ព័ត៌មានជាតិ

អ្នកនាំពាក្យប្រធានរដ្ឋសភាថា ចំណាត់ការរបស់រដ្ឋាភិបាលលើ Scam ឆ្លើយតបយ៉ាងមានប្រសិទ្ធចំពោះច្បាប់ដែលទើបអនុម័ត

បានផុស

២ ខែ មុន

នៅ

ថ្ងៃសុក្រ ៨ ឧសភា ២០២៦

ដោយ

នាយខុទ្ទកាល័យ និងជាអ្នកនាំពាក្យសម្ដេចប្រធានសភា លោក កែវ ពិសិដ្ឋ ថារដ្ឋសភាមិនមានគម្រោងកោះហៅសមាជិករដ្ឋាភិបាលសាកសួរពីចំណាត់ការលើឧក្រិដ្ឋកម្មឆបោកអនឡាញនោះទេ ដោយសារតាមរយៈការសង្កេតពីការអនុវត្តច្បាប់លើឧក្រិដ្ឋកម្មនេះដោយរដ្ឋាភិបាលគឺមានប្រសិទ្ធភាព និងទុកចិត្តបាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឆ្លើយទៅនឹងសំណួរកម្ពុជាថ្មីលោក កែវ ពិសិដ្ឋ បានបញ្ជាក់ថាការវាយតម្លៃជារួមលើការអនុវត្តន៍ច្បាប់ប្រឆាំងបទល្មើសឆបោកអនឡាញដោយរដ្ឋាភិបាលគឺមានភាពសកម្ម និងមានប្រសិទ្ធភាពច្រើន។ លោកមានកោតសរសើរនិងលើកទឹកចិត្តដល់ការអនុវត្តន៍បន្ថែមទៀត។

លោកថា៖ «បើថាជាការអញ្ជើញរដ្ឋាភិបាលមកបំភ្លឺរឿងនេះដូចជាអត់គម្រោងអីទេ! លើកលែងតែរដ្ឋាភិបាលគាត់មកធ្វើការរាយការណ៍ពីវឌ្ឍនភាព ដោយសារតែការអនុវត្តជាក់ស្ដែងឃើញមានភាពសកម្ម មានប្រសិទ្ធភាពច្រើន»។

គួរឱ្យដឹងថាច្បាប់ស្ដីពីការប្រឆាំងការឆបោកតាមប្រព័ន្ធបច្ចេកវិទ្យាត្រូវបានដាក់ឱ្យប្រើប្រាស់ជាផ្លូវការកាលពីថ្ងៃទី៦ ខែមេសា ឆ្នាំ២០២៦ កន្លងទៅ ស្របពេលដែលវិធានការរបស់រដ្ឋាភិបាលលើឧក្រិដ្ឋកម្មឆបោកអនឡាញនេះក៏កាន់តែខ្លាំងក្លាផងដែរជាពិសេសនៅក្រុងប៉ោយប៉ែតខេត្តបន្ទាយមានជ័យ។

ថ្លែងប្រាប់អ្នកសារព័ត៌មានបន្ទាប់ពីបើកវេទិកាវិនិយោគកម្ពុជាកាលពីថ្ងៃទី៧ ខែឧសភា អនុប្រធានទី១ ក្រុមប្រឹក្សាអភិវឌ្ឍន៍កម្ពុជា លោកឧបនាយករដ្ឋមន្ត្រី ស៊ុន ចាន់ថុល បានអបអរសាទរចំពោះចំណាត់ការរបស់រដ្ឋាភិបាល និងរំពឹងថាកម្ពុជាអាចនឹងទាក់ទាញអ្នកវិនិយោគល្អៗបានច្រើនក្រោយការបង្ក្រាបលើសេដ្ឋកិច្ចខ្មៅនេះបានជោគជ័យ៕