ស្ត្រីជនជាតិវៀតណាម៤នាក់វ័យចន្លោះពី៥៣-៧០ឆ្នាំ ត្រូវឃាត់ខ្លួនក្នុងករណីលួចទូរស័ព្ទជិត២០គ្រឿងនៅនគរសង្ក្រាន្តទួលទំពូង

សមត្ថកិច្ចជំនាញព្រហ្មទណ្ឌ បានឃាត់ខ្លួនជនសង្ស័យជាជនជាតិវៀតណាមចំនួន៤នាក់ មានវ័យចន្លោះពី៥៣ឆ្នាំ ដល់ទៅ៦៩ឆ្នាំ ធ្វើសកម្មភាពលួចទូរស័ព្ទប្រជាពលរដ្ឋដើរលេងកម្សាន្តនគរសង្រ្កាន្តទួលទំពូង ដោយចាប់យកវត្ថុតាងជាទូរស័ព្ទទំនើបជិត២០គ្រឿង។

បើតាមក្រុមការងារព័ត៌មាន និងប្រតិកម្មរហ័ស នៃស្នងការនគរបាលរាជធានី ការចាប់ខ្លួននេះ ធ្វើឡើងកាលពីព្រឹកថ្ងៃទី១៥ ខែមេសា ឆ្នាំ២០២៦ នៅក្នុងកម្មវិធីនគរសង្រ្កាន ទួលទំពូង ផ្លូវ១៥៥ សង្កាត់ទួលទំពូង១ ខណ្ឌចំការមន រាជធានីភ្នំពេញ ។

បើតាមប្រភពដដែល ជនសង្ស័យដែលសមត្ថកិច្ចឃាត់ខ្លួនទី១/ឈ្មោះ CHU THI CHIEN វ័យ៦៩ឆ្នាំ,  ទី២/ឈ្មោះ NGUYEN THI HOA អាយុ៥៩ឆ្នាំ, ទី៣/ឈ្មោះ TRAN THI THAO អាយុ ៥៣ឆ្នាំ និងទី៤/ឈ្មោះ KIM THI LIEU អាយុ ៦០ឆ្នាំ។ ស្រ្តីទាំង៤នាក់នេះ ជាជនជាតិវៀតណាម ស្នាក់នៅផ្ទះជួល មិនស្គាល់ទីតាំង គ្មានមុខរបរ។ ក្រោយឃាត់ខ្លួន សមត្ថកិច្ចបានត្រួតពិនិត្យរកសារធាតុញៀន ប៉ុន្តែលទ្ធផលបង្ហាញថា គ្មានសារធាតុញៀនឡើយ។

ក្នុងពេលចាប់ខ្លួន សមត្ថកិច្ចបានចាប់យកវត្ថុតាងដូចជាកាបូបស្ពាយពីក្រោយចំនួន០១ពណ៌ខ្មៅ។ទូរស័ព្ទដៃចម្រុះម៉ាកចំនួន១៧គ្រឿង និងក្រដាសអាលុយម៉ីញ៉ូមមួយចំនួន។

បច្ចុប្បន្នសមត្ថកិច្ចជំនាញកំពុងកសាងសំណុំរឿងលើជនសង្ស័យខាងលើ ដើម្បីចាត់ការតាមនីតិវិធី៕