ព័ត៌មានអន្ដរជាតិ

អ៊ីរ៉ង់ប្រសិទ្ធនាម «ជើងហោះហើរចេញទៅចរចាជាមួយអាមេរិក» ដោយដាក់ឈ្មោះសាលាក្មេងស្រីដែលអាមេរិកវាយប្រហារថ្ងៃដំបូង

បានផុស

២ សប្តាហ៍ មុន

នៅ

ថ្ងៃសៅរ៍ ១១ មេសា ២០២៦

ដោយ

ការចរចាសន្តិភាពកម្រិតខ្ពស់រវាងសហរដ្ឋអាមេរិកនិងអ៊ីរ៉ង់ ក្រោយផ្ទុះសង្គ្រាមដ៏សាហាវប្រមាណ៤០ថ្ងៃ កំពុងក្តាយជាប្រធានបទនៃការតាមដានរបស់មនុស្សក្នុងសកលលោក ខណៈដែលការចរចានេះបានក្លាយជាការពិត ហើយ អាចនឹងចាប់ផ្តើមនៅព្រឹកថ្ងៃសៅរ៍ម៉ោងនៅទីក្រុងអ៊ីស្លាមម៉ាបាដ ប្រទេសប៉ាគីស្ថាន (អាចត្រូវនឹងម៉ោងជិតត្រង់ម៉ោងនៅកម្ពុជា)។

ដំណើរនៃគណៈប្រតិភូនៃប្រទេសនិមួយៗសុទ្ធតែទទួលបានការចាប់អារម្មណ៍ខ្លាំងពីសំណាក់មេដឹកនាំពិភពលោក អ្នកការទូត អ្នកតាមដានកិច្ចការនយោបាយ និងប្រជាជនទូទៅ ដោយសារតែការចរចានេះផ្តើមចេញពីជម្លោះរបស់មហាអំណាច និងប្រទេសដែលមានឥទ្ធិពលនៅក្នុងតំបន់មជ្ឈិមបូព៌ា គឺអ៊ីរ៉ង់ដែលរងការចោទថា បានប៉ុនប៉ងផលិតអាវុធនុយក្លេអ៊ែរ។

ការបើកការវាយប្រហាររបស់សហរដ្ឋអាមេរិកលើប្រទេសអ៊ីរ៉ង់ បានបង្កើតនូវការឈឺចាប់និងសោកនាដកម្មបំផុតមួយកាលថ្ងៃទី២៨ខែកុម្ភៈ ដោយការបាញ់ប្រហារធ្លាក់ចំសាលារៀនរបស់សិស្សស្រីបណ្តាលឲ្យស្លាប់យ៉ាងហោចណាស់១៦៨នាក់។

មានការកត់សម្គាល់ថា អ៊ីរ៉ង់បានប្រសិទ្ធនាម ជើងហោះហើររបស់គណៈប្រតិភូអ៊ីរ៉ង់ដែលដាក់ឈ្មោះតាមការវាយប្រហារដ៏សាហាវលើសាលារៀនសិស្សនោះ គឺ ជើងហោះហើរ “Minab 168” ដែលសំដៅដល់ការស្លាប់ពីការបាញ់ប្រហាររបស់សហរដ្ឋអាមេរិកនិងអ៊ីស្រាអែល។

យោងតាម BBC ក្បួនយនហោះរបស់គណៈប្រតិភូអ៊ីរ៉ង់ បានចេញផ្សាយនៅម៉ោង ០៦:១០ ព្រឹកថ្ងៃសៅរ៍នេះ ខណៈគណៈប្រតិភូអាមេរិកបានទៅដល់ប្រទេសប៉ាគីស្ថានតាំងពីថ្ងៃសុក្រ។

យោងតាមរដ្ឋាភិបាលអ៊ីរ៉ង់ គណៈប្រតិភូអ៊ីរ៉ង់ដែលបានមកដល់ប្រទេសប៉ាគីស្ថានមុននេះ បានហោះហើរសម្រាប់កិច្ចចរចាសន្តិភាពនៅលើជើងហោះហើរមួយដែលដាក់ឈ្មោះតាមសាលារៀនសិស្សស្រីអ៊ីរ៉ង់ដែលត្រូវបានវាយប្រហារនៅថ្ងៃដំបូងនៃសង្គ្រាម។

ជើងហោះហើរ «Minab 168» គឺដើម្បីផ្តលកិត្តិយសដល់មនុស្ស 168 នាក់ ដែលភាគច្រើនជាកុមារ ដែលមន្ត្រីអ៊ីរ៉ង់និយាយថា ត្រូវបានសម្លាប់នៅក្នុងការវាយប្រហារដោយមីស៊ីលនៅថ្ងៃទី ២៨ ខែកុម្ភៈ ដែលបានបំផ្លាញសាលាបឋមសិក្សាក្មេងស្រី Shajareh Tayyebeh ក្នុងទីក្រុង Minab ប្រទេសអ៊ីរ៉ង់។

របាយការណ៍ស៊ើបអង្កេតកន្លងមកដែលបានផ្សាយដោយប្រព័ន្ធផ្សព្វផ្សាយ បានបង្ហាញថា អ្នកស៊ើបអង្កេតយោធាអាមេរិកជឿថា កងកម្លាំងអាមេរិកទំនងជាទទួលខុសត្រូវចំពោះការបាញ់ប្រហារសាលារៀនដោយអចេតនា។ រដ្ឋមន្ត្រីក្រសួងការពារជាតិអាមេរិក Pete Hegseth ពីមុនបាននិយាយថា បញ្ហានេះកំពុងត្រូវបានស៊ើបអង្កេត។

បន្ទាប់ពីចុះចតនៅប្រទេសប៉ាគីស្ថានមុននេះ ប្រធានសភាអ៊ីរ៉ង់ Mohammad-Bagher Ghalibaf បានបង្ហោះរូបភាពមួយនៅលើ X ដែលបង្ហាញរូបថតកុមារបួននាក់ដែលដាក់នៅលើកៅអីនៅលើយន្តហោះ ដែលម្នាក់ៗស្ថិតនៅពីលើកាបូបស្ពាយរបស់កុមារ និងផ្កាមួយ។

យោង BBC លោក Ghalibaf និយាយនៅក្នុងការបង្ហោះរបស់គាត់ ថា«ដៃគូរបស់ខ្ញុំនៅលើជើងហោះហើរនេះ»៕

រ៉ាន់ រើយ