ត្រាំ ប្រកាសបន្តបទឈប់បាញ់ជាមួយ អ៊ីរ៉ង់

ប្រមុខសេតវិមាន ដូណាល់ ត្រាំ បានប្រកាសបន្តបទឈប់បាញ់ជាមួយអ៊ីរ៉ង់ តាមសំណើរបស់ប្រទេសប៉ាគីស្ថាន ហើយបទឈប់បាញ់ថ្មីនេះនឹងបន្តរហូតដល់ការចរចាជាមួយទីក្រុងតេហេរ៉ង់ ត្រូវបានបញ្ចប់ ប៉ុន្តែនៅតែបន្តបិទខ្ទប់ផ្លូវទឹករបស់ទីក្រុងតេហេរ៉ង់ដដែល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានាធិបតីអាមេរិកបានបញ្ជាក់បែបនេះនៅលើបណ្តាញសង្គម Truth Social កាលពីថ្ងៃអង្គារទី២១ខែមេសាឆ្នាំ២០២៦ ដោយលោកបង្ហោះសារថា៖ «ដោយផ្អែកលើអង្គហេតុថា រដ្ឋាភិបាលអ៊ីរ៉ង់កំពុងមានការបែកបាក់គ្នាយ៉ាងខ្លាំង ដែលវាមិនមែនជារឿងគួរឲ្យភ្ញាក់ផ្អើលទេនោះ ហើយនិងតាមសំណើរបស់សេនាប្រមុខ Asim Munir និងនាយករដ្ឋមន្ត្រី Shehbaz Sharif នៃប្រទេសប៉ាគីស្ថាន យើងត្រូវបានគេស្នើសុំឲ្យផ្អាកការវាយប្រហារលើអ៊ីរ៉ង់ រហូតដល់ពេលដែលមេដឹកនាំ និងតំណាងរបស់ពួកគេ អាចដាក់ចេញនូវសំណើដ៏ឯកភាពមួយ»។

យ៉ាងណា មេដឹកនាំប្រទេសមហាអំណាចផុតលេខរូបនេះអះអាងថា លោកបានបញ្ជាឲ្យកងទ័ពអាមេរិក បន្តការបិទខ្ទប់ផ្លូវទឹកអ៊ីរ៉ង់ ហើយក្នុងទិដ្ឋភាពផ្សេងទៀត ត្រូវរក្សាការត្រៀមខ្លួន និងសមត្ថភាពឲ្យបានខ្ជាប់ខ្ជួន។ បទឈប់បាញ់ដែលត្រូវផុតកំណត់ក្នុងរយៈពេលប៉ុន្មានម៉ោងខាងមុខ នឹងពន្យារពេល រហូតដល់ទីក្រុងតេហេរ៉ង់ ដាក់សំណើ ហើយកិច្ចពិភាក្សាត្រូវបានបញ្ចប់ មិនថាតាមផ្លូវណាមួយនោះទេ។

សូមជម្រាបថា បទឈប់បាញ់២សប្តាហ៍រវាងអាមេរិកនិងអ៊ីរ៉ង់ ត្រូវផុតកំណត់នៅថ្ងៃពុធនេះ ខណៈភាគីទាំងពីរបានចោទគ្នាទៅវិញទៅមកថា បំពានបទឈប់បាញ់ក្នុងរយៈពេល១៤ថ្ងៃ។

ក្រោយមានការឯកភាពគ្នា ភាគីទាំងពីរក៏រៀបចំកិច្ចចរចានៅទីក្រុងអ៊ីស្លាម៉ាបាដ ប្រទេសប៉ាគីស្ថាន ដើម្បីស្វែងរកផ្លូវឈានឆ្ពោះទៅរកកិច្ចព្រមព្រៀងសន្តិភាព តែអ្វីៗត្រូវបរាជ័យព្រោះអ៊ីរ៉ង់អះអាងថា ខ្លួនមិនអាចទទួលយកលក្ខខណ្ឌដែលអាមេរិកដាក់មកបានទេ។

បន្ទាប់ពីនោះ ប៉ាគីស្ថានក៏ខ្នះខ្នែងរៀបចំជំនួបលើកទី២ ប៉ុន្តែទីក្រុងតេហេរ៉ង់ប្រាប់ថា ខ្លួននឹងមិនចូលរួមឡើយ ហើយមកទល់ពេលនេះ ក៏គ្មានប្រតិភូអ៊ីរ៉ង់ណាម្នាក់ ចាកចេញពីប្រទេសទៅចរចាជាមួយអាមេរិកនៅ អ៊ីស្លាម៉ាបាដ ដែរ៕

អត្ថបទ៖ សុខ សុវណ្ណ