ព័ត៌មានអន្ដរជាតិ

UNCTAD៖ សេដ្ឋកិច្ចសកលចូលដល់យុគសម័យកាន់តែផុយស្រួយ ខណៈកំណើនសេដ្ឋកិច្ច និងពាណិជ្ជកម្មចុះខ្សោយ

បានផុស

១ ខែ មុន

នៅ

ថ្ងៃសុក្រ ២៩ ឧសភា ២០២៦

ដោយ

សេដ្ឋកិច្ចពិភពលោកកំពុងផ្លាស់ប្ដូរពីដំណាក់កាលនៃការរំខានខ្សែច្រវ៉ាក់ផ្គត់ផ្គង់ និងអតិផរណា ចូលទៅ «យុគសម័យកាន់តែផុយស្រួយ» ជាពេលដែលការអូសបន្លាយនៃភាពស្រពេចស្រពិល អាចបង្កកង្វះខាតទំនិញ និងភាពតានតឹងផ្នែកហិរញ្ញវត្ថុកាន់តែធំទូលាយ ខណៈកំណើនសេដ្ឋកិច្ច និងពាណិជ្ជកម្មចុះខ្សោយ។ នេះបើយោងតាមរបាយការណ៍ព្យាករណ៍ពាណិជ្ជកម្ម និងការអភិវឌ្ឍឆ្នាំ ២០២៦ របស់អង្គការសហប្រជាជាតិស្តីពីពាណិជ្ជកម្ម និងការអភិវឌ្ឍ (UNCTAD) ដែលចេញផ្សាយកាលពីពេលថ្មីៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

របាយការណ៍បានព្រមានថា ហានិភ័យភូមិសាស្ត្រនយោបាយបច្ចុប្បន្ននេះ បានវ៉ាដាច់ជម្លោះគោលនយោបាយពាណិជ្ជកម្ម ក្លាយជាកត្តាចម្បងដែលបង្កើតអស្ថិរភាពសម្រាប់សេដ្ឋកិច្ចពិភពលោក។ ភាពតានតឹងកើននៅមជ្ឈិមបូព៌ា ជាពិសេសការផ្ទុះជម្លោះយោធានៅចុងខែកុម្ភៈ បានរំខានដល់ផ្លូវដឹកជញ្ជូន បង្កើនបម្រែបម្រួលទីផ្សារ និងជំរុញឱ្យថ្លៃដឹកជញ្ជូនសកលកើនឡើង។

ជាលទ្ធផល UNCTAD បានព្យាករពីការធ្លាក់ចុះយ៉ាងទូលំទូលាយទាំងកំណើនសេដ្ឋកិច្ចពិភពលោក និងពាណិជ្ជកម្មទំនិញនៅឆ្នាំនេះ។ អង្គការនេះបានរំពឹងថា កំណើនសេដ្ឋកិច្ចពិភពលោកនឹងថយចុះមកត្រឹម ២,៦% នៅឆ្នាំ ២០២៦ ខណៈភាពតានតឹងភូមិសាស្ត្រនយោបាយបន្តរំខានដល់ទីផ្សារថាមពល លំហូរពាណិជ្ជកម្ម និងលក្ខខណ្ឌហិរញ្ញវត្ថុទូទាំងពិភពលោក។

ទោះបីជាទំហំពាណិជ្ជកម្មទំនិញរូបីតាមតម្លៃបច្ចុប្បន្ន (Nominal merchandise trade values) នៅតែមានភាពធន់នាដើមឆ្នាំ ២០២៦ ក៏ដោយ UNCTAD បានកត់សម្គាល់ថា សន្ទុះស្នូលនៃសេដ្ឋកិច្ចនៅតែមិនស្មើគ្នា និងងាយរងគ្រោះដោយសារការរំខានផ្នែកភស្តុភារ។ កំណើនពាណិជ្ជកម្មទំនិញ រំពឹងថានឹងចុះខ្សោយយ៉ាងខ្លាំង ចំពេលមានការរំខានដល់ខ្សែច្រវ៉ាក់ផ្គត់ផ្គង់ជាបន្តបន្ទាប់ និងកំណើនភាពមិនប្រាកដប្រជាកាន់តែខ្លាំង។

របាយការណ៍របស់ UNCTAD ក៏បានគូសបញ្ជាក់ផងដែរថា តម្រូវការខ្លាំងសម្រាប់ផលិតផលទាក់ទងនឹងបញ្ញាសិប្បនិម្មិត (AI) កំពុងបិទបាំងភាពទន់ខ្សោយគ្រប់ជ្រុងជ្រោយនៅទូទាំង «ឧស្សាហកម្មផលិតកម្មបែបប្រពៃណី» និងផ្នែកទំនិញ (Commodity)។

*Palais des Nations ដែលជាទីស្នាក់ការកណ្តាលរបស់ UNCTAD ក្នុងទីក្រុងហ្សឺណែវ ប្រទេសស្វីស*

UNCTAD លើកឡើងថា បណ្ដាប្រទេសកំពុងអភិវឌ្ឍនឹងប្រឈមមុខនឹងសម្ពាធកាន់តែខ្លាំងឡើងៗពីការឡើងថ្លៃប្រេងឥន្ធនៈ អាហារ និងជី ដែលកំពុងរួមចំណែកដល់កំណើនអតិផរណា លក្ខខណ្ឌហិរញ្ញប្បទានតឹងតែង និងហានិភ័យពីខាងក្រៅផ្សេងៗ។

UNCTAD បានព្រមានបន្ថែមថា សន្តិសុខស្បៀងអាហារកំពុងក្លាយជាកង្វល់អំពីស្ថិរភាពហិរញ្ញវត្ថុកាន់តែខ្លាំងឡើង ជាពិសេសសម្រាប់ប្រទេសមានប្រាក់ចំណូលទាប ដែលកំពុងតស៊ូជាមួយនឹងបំណុល និងផលប៉ះពាល់ពីខាងក្រៅ។

ក្នុងពេលជាមួយគ្នានេះ ការរំខានពាក់ព័ន្ធនឹងការបិទច្រកសមុទ្រហ័រមូហ្ស និងផ្លូវពាណិជ្ជកម្មសំខាន់ៗផ្សេងទៀត កំពុងជំរុញឱ្យថ្លៃដើមដឹកជញ្ជូន និងថាមពលកើនឡើងទូទាំងពិភពលោក ដោយបន្ថែមសម្ពាធលើពាណិជ្ជកម្មអន្តរជាតិ និងសកម្មភាពសេដ្ឋកិច្ច។

ទៅថ្ងៃមុខ UNCTAD រំពឹងថាសេដ្ឋកិច្ចពិភពលោកនឹងកាន់តែមានគម្លាតខុសគ្នាច្រើន ដោយសារកំណើនសេដ្ឋកិច្ចយឺតយ៉ាវក្នុងលក្ខណៈជារចនាសម្ព័ន្ធ ទីផ្សារហិរញ្ញវត្ថុកាន់តែតឹងតែង និងការបន្តងាយរងគ្រោះរបស់ប្រទេសកំពុងអភិវឌ្ឍទៅនឹងការប៉ះទង្គិចផ្នែកពាណិជ្ជកម្ម ថាមពល និងហិរញ្ញវត្ថុ។

អង្គការនេះបានសង្កត់ធ្ងន់ថា ហានិភ័យទាំងនេះទាមទារឱ្យមានការសម្របសម្រួលគោលនយោបាយអន្តរជាតិឱ្យកាន់តែរឹងមាំ និងស្ថិរភាពសេដ្ឋកិច្ចពិភពលោកដែលកាន់តែប្រសើរឡើង៕