ព័ត៌មានអន្ដរជាតិ

UN៖ ទោះមានបទឈប់បាញ់ ប៉ុន្តែអ៊ីស្រាអែលនៅតែវាយប្រហារប៉ាឡេស្ទីនរៀងរាល់ថ្ងៃ ដោយមិនញញើតដៃ

បានផុស

៣ ខែ មុន

នៅ

ថ្ងៃសៅរ៍ ១១ មេសា ២០២៦

ដោយ

ប្រាំមួយខែ បន្ទាប់ពីបទឈប់បាញ់ត្រូវបានប្រកាសជាផ្លូវការរវាងអ៊ីស្រាអែលនិងក្រុមហាម៉ាសប៉ាឡេស្ទីននៅតំបន់ហ្គាហ្សា ប្រធានសិទ្ធិមនុស្សរបស់អង្គការសហប្រជាជាតិ (UN) លើកឡើងថា ប្រជាជនប៉ាឡេស្ទីននៅតំបន់ហ្គាហ្សានៅតែស្ថិតក្នុងគ្រោះថ្នាក់ធ្ងន់ធ្ងរ ខណៈការវាយប្រហាររបស់អ៊ីស្រាអែលនៅតែបន្តជារៀងរាល់ថ្ងៃ។ នេះបើយោងតាមសារព័ត៌មាន Al Jazeera។

ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស លោក Volker Turk លើកឡើងថា៖ « វាពិបាកក្នុងការដោះស្រាយរឿងនេះជាមួយនឹងបទឈប់បាញ់។ អ៊ីស្រាអែលបានសម្លាប់ប្រជាជនប៉ាឡេស្ទីនជាង ៧០០នាក់ ចាប់តាំងពីបទឈប់បាញ់ចូលជាធរមាននៅក្នុងខែតុលា ឆ្នាំ ២០២៥ »។

ឧត្តមស្នង UN ទទួលបន្ទុកសិទ្ធិមនុស្ស លោក Volker Turk. រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មិនតែប៉ុណ្ណោះ មានប្រជាជនប៉ាឡេស្ទីនយ៉ាងហោចណាស់ចំនួន ៣២នាក់ ត្រូវបានសម្លាប់ដោយកងកម្លាំងអ៊ីស្រាអែលចាប់តាំងពីដើមខែមេសា ឆ្នាំ២០២៦។

ចំណែកជនរងគ្រោះរួមមានក្មេងស្រីសិស្សសាលាថ្នាក់ទី៣ ម្នាក់ ត្រូវបានបាញ់សម្លាប់នៅក្នុងថ្នាក់រៀនបណ្ដោះអាសន្នរបស់នាងនៅឯភាគខាងជើងតំបន់ហ្គាហ្សា និងអ្នកកាសែតរបស់ Al Jazeera លោក Mohamed Washah ក៏ត្រូវបានសម្លាប់ដោយការវាយប្រហារដ្រូនរបស់អ៊ីស្រាអែល មកលើរថយន្តរបស់គាត់ផងដែរ។

លោក Volker លើកឡើងថា៖ « ប្រជាជនប៉ាឡេស្ទីនគ្មានផែនការសម្រាប់ការរស់រានមានជីវិតទេ។ អ្វីដែលពួកគេធ្វើបាន ឬមិនបាន កន្លែងណាដែលពួកគេទៅឬមិនទៅ គឺគ្មានសុវត្ថិភាព ឬផ្តល់ការការពារដល់ពួកគេនោះទេ»។

លោក Turk បន្ថែមថា៖ « គំរូនៃការសម្លាប់ដែលឆ្លុះបញ្ចាំងពីភាពមិនអើពើជាបន្តបន្ទាប់ ចំពោះជីវិតប៉ាឡេស្ទីនអាចធ្វើទៅបានដោយភាពគ្មានទោសពៃរ៍យ៉ាងទូលំទូលាយ។ សហគមន៍អន្តរជាតិត្រូវតែធ្វើសកម្មភាពឱ្យមានអត្ថន័យបំផុត ហួសពីពាក្យសម្តីជាក់ស្តែង និងចាត់វិធានការបន្ទាន់លើទង្វើអ៊ីស្រាអែល»។

គួរបញ្ជាក់ថា យោងតាមក្រសួងសុខាភិបាលហ្គាហ្សា មានអង្គការសហប្រជាជាតិនិងអ្នកជំនាញឯករាជ្យបានឱ្យដឹងថា ពលរដ្ឋប៉ាឡេស្ទីនជាង ៦១ ៧០០នាក់ ត្រូវបានសម្លាប់ដោយអ៊ីស្រាអែលចាប់តាំងពីថ្ងៃទី៧ ខែតុលា ឆ្នាំ ២០២៣ ។ ក្រសួងកត់សម្គាល់ថា ប្រហែលពាក់កណ្តាលនៃអ្នកស្លាប់គឺជាស្ត្រី និងកុមារ៕

ប្រែសម្រួល៖ ណឺ មិនា