កីឡាករ Abdelfattah ជាអាវុធគ្រោះថ្នាក់របស់ Kuwait SC បានទាំងក្រឡុក បញ្ជូន និងស៊ុត

ខ្សែបម្រើប្រយុទ្ធម្ចាស់អាវលេខ ១០ Amr Abdelfattah ត្រូវបានកំណត់មុខសញ្ញាជាកីឡាករដ៏គ្រោះថ្នាក់របស់ក្រុម Kuwait SC ដែលត្រៀមជួបជាមួយក្រុម ព្រះខ័នរាជស្វាយរៀង ក្នុងវគ្គផ្តាច់ព្រ័ត្រពានរង្វាន់ AFC Challenge League នៅទឹកដី គុយវ៉ែត នាថ្ងៃ ពុធ ទី ១៣ ខែ ឧសភា ឆ្នាំ ២០២៦។

ក្រុម Kuwait SC មានសមាសភាពកីឡាករបរទេសដូចនឹងក្រុម ព្រះខ័នរាជស្វាយរៀង ដែរ ពោលគឺចំនួន ៨ នាក់ស្មើគ្នា។ ក្រុមមកពីតំបន់ អាស៊ីខាងលិច មួយនេះ មានកីឡាករសុទ្ធតែគួរឱ្យចាប់អារម្មណ៍ ទាំងកីឡាករសញ្ជាតិ គុយវ៉ែត ផ្ទាល់ និងកីឡាករបរទេស ប៉ុន្តែអ្នកដែលគួរឱ្យចាប់អារម្មណ៍បំផុត គឺកីឡាករ Amr Abdelfattah។

ស្ថិតិរបស់ខ្សែបម្រើប្រយុទ្ធសញ្ជាតិ អេហ្ស៊ីប វ័យ ២៩ ឆ្នាំរូបនេះ មិនសូវមានការបង្ហាញច្រើនចេញពីលីគកំពូលរបស់ គុយវ៉ែត នោះទេ ប៉ុន្តែអ្វីដែលយកមកធ្វើជាភស្តតាងបានបញ្ជាក់ ថា Amr Abdelfattah ជាកីឡាករដ៏ល្អ គឺនៅក្នុងការប្រកួត ២ ប្រកួតចុងក្រោយ ដែលរូបគេបង្ហាញសមត្ថភាពយ៉ាងល្អគួរឱ្យកត់សម្គាល់។

អំឡុងការប្រកួតវគ្គ ៨ ក្រុមចុងក្រោយពាន ACGL ដែលក្រុម Kuwait SC បានយកឈ្នះលើក្រុម Al-Shabab ៥-៣ កីឡាករ Abdelfattah បានដើរតួជាអ្នកនាំលេងដ៏សំខាន់។ រូបគេបានបង្កើតឱកាសជាច្រើន រហូតសម្រេចបាននូវការបញ្ជូនឱ្យមិត្តរួមក្រុមស៊ុតបញ្ចូលទី ១ គ្រាប់ និងស៊ុតបញ្ចូលទីខ្លួនឯង ១ គ្រាប់។

ដោយឡែក នៅវគ្គពាក់កណ្តាលផ្តាច់ព្រ័ត្រទល់នឹងក្រុម Muras United កីឡាករ Abdelfattah នៅតែបន្តឈរជាកីឡាករដ៏សំខាន់របស់ Kuwait SC ដោយបានលេងពេញ ៩០ នាទី និងជួយបញ្ជូនឱ្យមិត្តរួមក្រុមស៊ុតបញ្ចូលទី ២ គ្រាប់ រហូតវាយបកយកឈ្នះក្នុងលទ្ធផល ២-១។

គួរបញ្ជាក់ ថា ស្ថិតិនៅក្នុងលីគកំពូល គុយវ៉ែត របស់ខ្សែបម្រើសញ្ជាតិ អេហ្ស៊ីប រូបនេះមិនមានការបង្ហាញទូលំទូលាយនោះទេ ប៉ុន្តែបើនៅក្នុងពានអន្តរជាតិវិញ រួមមានពាន AFC Champions League Two និង AFC Challenge League កីឡាករលេងបានសរុប ១២ ប្រកួត ក្នុងនោះរកបាន ៤ គ្រាប់ និង ៤ បញ្ជូន (assists)៕

អត្ថបទ៖ សេម កុសល