ព័ត៌មានអន្ដរជាតិ

ឧស្សាហកម្មប្រេងពិភពលោកខាត ៥០ ប៊ីលានដុល្លារ រាប់តាំងពីជម្លោះនៅអ៊ីរ៉ង់ផ្ទុះឡើង

បានផុស

៣ ខែ មុន

នៅ

ថ្ងៃសៅរ៍ ១៨ មេសា ២០២៦

ដោយ

ឧស្សាហកម្មប្រេងពិភពលោក បានខាតបង់ប្រាក់ចំណូលប្រហែល ៥០ ប៊ីលានដុល្លារ ដោយសារតែការរាំងស្ទះផលិតកម្ម រាប់ចាប់តាំងពីជម្លោះអ៊ីរ៉ង់បានផ្ទុះឡើងជិត ៥០ ថ្ងៃមុន ដោយផលប៉ះពាល់រំពឹងថានឹងមានរយៈពេលច្រើនខែ ឬច្រើនឆ្នាំ។ នេះបើយោងតាមការគណនារបស់ក្រុមហ៊ុនទិន្នន័យអន្តរជាតិ Kpler និងទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្ដីរាយការណ៍ពីបញ្ហានេះ ធ្វើឡើងក្រោយពីអ៊ីរ៉ង់បានប្រកាសពីការបើកច្រកសមុទ្រហ័រមូហ្សសម្រាប់កប៉ាល់ពាណិជ្ជកម្ម ហើយប្រធានាធិបតីសហរដ្ឋអាមេរិក លោក ដូណាល់ ត្រាំ បានអះអាងថា អាមេរិក និងអ៊ីរ៉ង់នឹងសម្រេចបានកិច្ចព្រមព្រៀងសន្តិភាពទូលំទូលាយឆាប់ៗនេះ។

ក្នុងអត្ថបទចេញផ្សាយកាលពីថ្ងៃសុក្រ (១៧ មេសា) រ៉យទ័របានស្រង់ទិន្នន័យរបស់ Kpler ដែលបង្ហាញថា ចាប់តាំងពីចុងខែកុម្ភៈមក ប្រេងឆៅ និងឧស្ម័នជាង ៥០០ លានបារ៉ែល ត្រូវបានបាត់ចេញពីទីផ្សារពិភពលោក ដែលនេះ ជាការរំខានផ្នែកផ្គត់ផ្គង់ថាមពលដ៏ធំបំផុតមួយក្នុងប្រវត្តិសាស្រ្តសម័យទំនើប។

លោក Johannes Rauball មន្រ្តីវិភាគប្រេងឆៅជាន់ខ្ពស់នៅក្រុមហ៊ុន Kpler បាននិយាយថា ដោយតម្លៃប្រេងជាមធ្យមប្រហែល ១០០ ដុល្លារ/បារ៉ែល បរិមាណផលិតកម្មប្រេងដែលបាត់នោះ បើគិតជាប្រាក់ចំណូលទៅ គឺមានប្រហែល ៥០ ប៊ីលានដុល្លារ។ តួលេខនោះ គឺស្មើនឹងប្រហែល ១% នៃផលិតផលក្នុងស្រុកសរុប (GDPរបស់អាល្លឺម៉ង់ ឬក៏ ទិន្នផលប្រចាំឆ្នាំទាំងមូលរបស់សេដ្ឋកិច្ចតូចៗដូចជាឡាតវី ឬអេស្តូនី។

បើនិយាយមួយជ្រុងទៀត គឺថា ការបាត់ប្រេង និងឧស្ម័ន ៥០០ លានបារ៉ែល គឺស្មើនឹងតម្រូវការប្រេងសម្រាប់វិស័យអាកាសចរណ៍អន្តរជាតិរយៈពេល ១០ សប្ដាហ៍, ឬសម្រាប់តម្រូវការដឹកជញ្ជូនពិភពលោករយៈពេល ១១ ថ្ងៃ, ឬស្មើនឹងការប្រើប្រាស់ប្រេងពិភពលោករយៈពេល ៥ ថ្ងៃ។

ផ្អែកលើការប៉ាន់ស្មានមួយទៀតរបស់រ៉យទ័រ ប្រេង ៥០០ លានបារ៉ែល គឺស្មើនឹងជិតតម្រូវការប្រេងរយៈពេល ១ ខែ នៅសហរដ្ឋអាមេរិក ឬជាង ១ ខែនៅអឺរ៉ុប។ បរិមាណប្រេងដដែល អាចផ្គត់ផ្គង់ការដឹកជញ្ជូនតាមផ្លូវទឹកសកលរហូតដល់ទៅ ៤ ខែ។

ទិន្នន័យរបស់ Kpler បានបង្ហាញថា គិតតែក្នុងខែមីនា បណ្ដាប្រទេសនៅឈូងសមុទ្រពែរ្ស បានខកខានមិនបូមប្រេងប្រហែល ៨ លានបារ៉ែល/ថ្ងៃ ដែលបរិមាណនេះ គឺស្មើនឹងផលិតកម្មរបស់ក្រុមហ៊ុនយក្សអាមេរិក Exxon Mobil និង Chevron រួមបញ្ចូលគ្នា។

ការនាំចេញប្រេងឥន្ធនៈយន្តហោះពីប្រទេសអារ៉ាប៊ីសាអូឌីត កាតា អារ៉ាប់រួម គុយវ៉ែត បារ៉ែន និងអូម៉ង់បានធ្លាក់ចុះយ៉ាងខ្លាំង ពីប្រហែល ១៩,៦ លានបារ៉ែលក្នុងខែកុម្ភៈ មកត្រឹម ៤,១ លានបារ៉ែលក្នុងខែមីនា និងដើមខែមេសា៕