​គយ ​ផ្សព្វផ្សាយ​គោលនយោបាយ​បញ្ចុះពន្ធលើយានយន្តអគ្គិសនី និងទម្លាក់តម្លៃប្រេង

អគ្គនាយកដ្ឋានគយ ​និង​រដ្ឋាករកម្ពុជា ​បានផ្សព្វផ្សាយគោលនយោបាយរបស់រាជរដ្ឋាភិបាល ​ក្នុង​ការ​បញ្ចុះពន្ធ​ដើម្បីជួយ​ដល់ជីវភាព​របស់ប្រជាពលរដ្ឋ ​និង​កាត់បន្ថយ​តម្លៃប្រេងឥន្ធនៈ។​

ការផ្សព្វផ្សាយគោលនយោបាយនេះ ​បាន​ធ្វើឡើង​នៅ​ក្នុង​កិច្ចប្រជុំ​យន្តការ​ភាព​ជាដៃគូ​គយ-ផ្នែក​ឯក​ជន (CPPM) ​លើកទី១០ ​នៅថ្ងៃទី ០៧ មេសា ២០២៦ ក្រោមវត្តមាន​លោកបណ្ឌិត គុណ ញឹម​ រដ្ឋមន្ត្រី​ប្រតិភូ​អមនាយក​រដ្ឋមន្ត្រី ​អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា និងជាសហប្រធាន CPPM និងអ្នកឧកញ៉ា គិត ម៉េង ​ប្រធានសភា​ពាណិជ្ជកម្មកម្ពុជា ​ជា​សហប្រធាន CPPM ​និង​ជា​ប្រធានគណៈកម្មការ​សម្រប​​សម្រួល​ក្រុម​ការងារ​ផ្នែកឯកជន ​សម្រាប់​យន្តការ​វេទិការាជរដ្ឋាភិបាល-ផ្នែកឯកជន។​

​កិច្ចប្រជុំនេះត្រូវបានរៀបចំឡើងក្នុងគោលបំណងពិនិត្យ ​និង​ដោះស្រាយនូវបញ្ហា និងសំណូមពរនានារបស់វិស័យឯក​ជនពាក់ព័ន្ធនឹងការអនុវត្តនីតិវិធីគយ, ផ្សព្វផ្សាយអំពីគោលនយោបាយរបស់រាជរដ្ឋាភិបាលក្នុងការបញ្ចុះពន្ធដើម្បី​ជួយដល់ជីវភាពរបស់ប្រជាពលរដ្ឋ និងកាត់បន្ថយ តម្លៃប្រេងឥន្ធនៈ និងពិនិត្យលើសេចក្ដីព្រាងកញ្ចប់វិធានការមុតស្រួចក្នុងការទប់ស្កាត់ អំពើរត់គេចពន្ធ ​និងបន្លំពន្ធ ​និង​កិច្ចសម្រួលពាណិជ្ជកម្ម និងការពង្រឹងអភិបាលកិច្ចក្នុងរដ្ឋបាលគយ។​

​លោក គុណ ញឹម ​បានគូស​រំលេច​អំពីសារៈ​សំខាន់​នៃ​យន្តការ​ភាព​ជា​ដៃគូគយ-ផ្នែកឯកជន ដែល​ជា​យន្តការ​ការងារដ៏មានប្រសិទ្ធភាព​ក្នុង​ការដោះស្រាយបញ្ហាជួបប្រទះដោយ​ផ្នែកឯកជន​ពាក់ព័ន្ធ​នឹង​ការប្រកបធុរកិច្ចនាំចេញ-នាំចូល ក៏ដូច​ជាការអនុវត្តនីតិវិធីគយនានា។

​លោកបណ្ឌិត គុណ ញឹម​ ក៏បានវាយតម្លៃខ្ពស់ចំពោះលទ្ធផលការងារ​ដែលអភិក្រមនៃការ​សហការគ្នាជិត​ស្និត​រវាងគយ ​និង​ផ្នែកឯកជនសម្រេចបានពេលកន្លងមកដូចជា ​ការដោះស្រាយបញ្ហារបស់​ផ្នែកឯក​ជន​ក្នុង​គោល​ដៅ​លើក​កម្ពស់​អនុលោមភាព ​និង​កិច្ចសម្រួលពាណិជ្ជកម្ម ​ដែលមានជាអាទិ៍​ ការ​បង្កើន​ការ​យល់ដឹង​របស់​ផ្នែកឯកជនពាក់ព័ន្ធនឹងច្បាប់ ​បទប្បញ្ញត្តិ ​និង​នីតិវិធីគយ,​ ការលើកសំណើ​កែសម្រួល​អត្រា​ពន្ធ និងអាករ, ការដាក់ចេញនូវនីតិវិធីសម្រួល​ពាណិជ្ជកម្មដល់​ធុរជនដែលមាន​អនុ​លោមភាពខ្ពស់, ការធ្វើស្វ័យប្រវត្តិកម្មនីតិវិធីគយ, ការកាត់បន្ថយកម្រៃនៃការបំពេញបែបបទ​បញ្ចេញ​ទំនិញពី​គយ​និង​កម្រៃស្គែន ជាដើម។

