នគរបាលព្រហ្មទណ្ឌធ្ងន់-ស្រាលរាជធានីភ្នំពេញ យកជនសង្ស័យ ៤នាក់ មកបង្ហាញមុខជាសាធារណៈពាក់ព័ន្ធករណីឃាតកម្ម

សមត្ថកិច្ចជំនាញព្រហ្មទណ្ឌកម្រិតធ្ងន់-ស្រាល បំបែកសំណុំរឿង ស្រាវជ្រាវឃាត់ខ្លួនបានជនសង្ស័យ០៤នាក់ យកមកបង្ហាញមុខជាសាធារណៈ។  ជាក់ស្តែងកាលពីថ្ងៃទី ០៧ ខែមិថុនា ឆ្នាំ២០២៦ នគរបាលបានយកជនសង្ស័យ ជនជាតិចិន ៤នាក់ ពាក់ព័ន្ធករណីឃាតកម្ម គិតទុកជាមុន យកមកបង្ហាញមុខជាសាធារណៈ នៅស្នងការដ្ឋាននគរបាលរាជធានីភ្នំពេញ ផ្ទាល់តែម្តង។

យោងតាមការបញ្ជាក់ពីនគរបាក បានអោយដឹងថា កាលពីថ្ងៃទី៤ ខែមិថុនា ឆ្នាំ២០២៦ វេលាម៉ោង ១០និង៣០នាទីព្រឹក កម្លាំងការិយាល័យនគរបាលព្រហ្មទណ្ឌកម្រិតធ្ងន់ និងស្រាល បានធ្វើការសហការជាមួយនគរបាលខណ្ឌសែនសុខ, នគរបាលខណ្ឌដង្កោ និងនគរបាលខណ្ឌច្បារអំពៅ ដឹកនាំដោយលោកឧត្តសេនីយ៍ត្រី ប៊ុន សត្យា ស្នងការរង ទទួលផែនការងារនគរបាលព្រហ្មទណ្ឌ និងលោកឧត្តសេនីយ៍ទោ ញ៉ុង រស់មេត្តា ស្នងការរង ទទួលការិយាល័យនគរបាលព្រហ្មទណ្ឌកម្រិតធ្ងន់ និងលោកវរសេនីយ៍ឯក អេង សោភា នាយការិយាល័យនគរបាលព្រហ្មទណ្ឌកម្រិតធ្ងន់ និងលោកវរសេនីយ៍ឯក ម៉ម សាវន នាយការិយាល័យនគរបាលព្រហ្មទណ្ឌកម្រិតស្រាល បានបើកការស្រាវជ្រាវ និងបង្ក្រាបជនសង្ស័យ០៤នាក់ ពាក់ព័ន្ធករណី ឃាតកម្មគិតទុកជាមុន (សម្លាប់ជនរងគ្រោះយកសាកសពដាក់ក្នុងរថយន្តយកទៅប្លុងចោល) ស្ថិតនៅចំណុចដីឡូតិ៍គ្មានលេខ ផ្លូវលេខ២១៧ ភូមិបាគូ សង្កាត់ដង្កោ ខណ្ឌដង្កោ រាជធានីភ្នំពេញ។

ជនសង្ស័យចំនួន០៤នាក់ឈ្មោះ ZHOU JIAN HONG ភេទប្រុស អាយុ៥២ ឆ្នាំ មុខរបរ ចុងភៅ ជនជាតិចិន, ឈ្មោះ ZHAO FENG QUAN ភេទប្រុស អាយុ ៣៦ ឆ្នាំមុខរបរ មិនពិតប្រាកដ ជនជាតិចិន, ឈ្មោះ HAN DE DONG ភេទប្រុស អាយុ៤៣ ឆ្នាំ មុខរបរ ចុងភៅ ជនជាតិចិន និង ឈ្មោះ MA RONG GUI ភេទប្រុស អាយុ ៥១ឆ្នាំមុខរបរម្ចាស់កការ៉ាសរថយន្ត ជនជាតិចិន។

ក្នុងនោះ សមត្ថកិច្ចដកហូតវត្ថុតាងរួមមាន ទូរសព្ទIPHONE ចំនួន០៤គ្រឿង, រថយន្ត ចំនួន០២គ្រឿង (រថយន្តម៉ាក TOYOTA LAND CRUISER សេរីឆ្នាំ២០០៨ ពណ៌ខ្មៅ ពាក់ផ្លាកលេខ 2AI-3068 និងរថយន្តម៉ាក TOYOTA RRIUS សេរីឆ្នាំ២០១២ ពណ៌ ស ពាក់ផ្លាកលេខ 2BH-1311 (ជារថយន្តដឹកសាកសពយកទៅប្លុងចោល),  ម៉ូតូម៉ាកស្មាក  ពណ៌ក្រហមខ្មៅ ពាក់ផ្លាកលេខ 1CE-0447, លិខិតឆ្លងដែន ចំនួន០២។

បច្ចុប្បន្នជនសង្ស័យខាងលើរួមវត្ថុតាង ត្រូវបានកម្លាំងការិយាល័យកសាងសំណុំបញ្ជូនទៅតុលាការចាត់ការតាមនីតិវិធី៕ អត្ថបទ ៖ រដ្ឋា