សម្ដេច ហ៊ុន សែន រំលឹកអាជ្ញាធរខេត្តកំពង់ធំឱ្យបន្តទប់ស្កាត់បទល្មើសតាមបឹងទន្លេសាប

ថ្លែងក្នុងវេទិកាជួបមន្ត្រីនៅខេត្តកំពង់ធំ នាព្រឹកថ្ងៃទី៣ ខែមិថុនា ឆ្នាំ២០២៦ សម្ដេចតេជោ ហ៊ុន សែន ប្រធានព្រឹទ្ធសភា បានក្រើនរំលឹកឱ្យអាជ្ញាធរគ្រប់ជាន់ថ្នាក់ និងកម្លាំងមានសមត្ថកិច្ច រួមគ្នាការពារធនធានធម្មជាតិឱ្យបានគង់វង្ស តាមរយៈការទប់ស្កាត់បទល្មើសខុសច្បាប់នៅតាមបឹងទន្លេសាប។

សម្ដេចតេជោ បានមានប្រសាសន៍ថា អាជ្ញាធរខេត្តកំពង់ធំ គឺត្រូវបន្តយកចិត្តទុកដាក់ការពារ និងថែរក្សាធនធានធម្មជាតិដែលមានក្នុងមូលដ្ឋាន ជាពិសេសធនធានធម្មជាតិក្នុងបឹងទន្លេសាប ដោយត្រូវទប់ស្កាត់ការកាប់ទន្ទ្រានព្រៃលិចទឹក និងរួមគ្នាថែរក្សាឱ្យបានគង់វង្ស។

បន្ថែមពីលើធនធានធម្មជាតិ សម្ដេចតេជោ ហ៊ុន សែន បានរំលឹកដល់មន្ត្រីទាំងអស់ត្រូវបន្តរក្សានូវស្ថិរភាពជាតិ និងយកចិត្តទុកដាក់រក្សាសន្តិសុខ សណ្តាប់ធ្នាប់សង្គម ដោយបន្តអនុវត្តគោលនយោបាយភូមិឃុំសង្កាត់មានសុវត្ថិភាព ក្នុងការបង្ក្រាបនូវបទល្មើសផ្សេងៗដូចជា ចោរឆក់ ចោរប្លន់ ការជួញដូរគ្រឿងញៀន និងបទល្មើសបច្ចេកវិទ្យា។

ទាក់ទិននឹងបទល្មើសបច្ចេកវិទ្យា សម្ដេចតេជោ បានគូសរំលេចពីសកម្មភាពប្រយុទ្ធប្រឆាំងបទល្មើសឆបោកតាមប្រព័ន្ធបច្ចេកវិទ្យា (Online Scam) ដោយសម្ដេចបញ្ជាក់ជាថ្មីថា គ្មានការយោគយល់ណាមួយនោះឡើយចំពោះទីតាំងណាដែលយកធ្វើជាកន្លែងឆបោកតាមប្រព័ន្ធអនឡាញ ខណៈអ្នកដែលពាក់ព័ន្ធក៏មិនត្រូវបានលើកលែងដែរ។

សម្តេចប្រធានព្រឹទ្ធសភា ក៏បានក្រើនរំលឹកដល់មន្ត្រីរាជការទាំងអស់ ពិសេសក្រុមប្រឹក្សាឃុំសង្កាត់ឱ្យបន្តយកចិត្តទុកដាក់បំពេញតួនាទីភារកិច្ចបម្រើជាតិ និងប្រជាជនឱ្យបានល្អប្រសើរ ជាពិសេសបន្តយកចិត្តទុកដាក់ផ្តល់នូវសេវាតម្រូវការ និងសេវាចាំបាច់នានាជូនប្រជាពលរដ្ឋឱ្យបានលឿន រហ័ស និងមានប្រសិទ្ធភាព។

សម្តេចតេជោ ថ្លែងទៅកាន់ក្រុមប្រឹក្សាឃុំសង្កាត់ ថា «យើងត្រូវរត់ទៅរកការងារ កុំឱ្យការងារ​រត់​មក​រកយើង ហើយយើងត្រូវរត់ទៅរកប្រជាជន កុំឱ្យប្រជាជនរត់មករកយើង»។ សម្ដេចតេជោ នៅតែសង្កត់ធ្ងន់ដល់សារដ៏សំខាន់ដែលរំលឹកឡើងវិញដល់មន្ត្រីទាំងអស់ ជាពិសេសមន្ត្រីនៅតាមមូលដ្ឋាន ថា ជៀសវាងភាពអសកម្ម ឬការគៀបសង្កត់ណាមួយ និងត្រូវចាំថា មន្ត្រីមិនមែនជាចៅហ្វាយរបស់ប្រជាជននោះទេ គឺជាអ្នកបម្រើដ៏ស្មោះត្រង់របស់ប្រជាជន៕