រុស្ស៊ីបញ្ជាក់ពីការស្វាគមន៍យោធាកម្ពុជា ក្នុងការផ្លាស់ប្ដូរបទពិសោធការងារភូមិសាស្ត្រយោធា

មន្ត្រីទីចាត់ការភូមិសាស្ត្រយោធា នៃអគ្គសេនាធិការកងទ័ពរុស្ស៊ី វរសេនីយ៍ឯក Denis MAMONENKOV បញ្ជាក់ពីការបន្តពង្រឹងកិច្ចសហប្រតិបត្តិការលើវិស័យយោធាជាមួយកម្ពុជា ដោយលោកសង្កត់ធ្ងន់ដល់ជំនាញភូមិសាស្ត្រយោធា។ តាមមន្ត្រីយោធារុស្ស៊ីរូបនេះ ប្រទេសរបស់លោកស្វាគមន៍ចំពោះមន្ត្រីយោធាកម្ពុជា ក្នុងការផ្លាស់ប្ដូរបទពិសោធការងារលើភូមិសាស្ត្រយោធា។

ការបញ្ជាក់របស់មន្ត្រីយោធារុស្ស៊ីបែបនេះ ធ្វើឡើងតាមរយៈជំនួបសន្ទនាជាមួយរដ្ឋលេខាធិការក្រសួងការពារជាតិកម្ពុជា លោកនាយឧត្តមសេនីយ៍ ឯល វ៉ាន់សារ៉ាត់ កាលពីថ្ងៃទី៨​ ខែមេសា ឆ្នាំ២០២៦ ដោយភាគីទាំងពីរបានផ្ដោតជាសំខាន់លើការពង្រឹងពង្រីកនូវកិច្ចសហប្រតិបត្តិការលើវិស័យយោធារវាងប្រទេសទាំងពីរ ដែលមានប្រវត្តិយូរលង់មកហើយឱ្យកាន់តែរឹងមាំប្រសើរឡើងថែមទៀត។

លោកវរសេនីយ៍ឯក Denis MAMONENKOV បានរាយការណ៍ពីលទ្ធផលជំនួបពិភាក្សារបស់ប្រតិភូកងទ័ពរុស្ស៊ី និងនាយកដ្ឋានភូមិសាស្ត្រ នៃក្រសួងការពារជាតិកម្ពុជា ដែលបានឯកភាពបន្តពង្រឹងកិច្ចសហប្រតិបត្តិការនៃអង្គភាពជំនាញទាំងពីរនេះ។ លោកបញ្ជាក់ថា រុស្សីត្រៀមខ្លួនជាស្រេចទទួលគណៈប្រតិភូកងយោធពលខេមរភូមិន្ទ ដើម្បីធ្វើទស្សនកិច្ចផ្លាស់ប្ដូរបទពិសោធការងារភូមិសាស្ត្រយោធា នៅប្រទេសរុស្ស៊ី។

លើកឡើងក្នុងជំនួបនោះ លោកវរសេនីយ៍ឯក បានសន្យាថា ខិតខំពង្រឹងពង្រីកទំនាក់ទំនងរវាងកងទ័ពនៃប្រទេសទាំងពីរឱ្យបានល្អប្រសើរឡើងថែមទៀត។  

នាយឧត្តមសេនីយ៍ ឯល វ៉ាន់សារ៉ាត់ បានគូសរំលេចពីការវិវត្តដ៏ល្អប្រសើរឡើងវិញនៃទំនាក់ទំនង និងកិច្ចសហប្រតិបត្តិការរវាងកងទ័ពប្រទេសទាំងពីរ កម្ពុជា-រុស្សី តាមរយ:ការផ្លាស់ប្តូរទស្សនកិច្ចទៅវិញទៅមកជាបន្តបន្ទាប់។ ជាក់ស្តែងការសហការគ្នាជាបណ្ដើរៗដ៏មានសារសំខាន់រវាងនាយទាហាននាយកដ្ឋានភូមិសាស្ត្រ នៃកងទ័ពទាំងពីរ។

លោករដ្ឋលេខាធិការ បានបង្ហាញក្ដីជឿជាក់ថា កិច្ចសហប្រតិបត្តិការនេះ និងបន្តរឹងមាំទៅអនាគត ដើម្បីផលប្រយោជន៍រវាងគ្នានិងគ្នាទៅវិញទៅមក៕