វិបត្តិថាមពល៖ ថៃគ្រោងបិទស្ថានីយចាក់សាំងរាល់​យប់ក្រោយចូលឆ្នាំ ដើម្បីសន្សំថាមពល

ចំពេលដែលវិបត្តិថាមពលរាលដាលទូទាំងអាស៊ីអាគ្នេយ៍ នាយករដ្ឋមន្ត្រីថៃ លោក អានុទីន ឆានវីរៈគុណ បាន​ឱ្យដឹងកាលពីថ្ងៃអង្គារ (៧ មេសា) ថា រដ្ឋាភិបាលថៃគ្រោង​នឹងដាក់ចេញនូវវិធានការសន្សំសំចៃថាមពលថ្មីៗ បន្ទាប់ពី​ចប់បុណ្យ​ចូលឆ្នាំថៃ រួមទាំងការបិទស្ថានីយប្រេងឥន្ធនៈរាល់យប់ចន្លោះពីម៉ោង ១០ យប់ ដល់ម៉ោង ៥ ​ព្រឹក និងពន្យារពេលធ្វើការពីចម្ងាយសម្រាប់មន្ត្រីរាជការ។ នេះបើតាមការចុះផ្សាយរបស់បណ្ដាញព័ត៌មាន​ Thai PBS World។

ការកំណត់បិទស្ថានីយចាក់សាំង គ្រោងថានឹង​ចូលជាធរមាន​ចាប់ពីថ្ងៃទី ២០ ខែមេសាតទៅ ដោយ​មិនទាន់អនុវត្តភ្លាមៗទេ ដើម្បីសម្រួលដល់ការធ្វើដំណើរទៅលេងស្រុករបស់ប្រជាជនថៃអំឡុងចូលឆ្នាំ ដែលចាប់ផ្ដើមពីថ្ងៃទី ១៣ មេសា។ ​

មែនទែនទៅ វិធានការ​នេះមានគោលបំណងបង្កើនការ​រឹតបន្តឹងការប្រើប្រាស់ថាមពលជាតិ ចំពេលជម្លោះមជ្ឈិមបូព៌ានៅតែបន្ត។ ការឱ្យដឹងរបស់លោក អានុទីន ធ្វើឡើង ១ ថ្ងៃ មុនពេលប្រធានាធិបតីអាមេរិក ដូណាល់ ត្រាំ ប្រកាសបទឈប់បាញ់ជាមួយអ៊ីរ៉ង់រយៈពេល ២ សប្ដាហ៍ នៅថ្ងៃពុធនេះ ដែលអាចកាត់បន្ថយហានិភ័យផ្នែកផ្គត់ផ្គង់ថាមពលពីមជ្ឈិមបូព៌ា។

ទោះបីជាយ៉ាងណាក៏ដោយ ១ ថ្ងៃមុនការប្រកាសរបស់លោក អានុទីន ​ឧបនាយករដ្ឋមន្ត្រីថៃ លោក ប៉ាកន និលប្រាភុន (Pakorn Nilprapunt) បាន​និយាយក្រោយ​កិច្ចប្រជុំគណៈរដ្ឋមន្ត្រីពិសេសមួយថា រដ្ឋាភិបាលថៃកំពុងស្វែងរកមធ្យោបាយកាន់តែសកម្ម ដើម្បី​កាត់បន្ថយការប្រើប្រាស់ប្រេងឥន្ធនៈក្នុងស្រុក ខណៈ​តម្លៃថាមពលសកលនៅតែ​មាន​ការប្រែប្រួលខ្លាំង។

លោក​ ប៉ាកន បាន​បន្តថា លោក អានុទីន បានអនុញ្ញាតឱ្យប្រើប្រាស់បទប្បញ្ញត្តិមួយចំនួនក្រោមក្រឹត្យគ្រាអាសន្នឆ្នាំ ១៩៧៣ ស្តីពីការបង្ការកង្វះខាតប្រេងឥន្ធនៈ ដើម្បីគ្រប់គ្រងវិបត្តិ ដោយមានវិធានការសំខាន់ៗជាច្រើនដែលនឹងត្រូវអនុវត្តក្នុងពេលឆាប់ៗនេះ ដើម្បីដោះស្រាយបញ្ហាភស្តុភារ និងថាមពល។

លោក ប៉ាកន បាននិយាយទៀតថា ​គំនិតផ្តួចផ្តើមធ្វើការពី​ចម្ងាយរបស់រដ្ឋាភិបាល នឹងត្រូវ​ដាក់ចេញ ដើម្បីកាត់បន្ថយការធ្វើដំណើរ ដោយបញ្ជាក់ថា មន្ត្រីរាជការអាចចាប់ផ្តើម​អនុវត្តវិធានការនេះគ្រប់ទូទាំងស្ថាប័នរដ្ឋាភិបាលភ្លាមៗ។ ​

ដោយឡែកលោក អានុទីន​ បានសន្យាថា រដ្ឋាភិបាលនឹងមានយុទ្ធសាស្ត្រដ៏ទូលំទូលាយមួយ ដើម្បីកាត់បន្ថយផលប៉ះពាល់នៃ​កំណើន​តម្លៃថាមពលសកល ខណៈ​គណៈរដ្ឋមន្ត្រីកំពុងរៀបចំដោះស្រាយស្ថិរភាពសេដ្ឋកិច្ចរបស់ប្រទេស។

ដោយសារ​ថៃនាំចូលថាមពលប្រហែល ៥០% របស់ខ្លួនពីមជ្ឈិមបូព៌ា រដ្ឋាភិបាលកំពុងត្រៀមខ្លួនសម្រាប់​ការអូសបន្លាយនៃការចំណាយខ្ពស់​លើ​ប្រេងឥន្ធនៈ អគ្គិសនី និងផលិតផលគីមីឥន្ធនៈដូចជាជី និងផ្លាស្ទិកជាដើម​។

លោក អានុទីន ថ្លែងយ៉ាងដូច្នេះថា៖ «ជម្លោះ​បាន​តានតឹងឈានទៅដល់ការវាយប្រហារទៅលើទីកន្លែងផលិត និងហេដ្ឋារចនាសម្ព័ន្ធផ្សេងៗ​។ ទោះបីជាការប្រយុទ្ធគ្នាឈប់នៅថ្ងៃស្អែកក៏ដោយ ការស្តារឡើងវិញនឹងត្រូវការពេលវេលា។ យើងត្រូវតែកែសម្រួលរបៀបរស់នៅរបស់យើងដើម្បីប្រឈមមុខនឹងការពិតនេះ។ ឯកភាពជាតិគឺជាដើមទុនសង្គមដ៏សំខាន់បំផុតរបស់យើង​ក្នុងគ្រាលំបាកទាំងនេះ»៕