រឿងព្រំដែន៖ ទោះយន្តការការទូតសង្ឃឹមត្រឹម១ភាគរយ ក៏សម្ដេច ហ៊ុន ម៉ាណែត ជ្រើសយកយន្តការនេះជាជាងការប្រយុទ្ធគ្នា

នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត នៅព្រឹកថ្ងៃសៅនេះ បានប្រកាសជាថ្មីពីការជ្រើសរើសយកយន្តការការទូតសម្រាប់ដំណោះស្រាយបញ្ហាជម្លោះព្រំដែនដ៏ចម្រូងចម្រាសជាមួយប្រទេសថៃ។ បើទោះយន្តការការទូតសង្ឃឹមត្រឹម១ភាគរយ ក៏សម្ដេចនាយករដ្ឋមន្ត្រីនៅតែជ្រើសយកការប្រើប្រាស់យន្តការដោយសន្តិវិធីនេះ ជាជាងការប្រយុទ្ធគ្នាដោយអាវុធ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្ដេចធិបតី បាននិយាយថា «បើសិនយន្តការការទូត សល់តែ១ភាគរយ ដែលអាចដោះក៏ដោយ មិនទាន់បិទផ្លូវ ឬងាប់នោះទេ គឺខ្ញុំត្រូវតែព្យាយាមវាឱ្យអស់លទ្ធភាពសិន»។ ការថ្លែងរបស់សម្ដេចធិបតីបែបនេះ បានធ្វើឡើងនៅក្នុងពិធីបើកការដ្ឋានសាងសង់គម្រោងគ្រប់គ្រងធនធានទឹកចម្រុះហ្វូណនតេជោ កំណាត់ទី២ នៅឯខេត្តតាកែវ។

ការសម្រេចចិត្តបែបនេះ ពីព្រោះថាមិនចង់ឱ្យមានការបង្ហូរឈាមទៀតរវាងប្រជាជាតិទាំងពីរ កម្ពុជា និងថៃ។ សម្ដេចធិបតី ហ៊ុន ម៉ាណែត បានសង្កត់ធ្ងន់ថា ការដោះស្រាយដោយសន្តិវិធី គឺជាអ្វីដែលរាជរដ្ឋាភិបាលកម្ពុជាត្រូវតែធ្វើក្នុងកិច្ចការពារអធិបតេយ្យ និងបូរណភាពទឹកដី ដោយគ្រប់យន្តការ និងមធ្យោបាយទាំងអស់ដែលមិនបង្ហូរឈាម គឺជាអាទិភាពធំបំផុតក្នុងការដោះស្រាយបញ្ហា។

សម្ដេចធិបតី ហ៊ុន ម៉ាណែត នៅតែអះអាងពីការមិនបោះបង់ចោលឡើយនូវសិទ្ធិទាមទារទឹកដីស្របច្បាប់របស់កម្ពុជាមកវិញ ដែលថៃបានកាន់កាប់ដោយខុសច្បាប់ តាមរយៈសកម្មភាពឈ្លានពានដោយកម្លាំងយោធាថៃ។ សម្ដេចនាយករដ្ឋមន្រ្តីកម្ពុជា ក៏បានង្ហាញក្ដីរំពឹងថា ថៃនឹងងាកមករកការដោះស្រាយបញ្ហាព្រំដែនដោយសន្តិវិធី តាមយន្តការ និងកិច្ចព្រមព្រៀង សន្ធិសញ្ញា អនុសញ្ញា ដែលមានស្រាប់រវាងប្រទេសទាំងពីរ៕

ដោយ៖​ធឿន​ វ៉ាន់សុង