ពលរដ្ឋស្នើឲ្យអាជ្ញាធរស្រុកស្នួល​ចុះរៀបចំសណ្ដាប់​ធ្នាប់ជុំវិញផ្សារការ ៣

ពលរដ្ឋដែលធ្វើដំណើរឆ្លងកាត់ស្រុកស្នួល ខេត្តក្រចេះ ឆ្ពោះទៅខេត្តមណ្ឌលគិរីស្នើសុំឲ្យអាជ្ញាធរស្រុក ឃុំ មានសមត្ថកិច្ច ជួយរៀបចំសន្តិសុខសណ្ដាប់ធ្នាប់សាធារណៈនៅជុំវិញបរិវេណផ្សារកា៣ ស្ថិតក្នុងឃុំក្រញូង​សែនជ័យ ស្រុកស្នួល ខេត្តក្រចេះ។

ពលរដ្ឋលើកឡើងថា នៅត្រង់ចំណុច​ផ្សារកា ៣ ផ្ទាល់តែម្តង ជារៀងរាល់ថ្ងៃគឺគ្មានសណ្តាប់ធ្នាប់ និងរបៀបរៀបរយឡើយ ការឈប់ចតរម៉ក ម៉ូតូ រថយន្ត យ៉ាងអាណាធិបតេយ្យ បង្កការកកស្ទះការធ្វើចរាចរណ៍ទៅមករបស់ពលរដ្ឋ និងភ្ញៀវទេសចរណ៍ដែលមានបំណងទៅលេងកំសាន្តខេត្តនៅភាគឦសាន្ត ដូចជា ខេត្តមណ្ឌលគិរី និងខេត្តរតនៈគិរី ជាដើម។

ពលរដ្ឋក៏បានស្នើសុំឲ្យអាជ្ញាធរស្រុកមានសមត្ថកិច្ច និងអាជ្ញាធរឃុំក្រញូង​សែនជ័យ មេត្តាចុះត្រួតពិនិត្យរៀបចំសណ្ដាប់​ធ្នាប់ផ្សារកា ៣ ឡើងវិញ ដើម្បីបញ្ជៀសការកកស្ទះ បង្ការបញ្ហាគ្រោះថ្នាក់ចរាចរណ៍ បរិស្ថានស្អាត មានអនាម័យ ផាសុខភាព និងដើម្បីសោភណភាពជុំវិញផ្សារថែមទៀតផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាការឆ្លើយតបតាមការលើកឡើងពីប្រជាពលរដ្ឋ លោក សាម ណាល់ អភិបាលស្រុកស្នួលបានឲ្យដឹងនៅព្រឹកថ្ងៃទី១០ ខែមេសា ឆ្នាំ២០២៦ នេះថា ការចុះរៀបចំសណ្ដាប់ធ្នាប់ផ្សារកា៣ នេះ គឺជានិច្ចកាល រដ្ឋបាលស្រុកស្នួលតែងតែដឹកនាំកម្លាំងអធិការរដ្ឋាននគរបាលស្រុក និងរដ្ឋបាលឃុំក្រញ៉ូងសែនជ័យ និងនគរបាលប៉ុស្តិ៍រដ្ឋបាលឃុំ ចុះរៀបចំ និងបានអប់រំណែនាំ ព្រមទាំងបានធ្វើកិច្ចសន្យាជាមួយអាជីវករជារៀងរាល់ខែផងដែរ ប៉ុន្តែប្រជាពលរដ្ឋ អាជីវករលក់ដូរ ជាពិសេស ម្ចាស់ផ្ដល់ទីតាំងកន្លែងលក់ដូរ ហាក់បីដូចជាមិនមានការចូលរួមសហការជាមួយអាជ្ញាធរទាល់តែសោះ ពេលអាជ្ញាធរចុះទៅ ពួកគាត់ធ្វើតាមការណែនាំ ពេលអាជ្ញាធរត្រឡប់មកវិញ ក៏​ចូលលក់ដូរធម្មតា និងទុកដាក់រម៉ក ម៉ូតូ ពាសពេញផ្លូវ ពោលគឺប្រៀបបានទៅនឹងការវែកចកដូច្នេះដែរ។

លោកបានបញ្ជាក់ថា កាលពីថ្ងៃទី៥ ខែមេសា ឆ្នាំ២០២៦ កន្លងទៅ កម្លាំងប៉ុស្តិ៍នគរបាលរដ្ឋបាលគ្រញូងសែនជ័យ នៃអធិការដ្ឋាននគរបាលស្រុកស្នួល សហការជាមួយឃុំ កម្លាំងស្នាក់ការសន្តិសុខ ៧០៩ បានចុះរៀបចំសណ្តាប់ធ្នាប់ និងសម្រួលចរាចរណ៍ នៅចំណុចផ្សារកាបី ស្ថិតនៅភូមិសែនអភិវឌ្ឍន៍ ឃុំគ្រញូងសែនជ័យ ស្រុកស្នួល ខេត្តក្រចេះ រួចហើយ ប៉ុន្តែឥឡូវនៅតែដដែល។

លោក បានឲ្យដឹងទៀតថា ចំពោះអ្នកដែលផ្ដល់ទីតាំង ឬជួលកន្លែងឲ្យពលរដ្ឋលក់ដូរ ក្នុងករណីរកឃើញថាមិនគោរពតាមគោលការណ៍ណែនាំនោះទេ រដ្ឋបាលស្រុកនឹងអនុវត្តកសាងសំនុំរឿងតាមនីតិវិធីរដ្ឋបាលបញ្ជូនទៅសាលាដំបូងខេត្តក្រចេះតែម្តង៕

អត្ថបទ៖ ប្រុញ វិធិន