កម្ពុជាស្នើវៀតណាមកែសម្រួលនីតិវិធីដឹកជញ្ជូនសំដៅកាត់បន្ថយពេលវេលាដឹកទំនិញឆ្លងកាត់ត្រង់រវាងប្រទេសទាំងពីរ

ក្នុងវិស័យសេដ្ឋកិច្ច​ និងពាណិជ្ជកម្ម​ សម្តេច​ធិបតី ហ៊ុន ម៉ាណែត នាយករដ្ឋម​ន្ត្រីកម្ពុជា ​ បាន​ស្នើរទៅកាន់នាយករដ្ឋមន្រ្តីវៀតណាម លោក ឡេ មិញហ៊ឹង រៀបចំកែសម្រួលនីតិវិធី​សម្រាប់ការដឹកជញ្ជូនទំនិញឆ្លងកាត់ត្រង់រវាងប្រទេសទាំងពីរសំដៅកាត់បន្ថយពេលវេលាដឹកជញ្ជូន។ នាយករដ្ឋមន្ត្រីកម្ពុជា ស្នើទៅកាន់សមភាគីវៀតណាមដូច្នេះក្នុងជំនួបពិភាក្សាទ្វេភាគីនាព្រឹកថ្ងៃទី៨ ខែមិថុនា ក្នុងពេលបំពេញទស្សនកិច្ចផ្លូវការ និងចូលរួមវេទិកាអនាគតអាស៊ាន លើកទី៣ (3rd ASEAN Future Forum – AFF) ប្រព្រឹត្តទៅពីថ្ងៃទី៨-៩ ខែមិថុនា នៅទីក្រុងហាណូយ។

​បើតាមសេចក្ដីប្រកាសព័ត៌មាន ថ្នាក់ដឹកនាំទាំងពីរក៏បានពិភាក្សា និងផ្លាស់ប្តូរទស្សនៈគ្នាអំពីការលើកកម្ពស់កិច្ចសហប្រតិបត្តិការលើវិស័យគន្លឹះសំខាន់ៗ រួមមាន៖ នយោបាយ, សេដ្ឋកិច្ច ពាណិជ្ជកម្ម និងការវិនិយោគ, សន្តិសុខ និងការពារជាតិ, អប់រំ និងការបណ្តុះបណ្តាលវិជ្ជាជីវៈ, សុខាភិបាល, ទេសចរណ៍, វប្បធម៌, ថាមពល, ការតភ្ជាប់ហេដ្ឋារចនាសម្ព័ន្ធ, និងការផ្លាស់ប្តូររវាងប្រជាជននិងប្រជាជន។

បន្ថែមពីនេះ សម្តេច​ធិបតី​ បាន​គូស​បញ្ជាក់អំពី​សារៈសំខាន់នៃការពន្លឿនការសម្រេចលើចំណុចការតភ្ជាប់នៃផ្លូវល្បឿនលឿនភ្នំពេញ-បាវិត និងហូជីមិញ-ម៉ុកបៃ,​ ការតភ្ជាប់ការធ្វើដំណើរតាមផ្លូវទឹក និងការពង្រីកជើងហោះហើរបន្ថែមរវាងប្រទេសទាំងពីរ។

ប្រមុខរដ្ឋាភិបាលទាំងពីរ បានសម្តែងនូវការពេញចិត្ត និងវាយតម្លៃខ្ពស់ចំពោះភាពរីកចម្រើនយ៉ាងល្អប្រសើរ នៃទំនាក់ទំនង និងកិច្ចសហប្រតិបត្តិការលើគ្រប់វិស័យរវាងកម្ពុជា និងវៀតណាម ព្រមទាំងបានឯកភាពគ្នាក្នុងការរៀបចំព្រឹត្តិការណ៍នានាឱ្យបានអធិកអធម ដើម្បីអបអរសាទរខួបអនុស្សាវរីយ៍លើកទី៦០ នៃការបង្កើតទំនាក់ទំនងការទូតរវាងប្រទេសទាំងពីរ នៅឆ្នាំ២០២៧ ខាងមុខ។  ជាមួយគ្នានេះ ប្រមុខរដ្ឋាភិបាលទាំងពីរ បានឯកភាព និងប្តេជ្ញាចិត្តយ៉ាងមុតមាំក្នុងការបន្តជំរុញទំនាក់ទំនងទ្វេភាគី ឱ្យកាន់តែស៊ីជម្រៅ និងឈានទៅដល់កម្រិតខ្ពស់ថ្មីមួយទៀត ក្នុងស្មារតីនៃភាពជាអ្នកជិតខាងល្អ មិត្តភាពប្រពៃណី កិច្ចសហប្រតិបត្តិការគ្រប់ជ្រុងជ្រោយ និងស្ថិរភាពយូរអង្វែង។

គួរគូសបញ្ជាក់ថា កម្ពុជា វៀតណាម បានបង្កើតទំនាក់ទំនងការទូតជាផ្លូវការជាមួយគ្នា នៅថ្ងៃទី២៤ ខែមិថុនា ឆ្នាំ១៩៦៧ ដែលគិតមកទល់ពេលបច្ចុប្បន្ននេះ ទំនាក់ទំនងទ្វេភាគីនេះ បានឈានដល់វ័យ៥៩ឆ្នាំហើយ។

ក្នុងឆ្នាំ២០២៥ ទំហំពាណិជ្ជកម្មទ្វេភាគីរវាងកម្ពុជា និងវៀតណាមសម្រេចបានក្នុងទំហំជាង១១ពាន់លានដុល្លារសហរដ្ឋអាម៉េរិក។ រយៈពេល៥ខែដំបូងក្នុងឆ្នាំ២០២៦ ទំហំពាណិជ្ជកម្មទ្វេភាគីកើនឡើងដល់ជាង៥ពាន់លានដុល្លារសហរដ្ឋអាម៉េរិក ស្របពេលដែលប្រទេសទាំងពីររំពឹងថាទំហំពាណិជ្ជកម្មទ្វេភាគីនឹងកើនឡើងដល់២០ពាន់លានដុល្លារឆាប់ៗនេះ៕

ដោយ៖ ង៉ិល ណារ៉ាត់