​តំណាងអគ្គនាយកដ្ឋានគយ ​និង​រដ្ឋាករកម្ពុជា​បានធ្វើបទបង្ហាញអំពីបច្ចុប្បន្នភាព​ការងារ​ពាក់​ព័ន្ធ​​សមត្ថកិច្ច​របស់អគ្គនាយកដ្ឋានគយ ​និងរដ្ឋាករកម្ពុជាមួយចំនួន ដែលជាវិធានការរបស់​រាជរដ្ឋា​ភិបាល​ដាក់ចេញ​ដើម្បីសម្រាលបន្ទុករបស់ធុរជន ​និងប្រជាពលរដ្ឋ​ ក្នុងស្ថានការណ៍​នៃ​ការ​កើន​ឡើង​ខ្ពស់នៃតម្លៃប្រេងឥន្ធនៈជាសកល ដែលរួមមាន ១.​ការកែ​សម្រួល​អត្រាពន្ធ​ និង​អាករសម្រាប់​អនុវត្ត​ចាប់ពីថ្ងៃទី១ ​ខែ​មេសា ឆ្នាំ២០២៦ ​ដែល​មានខ្លឹម​សារចម្បងគឺការបញ្ចុះពន្ធគយ​លើយាន​យន្ត​អគ្គិសនី, ​អាគុយ, បរិក្ខារសូឡា, ​និង​ចង្ក្រានអគ្គិសនី​ ដែលជាសម្ភារៈប្រើប្រាស់​ចាំបាច់ប្រចាំថ្ងៃ​របស់​ប្រជាពលរដ្ឋ និង២.​ការបន្ធូរបន្ថយបន្ទុកពន្ធ ​និង​អាករនាំចូលប្រេង ​និង​ឧស្ម័នឥន្ធនៈ ដើម្បជួយ​បញ្ចុះ​តម្លៃ ​និង​ធានា​និរន្តរភាព​នៃ​ការ​ផ្គត់ផ្គង់​។

​តាមការប៉ាន់ស្មានជាបឋម ការអនុវត្តវិធានការទាំងពីរ នេះនឹងធ្វើឱ្យអគ្គនាយកដ្ឋាន​គយនិង​រដ្ឋាករ​កម្ពុជាបាត់បង់ចំណូលប្រមាណ ៤៧ លានដុល្លារអាម៉េរិក ក្នុងមួយខែ។ ​

​បន្ថែមពីលើនេះ តំណាង​អគ្គនាយកដ្ឋានគយនិងរដ្ឋាករកម្ពុជា​ក៏បានធ្វើបទបង្ហាញស្ដីពីសេចក្ដីព្រាង​កញ្ចប់វិធានការមុតស្រួចក្នុងការទប់ស្កាត់អំពើរត់គេចពន្ធនិងបន្លំពន្ធ និងកិច្ចសម្រួលពាណិជ្ជកម្ម និងការពង្រឹងអភិបាលកិច្ចក្នុងរដ្ឋបាលគយ ​ដើម្បីស្នើការពិនិត្យ​ ក៏ដូចជាការផ្ដល់​ធាតុចូល​បន្ថែម​ពី​ផ្នែក​ឯកជន។​

​កិច្ចប្រជុំបានពិនិត្យ និងពិភាក្សាលើបញ្ហា សំណូមពរ និងសំណើដំណោះស្រាយ​លើកឡើង​ដោយ​ផ្នែកឯកជន ចំនួន ១០ បញ្ហារួមមាន ការប្រកាសនាំចូល និងការដឹកជញ្ជូនក្នុងផ្ទៃ​ប្រទេសនូវធាតុ​ចូលផលិតកម្ម (ក្រណាត់) ដោយគម្រោង​វិនិ​យោគ​មានលក្ខណៈសម្បត្តិគ្រប់គ្រាន់ (QIPs), កម្រៃបំពេញបែបបទគយ, ចំណាត់ថ្នាក់តាមតារាងពន្ធគយនូវផលិតផលសុខាភិបាល, ការកំណត់លក្ខណៈសម្បត្តិរថយន្តថ្មី ដើម្បីអនុវត្តនីតិវិធីនាំចូលរថយន្តជាប់សិទ្ធិផ្ដាច់មុខ, សំណើកែ​សម្រួល​ការអនុវត្តពន្ធ និងអាករលើសន្និធិពាណិជ្ជកម្មប្រេង និងឧស្ម័នឥន្ធនៈ និងពន្ធលើ​ប្រេងសាំងយន្តហោះជាដើម។​

​ជាលទ្ធផលនៃកិច្ចពិភាក្សា ផ្នែកឯកជនបានស្វាគមន៍ ​និង​ទទួល​យកនូវការបំភ្លឺ​ និងដំណោះស្រាយ​ដោយ​អគ្គនាយកដ្ឋានគយនិងរដ្ឋាករកម្ពុជា​ ហើយចំពោះចំណុចសេសសល់ដែល​ពាក់ព័ន្ធសមត្ថកិច្ច​ច្រើនស្ថាប័ននឹងបន្តពិភាក្សារកដំ​ណោះស្រាយជាមួយគ្នាបន្តទៀត៕​