ព័ត៌មានជាតិ

តំបន់អេកូទេសចរណ៍សម្រស់កោះហាន ភូមិសាស្រ្តកណ្ដាលទន្លេ ខ្យល់ត្រជាក់ បរិស្ថានស្អាត ភ្ញៀវទេសចរទៅលេងរាល់ថ្ងៃ

បានផុស

១ សប្តាហ៍ មុន

នៅ

ថ្ងៃព្រហស្បតិ៍ ១៦ មេសា ២០២៦

ដោយ

ស្រុកបុរីអូរស្វាយសែនជ័យក្នុងខេត្តស្ទឹងត្រែង មានសហគមន៍អេកូទេសចរណ៍ចំនួន ៣ ក្នុងនោះមានសហគមន៍អេកូទេសចរណ៍សម្រស់កោះហាន សហគមន៍អេកូទេសចរណ៍បុរីអូរស្វាយ និងសហគមន៍អេកូទេសចរណ៍ព្រះរំកិល។

ក្រៅពីនេះក៏មានសហគមន៍ព្រៃឈើចំនួន ៣ និងសហគមន៍នេសាទចំនួន ៣។ នេះបើតាមលោក ផាន់ យុទ្ធ អភិបាលស្រុកបុរីអូរស្វាយសែនជ័យខេត្តស្ទឹងត្រែង។

លោក ផាន់ យុទ្ធ អភិបាលស្រុកបុរីអូរស្វាយសែនជ័យ

ពាក់ព័ន្ធសក្តានុពលតំបន់អេកូទេសចរណ៍សម្រស់កោះហាន លោក ផាន់ យុទ្ធ បានលើកឡើងពីភាពទាក់ទាញតំបន់ទេសចរណ៍មួយនេះ ដែលភ្ញៀវទេសចរមកដល់ហើយមានអារម្មណ៍ស្រស់ស្រាយមិនចង់ត្រលប់ទៅវិញ។

មានភូមិសាស្រ្តកណ្តាលទន្លេ ទេសចរចង់ទៅកម្សាន្តរមណីយដ្ឋានអេកូទេសចរណ៍សម្រស់កោះហាន អាចធ្វើដំណើរតាមផ្លូវជាតិលេខ៧ឆ្លងស្ពានសេកុង ចេញពីទីរួមខេត្តស្ទឹងត្រែងមានចម្ងាយប្រហែល ២៤ គីឡូម៉ែត្រ។

លោក ផាន់ យុទ្ធ បានឲ្យដឹងថា តំបន់នេះពីមុនមានភាពស្ងាត់ជ្រងំ មិនសូវមានភ្ញៀវទេសចរមកលេងនោះទេ។ ប្រជាជនរស់នៅពឹងផ្អែកលើការនេសាទ ការធ្វើស្រែចម្ការ និងការដាំដំណាំរួមផ្សំ ប៉ុន្តែក្រោយមានការល្បីតៗគ្នា និងផលិតមាតិកាផ្សព្វផ្សាយលើបណ្ដាញសង្គម បានប្រែក្លាយតំបន់នេះក្លាយជាទីតាំងទាក់ទាញភ្ញៀវយ៉ាងខ្លាំង។

បច្ចុប្បន្ននៅថ្ងៃធម្មតាមានភ្ញៀវយ៉ាងតិច ៤០ ទៅ ៥០ នាក់ ហើយនៅថ្ងៃសៅរ៍ និងអាទិត្យមានភ្ញៀវមកលេងក្នុងចំនួនយ៉ាងច្រើន។

តំបន់អេកូទេសចរណ៍ម្រស់កោះហានស្ថិតនៅតាមបណ្ដោយទន្លេមានប្រវែងប្រហែល ៣៦ គីឡូម៉ែត្រ លាតសន្ធឹងរហូតដល់ព្រំដែនឡាវ ដែលសុទ្ធសឹងតែជាតំបន់ដែលអាចទាក់ទាញនិងបង្កើតជាតំបន់ទេសចរណ៍បាន។

ដោយសារកំណើនភ្ញៀវទេសចរ ប្រជាជនមួយចំនួនបានបោះបង់មុខរបរចាស់ដូចជាការនេសាទ ដោយបម្រើសេវាដឹកភ្ញៀវទេសចរកម្សាន្តវិញ ដែលមុខរបរថ្មីនេះជួយដល់សេដ្ឋកិច្ចរបស់ពលរដ្ឋបានច្រើនជាងមុន និងថែមទាំងបានរួមចំណែកការពារបរិស្ថានធម្មជាតិបានយ៉ាងល្អទៀតផង។

ពាក់ព័ន្ធបញ្ហាសន្តិសុខ លោក ផាន់ យុទ្ធ អះអាងថា មិនដែលមានបញ្ហាចោរកម្មនោះទេ ហើយបរិស្ថានក៏មានអនាម័យល្អ ដោយសារមានការចូលរួមថែរក្សាពីសំណាក់ភ្ញៀវទេសចរ និងសហគមន៍។

លោក ផាន់ យុទ្ធ បានលើកឡើងពីទិសដៅអភិវឌ្ឍន៍នាពេលអនាគត ដោយសហគមន៍នឹងពង្រឹងការគ្រប់គ្រងនិងរៀបចំការអភិវឌ្ឍន៍តាមកោះប្រហែល ២០ ដោយនឹងធ្វើផ្លូវក្រវាត់ជុំវិញ ដើម្បីឱ្យភ្ញៀវទេសចរអាចជិះកង់ឬដើរកម្សាន្ត និងទិញផ្លែឈើពីប្រជាជនមូលដ្ឋាននៅតាមកោះទាំងនោះដោយផ្ទាល់ និងក៏ត្រៀមខ្លួនទាក់ទាញអ្នកវិនិយោគបន្ថែមទៀត ដើម្បីបង្កើតជាកន្លែងកម្សាន្តឬរីសតថ្មីៗនៅពេលខាងមុខ៕