រើសរើសជើងឯកថ្នាក់ជាតិប្រចាំឆ្នាំក្នុងបរិវេណផ្សារ YUPIN Mall ដើម្បីជួយផ្សព្វផ្សាយពីព្រឹត្តិការណ៍នេះទៀតផង។

ទិដ្ឋភាពចុះ MOU

ចំណែកលោក Liu Ru Bing អ្នកចាត់ការទូទៅរបស់ក្រុមហ៊ុនបានលើកឡើងថា កម្ពុជា-ចិន ជាមិត្តនិងគ្នាជាយូរណាស់មកហើយដែលទំនាក់ទំនងនេះជ្រាលជ្រៅ និងមិនអាចកាត់ថ្លៃបាន។ ស្របពេលលោកផ្ទាល់បានមកប្រកបរបររកស៊ីនៅកម្ពុជាផងនោះ ដូច្នេះលោកស្រឡាញ់ចូលចិត្ត និងចង់ចូលរួមអភិវឌ្ឍន៍វិស័យកីឡានៅទីនេះឲ្យមានការរីកចម្រើផងដែរ។ នៅប្រទេសចិនមានភាពរីកចម្រើន និងសំបូរធនធានមានសមត្ថភាព ដូច្នេះលោកនឹងជួយរកគ្រូដែលមានបទពិសោធច្រើនមកបណ្ដុះបណ្ដាលគ្រូបង្វឹកកម្ពុជា និងបណ្ដុះកីឡាករ កីឡាការិនីបាល់ទាត់លើតុកម្ពុជាឲ្យកាន់តែមានសមត្ថភាពល្អ និងឈានដល់ការប្រកួតមួយដែលខ្លាំងលើឆាកអន្តរជាតិនៅថ្ងៃខាងមុខ។

ទិដ្ឋភាពចុះ MOU

បញ្ជាក់ដែរថា នៅព្រឹកថ្ងៃទី៦ ខែមេសា ឆ្នាំ២០២៦ នេះសហព័ន្ធកីឡាបាល់ទាត់លើតុកម្ពុជា បានចុះអនុស្សារណៈ (MOU) លើការឧបត្ថម្ភសំលៀកបំពាក់ចេញប្រកួតជាផ្លូវការ និងស្បែកជើង កាបូបជាដើមរយៈពេល ២ឆ្នាំ៕